ଆମେରିକା; ୨୧ ବର୍ଷ ପରେ ଭାରତକୁ ମିଳିଲା ମିସେସ୍ ଓ୍ବାଲ୍ଡ ଟାଇଟଲ୍ । ୨୦୨୨-୨୩ର ମିସେସ୍ ଓ୍ଵାଲ୍ଡ ମୁକୁଟ ପିନ୍ଧିଲେ ସରଗମ କୌଶଲ । ଲସ ଭେଗସରେ ଚାଲିଥିବା ଗାଲା ଇଭେଣ୍ଟରେ ଜମ୍ମୁ ଓ କାଶ୍ମୀରର ବାସିନ୍ଦା ଏହି ଟାଇଟଲର ଅଧିକାରୀ ହୋଇଛନ୍ତି । ୬୩ଟି ଦେଶର ପ୍ରତିଯୋଗୀଙ୍କୁ ପଛରେ ପକାଇ ମିସେସ୍ ଓ୍ଵାଲ୍ଡ ହୋଇଛନ୍ତି ସରଗମ ।
ଆମେରିକାର ଲସ୍ ଭେଗାସ୍ ଠାରେ ଆୟୋଜିତ ଏହି କାର୍ଯ୍ୟକ୍ରମରେ ବିବେକ ଓବରୋଏ, ଅଭିନେତ୍ରୀ ସୋହା ଅଲି ଖାନ୍, ଅଦିତି ଗୋବିତ୍ରିକର ଏବଂ ମହମ୍ମଦ ଅଜହରୁଦ୍ଦିନ ଉପସ୍ଥିତ ଥିଲେ । ମିସେସ୍ ୱାର୍ଲ୍ଡ ମୁକୁଟ ଜିତିବା ପରେ ସରଗମ୍ ଭାବପ୍ରବଣ ହୋଇ ତାଙ୍କ ଆଖିରେ ଖୁସିର ଲୁହ ଆସି ଯାଇଥିଲା । ସେ ଟାଇଟଲ ହାତେଇବା ପରେ ସରଗମ ତାଙ୍କ ଇନଷ୍ଟା ଆକାଉଣ୍ଟରେ ପୋଷ୍ଟ କରି ସେ ଲେଖିଛନ୍ତି ‘ଲମ୍ବା ଅପେକ୍ଷାର ଅନ୍ତ, ୨୧ ବର୍ଷ ପରେ ଆମେ ମୁକୁଟ ଫେରି ପାଇଛୁ’ ।
ସରଗମ ଜମ୍ମୁ ଓ କାଶ୍ମୀରର ବାସିନ୍ଦା । ସେ ଇଂରାଜି ସାହିତ୍ୟରେ ସ୍ନାତକତ୍ତର ହାସଲ କରିଛନ୍ତି । ମଡେଲ ହେବା ବ୍ୟତୀତ ସରଗମ୍ ଜଣେ ଶିକ୍ଷକ ଭାବେ ବେଶ ଜଣାଶୁଣା । ତାଙ୍କ ସ୍ୱାମୀ ଭାରତୀୟ ନୌସେନାରେ କାର୍ଯ୍ୟରତ ଅଛନ୍ତି । ସେ ୨୦୧୮ ରେ ଅନେକ ସୌନ୍ଦର୍ଯ୍ୟ ପ୍ରତିଯୋଗିତାରେ ଭାଗ ନେଇଥିଲେ ଏବଂ ସେହି ବର୍ଷ ସେ ମିସେସ୍ ୱାର୍ଲ୍ଡ ୨୦୨୨ ରେ ମଧ୍ୟ ଅଂଶଗ୍ରହଣ କରିଥିଲେ ଏବଂ ଟାଇଟଲ୍ ଜିତିଥିଲେ ।
ମିସେସ୍ ଓ୍ଵାଲ୍ଡ ପ୍ରତିଯୋଗୀତା ୧୯୮୪ରୁ ଆରମ୍ଭ ହୋଇଥିଲେ ସୁଦ୍ଧା ୧୯୮୮ରେ ମିସେସ୍ ଓ୍ଵାଲ୍ଡ ଭାବେ ନାମିତ ହୋଇଥିଲା । ଏହି ପ୍ରତିଯୋଗୀତାକୁ ୮୦ଟି ଦେଶରୁ ପ୍ରତିଯୋଗୀ ଭାଗ ନେଇଥାନ୍ତି । ଭାରତର ଡ. ଅଦିତି ଗୋବିତ୍ରିକର ୨୦୦୧ରେ ଏହି ମୁକୁଟ ପିନ୍ଧିଥିଲେ । ଏବେ ସେ ମିସେସ୍ ଇଣ୍ଡିଆର ବିଚାରକ ଭାବେ କାମ କରୁଛନ୍ତି ।