ଭୁବନେଶ୍ବର: ରାଜସ୍ବ ବିଭାଗରେ ହାତଗୁଞ୍ଜା ଏଣିକି ଚଳିବନି। ଦୁର୍ନୀତି ବିରୋଧରେ ଶୂନ୍ୟ ସହନଶୀଳତା ନୀତି ଗ୍ରହଣ କରାଯିବ। ଯିଏ ଏହାର ଉଲ୍ଲଂଘନ କରିବେ, ସେମାନଙ୍କକ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଆଜି ରାଜସ୍ବ ବିଭାଗ ଦାୟିତ୍ବ ନେଉ ନେଉ ଏଭଳି କଡା କଡା କଥା କହିଛନ୍ତି ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ।
ଆଜି ବିଭାଗର କାର୍ଯ୍ୟ ସମୀକ୍ଷା କରିବା ଅବସରରେ ମନ୍ତ୍ରୀ କହିଥିଲେ ଯେ ବିଭାଗର କାମ ତ୍ବରିତ ବେଗରେ କରାଯିବ। ନିର୍ଦିଷ୍ଟ ସମୟ ସୀମା ଭିତରେ ସମସ୍ତଙ୍କୁ କାମ କରିବାକୁ ହେବ। ସାଧାରଣ ଲୋକ ଯେଭଳି ବିଭିନ୍ନ ପ୍ରମାଣ ପତ୍ର ପାଇଁ ଧାଡ଼ିରେ ଛିଡ଼ା ହେବେ ନାହିଁ, ତାହାକୁ ନିଶ୍ଚିତ କରିବାକୁ ହେବ।
ବିଭାଗ ରାଜସ୍ବ ବିପର୍ଯ୍ୟୟ ମୁକାବିଲା ଲାଗି ଅତ୍ୟାଧୁନିକ କୌଶଳର ସହଯୋଗ ନେବ ବୋଲି ସୂଚନା ଦେଇ ମନ୍ତ୍ରୀ କହିଥିଲେ ଯେ ଓଡ଼ିଶା ଭାରତବର୍ଷରେ ଯେଭଳି ସବୁକ୍ଷେତ୍ରରେ ଉଦାହରଣ ହେବ, ତାହା ହେଉଛି ମୁଖ୍ୟ ଫୋକସ୍। ୨୪ ଘଣ୍ଟା କାମ ହେବ ଓ ୩୬୫ ଦିନ କାମ ଚାଲିବ। ନା ଖାଉଙ୍ଗା, ନା ଖାନେ ଦୁଙ୍ଗା। ମୋଦୀଙ୍କ ଏହି ନୀତି ଆଧାରରେ ରାଜସ୍ବ ବିଭାଗରେ କାର୍ଯ୍ୟ ଚାଲିବ ବୋଲି ମନ୍ତ୍ରୀ କହିଥିଲେ।