ତାମିଲନାଡୁ: ସରକାରଙ୍କ ହାତକୁ ଗଲା ତାମିଲନାଡୁ ପୂର୍ବତନ ମୁଖ୍ୟମନ୍ତ୍ରୀ ଜୟଲଳିତାଙ୍କ ସମ୍ପତ୍ତି। ସମସ୍ତ ସ୍ଥାବର ଅସ୍ଥାବର ସମ୍ପତ୍ତି ଏବେ ରାଜ୍ୟ ସରକାରଙ୍କ ମାଲିକାନାକୁ ଯାଇଛି। ସେଥି ମଧ୍ୟରେ ରହିଛି ୨୭ କିଲୋଗ୍ରାମ ଓଜନର ସୁନା ତଲୱାର, ହାତ ଘଣ୍ଟା, କଲମ ସମେତ ୧୬୦ଟି ଅନ୍ୟାନ୍ୟ ସାମଗ୍ରୀ। ପୂର୍ବରୁ ଯାଞ୍ଚବେଳେ ଏସବୁକୁ ଜବତ କରିଥିଲା ତଦନ୍ତକାରୀ ସଂସ୍ଥା।
ପୂର୍ବତନ ତାମିଲନାଡୁ ମୁଖ୍ୟମନ୍ତ୍ରୀ ଜେ. ଜୟଲଳିତାଙ୍କ ଆୟ ବହିର୍ଭୂତ ସମ୍ପତ୍ତି ମାମଲାରେ ଜବତ ହୋଇଥିବା ଜିନିଷପତ୍ର ରାଜ୍ୟ ସରକାରଙ୍କୁ ଆନୁଷ୍ଠାନିକ ଭାବରେ ହସ୍ତାନ୍ତର କରାଯାଇଛି। କର୍ଣ୍ଣାଟକ କର୍ତ୍ତୃପକ୍ଷଙ୍କ ହେପାଜତରେ ଥିବା ଜବତ ସମ୍ପତ୍ତିରେ ୨୭ କିଲୋ ୫୫୮ ଗ୍ରାମ ସୁନା ଅଳଙ୍କାର, ୧,୧୧୬ କିଲୋ ରୁପା ଏବଂ ୧,୫୨୬ ଏକର ଜମି ସହିତ ଜଡିତ କାଗଜପତ୍ର ଅନ୍ତର୍ଭୁକ୍ତ। ଏହି ମୂଲ୍ୟବାନ ଜିନିଷପତ୍ର କର୍ଣ୍ଣାଟକ ବିଧାନ ସୌଧ କୋଷାଗାରରେ ସଂରକ୍ଷିତ ଥିଲା କୋର୍ଟ ଏବଂ ସରକାରୀ ଅଧିକାରୀଙ୍କ ଉପସ୍ଥିତିରେ ବିଧିବଦ୍ଧ ଭାବେ ହସ୍ତାନ୍ତର କରାଯାଇଥିଲା।
୨୭ ସେପ୍ଟେମ୍ବର ୨୦୧୪ରେ ବେଙ୍ଗାଲୁରୁର ଏକ ସ୍ୱତନ୍ତ୍ର କୋର୍ଟ ଆୟ ବର୍ହିଭୂତ ସମ୍ପତ୍ତି ମାମଲାରେ ଜୟଲଳିତାଙ୍କୁ ୪ବର୍ଷ ଜେଲଦଣ୍ଡ ଏବଂ ୧୦୦ କୋଟି ଟଙ୍କା ଜରିମାନା ଦଣ୍ଡାଦେଶ କରିଥିଲେ। ଏହାର କିଛି ଦିନ ପରେ ଦୀର୍ଘ ଦିନର ଅସୁସ୍ଥତା କାରଣରୁ ୫ ଡିସେମ୍ବର ୨୦୧୬ରେ ମୃତ୍ୟୁବରଣ କରିଥିଲେ। ଜୟଲଳିତାଙ୍କ ଜିନିଷପତ୍ର ନଷ୍ଟ କରିବା ପାଇଁ ନିଆଯାଇଥିବା ପଦକ୍ଷେପ ବିଷୟରେ ସୂଚନା ପାଇବା ପାଇଁ ସୂଚନା ଅଧିକାର କର୍ମୀ ନରସିଂହ ମୂର୍ତ୍ତି କୋର୍ଟରେ ଏକ ଆବେଦନ କରିଥିଲେ।