ଚୀନ; ଚୀନରେ ପୁଣିଥରେ ଘାତକ ହେଲାଣି କରୋନା ମହାମାରୀ । ଚଳିତଥର ପୂର୍ବର ସବୁ ରେକର୍ଡ ଭାଙ୍ଗିପାରେ କୋଭିଡ୍ । ଗ୍ଲୋବାଲ ହେଲ୍ଥ ଇଂଟେଲିଜେନ୍ସ ସଂସ୍ଥା ଏୟାରଫିନିଟିର ଆକଳନ ଅନୁଯାୟୀ ଏହି ଲହର ସପ୍ତାହକରେ ଶୀର୍ଷ ଛୁଇଁବ । ଚଳିତ ସପ୍ତାହରେ ଦିନକରେ ପ୍ରାୟ ୩ କୋଟି ୭୦ ଲକ୍ଷ ଲୋକ କୋଭିଡରେ ସଂକ୍ରମିତ ହୋଇଛନ୍ତି ।
ଗତ ୨୦ ଦିନରେ ୨୪ କୋଟିରୁ ଅଧିକ ଲୋକ ସଂକ୍ରମିତ ହୋଇଛନ୍ତି । ଡିସେମ୍ବରର ପ୍ରଥମ ୨୦ ଦିନରେ ୨୪୮ ନିୟୁତ ଲୋକ ତଥା ମୋଟ୍ ଜନସଂଖ୍ୟାର ୧୮ ପ୍ରତିଶତ ସଂକ୍ରମିତ ହୋଇଥିବା ଆଶଙ୍କା କରାଯାଉଛି । ଏହି ଅନୁମାନ ସତ ହେଲେ ଜାନୁଆରୀ ୨୦୨୩ରେ ଚୀନରେ ସଂକ୍ରମଣ ଓ ମୃତ୍ୟୁର ନୂଆ ରେକର୍ଡ ହେବ । ଏଥିସହିତ ଚୀନରେ ଚାଲିଥିବା ଲହର ଓ ଏବଂ ଜାନୁଆରୀରେ ଆସିବାକୁ ଥିବା ଲହର ବିଶ୍ୱରେ ସବୁ ରେକର୍ଡ ଭାଙ୍ଗିବ ବୋଲି କୁହାଯାଉଛି ।
ଚୀନରେ ଏବେ ଦୈନିକ ୧୦ ଲକ୍ଷ ଲୋକ ସଂକ୍ରମିତ ହେଉଛନ୍ତି । ଦୈନିକ ପ୍ରାୟ ୫ ହଜାର ଲୋକଙ୍କ ମୃତ୍ୟୁ ହେଉଛି । ସେପଟେ ଚୀନରେ ପୁଣି ଥରେ ଲାଗୁ ହେବ ଜିରୋ କୋଭିଡ ପଲିସି । ବେଜିଂରେ ବ୍ୟାପକ ମାତ୍ରାରେ ଲୋକେ କରୋନାରେ ସଂକ୍ରମିତ ହୋଇଛନ୍ତି । ଅନ୍ୟପଟେ ଚୀନରେ ଘାତକ ସାଜିଛି କୋଭିଡ୍ ଭୂତାଣୁ ଓମିକ୍ରନର ସବଭାରିଆଣ୍ଟ ବିଏଫ୍.୭ । ହେଲେ ଭାରତ ପାଇଁ ଏବେ ସୁଦ୍ଧା କୌଣସି ବିପଦ ନଥିବା ବିଶେଷଜ୍ଞ କହିଛନ୍ତି । ଏହି ବିଏଫ୍.୭ ଭାରତରେ କିଛି ମାସ ପୂର୍ବରୁ ଚିହ୍ନଟ ହୋଇଥିଲା । ହେଲେ ଏହା ଦ୍ୱାରା ସଂକ୍ରମଣ ବୃଦ୍ଧି ହୋଇନଥିଲା । ତେଣୁ ଚୀନ୍ ଭଳି ଭାରତର ସ୍ଥିତି ହେବା ଆଶଙ୍କା କମ୍ ବୋଲି ବିଶେଷଜ୍ଞ କହିଛନ୍ତି ।