ନୂଆଦିଲ୍ଲୀ: ଶିଶୁ ଚାଲାଣ ମାମଲା ଉପରେ ସୁପ୍ରିମକୋର୍ଟ ଏକ ବଡ଼ ନିଷ୍ପତ୍ତି ଦେଇଛନ୍ତି। ନବଜାତ ଶିଶୁ ଚୋରି ସହ ଜଡିତ ମାମଲା ଉପରେ ରାଜ୍ୟ ସରକାରମାନେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ ବୋଲି କୋର୍ଟ କହିଛନ୍ତି। ପ୍ରଥମତଃ, ଯେଉଁ ହସ୍ପିଟାଲରୁ ନବଜାତ ଶିଶୁ ଚୋରି ହୁଏ, ସେହି ହସ୍ପିଟାଲର ଲାଇସେନ୍ସ ବାତିଲ କରାଯିବା ଉଚିତ।
ବାରାଣସୀ ଏବଂ ଆଖପାଖର ଡାକ୍ତରଖାନାଗୁଡ଼ିକରେ ଶିଶୁ ଚୋରି ମାମଲାରେ ଅଭିଯୁକ୍ତମାନଙ୍କୁ ଆହ୍ଲାବାଦ ହାଇକୋର୍ଟ ଗତବର୍ଷ ଜାମିନ ପ୍ରଦାନ କରିବା ମାମଲାରେ ଶୁଣାଣି କରି ଜଷ୍ଟିସ୍ ଜେବି ପାରଦିଓ୍ବାଲା ଏବଂ ଆର୍ ମହାଦେବନଙ୍କ ଏକ ଖଣ୍ଡପୀଠ ଆହ୍ଲାବାଦ କୋର୍ଟ ଉପରେ ବର୍ଷିବା ସହ ୟୁପି ସରକାରଙ୍କୁ ମଧ୍ୟ ତାଗିଦ୍ କରିଛନ୍ତି । ଯାହାକୁ ନେଇ ଚୋରି ହୋଇଥିବା ଶିଶୁମାନଙ୍କ ପରିବାର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
ଏକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇ କୋର୍ଟ କହିଛନ୍ତି ଯେ ଯଦି ଜଣେ ମହିଳା ଶିଶୁ ଜନ୍ମ ଦେବାକୁ ହସ୍ପିଟାଲକୁ ଆସନ୍ତି ଏବଂ ସେଠାରୁ ନବଜାତ ଶିଶୁ ଚୋରି ହୋଇଯାଏ, ତେବେ ସର୍ବପ୍ରଥମେ ସରକାର ହସ୍ପିଟାଲର ଲାଇସେନ୍ସ ବାତିଲ କରିବା ଉଚିତ। ଏହା କିଛି ପରିମାଣରେ ପିଲା ଚୋରି ଘଟଣା ନିୟନ୍ତ୍ରଣ କରିବାରେ ସାହାଯ୍ୟ କରିବ। କୋର୍ଟ ସମସ୍ତ ମାତାପିତାଙ୍କୁ ହସ୍ପିଟାଲରେ ନବଜାତ ଶିଶୁଙ୍କ ସୁରକ୍ଷା ପ୍ରତି ଅଧିକ ଯତ୍ନବାନ ହେବାକୁ ପରାମର୍ଶ ଦେଇଛନ୍ତି। ସୁପ୍ରିମକୋର୍ଟ ସମସ୍ତ ହାଇକୋର୍ଟକୁ ଶିଶୁ ଚାଲାଣ ମାମଲାଗୁଡ଼ିକର ବିବରଣୀ ନେବାକୁ ଏବଂ ୬ମାସ ମଧ୍ୟରେ ସେଗୁଡ଼ିକର ସମାଧାନ କରିବାକୁ ଟ୍ରାଏଲ କୋର୍ଟଗୁଡ଼ିକୁ ନିର୍ଦ୍ଦେଶ ଦେବାକୁ କହିଛନ୍ତି।
କୋର୍ଟ ଏକ ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇ କହିଛନ୍ତି, ‘ଯଦି ଜଣେ ମାତାପିତାଙ୍କ ନବଜାତ ଶିଶୁର ମୃତ୍ୟୁ ହୁଏ, ତେବେ ସେମାନେ ଦୁଃଖ ଅନୁଭବ କରନ୍ତି।’ ସେମାନେ ଭାବନ୍ତି ଯେ ପିଲାଟି ଭଗବାନଙ୍କ ପାଖକୁ ଫେରିଯାଇଛି, କିନ୍ତୁ ଯଦି ସେମାନଙ୍କର ନବଜାତ ପିଲାଟି ଚୋରି ହୋଇଯାଏ, ତେବେ ସେମାନଙ୍କର ଦୁଃଖ କଳ୍ପନା କରାଯାଇପାରିବ ନାହିଁ କାରଣ ବର୍ତ୍ତମାନ ସେମାନଙ୍କ ପିଲାଟି ଏକ ଅଜଣା ଦଳ ସହିତ ଅଛି।
ଏହି ଗ୍ୟାଙ୍ଗରୁ ପିଲା କିଣିଥିବା ଲୋକଙ୍କ ଜାମିନ ମଧ୍ୟ ସୁପ୍ରିମକୋର୍ଟ ବାତିଲ କରିଛନ୍ତି। କୋର୍ଟ କହିଛନ୍ତି ଯେ ଯଦି କେହି ନିଃସନ୍ତାନ, ତେବେ ଅନ୍ୟ କାହାର ସନ୍ତାନ କିଣିବା ହିଁ ସନ୍ତାନ ପାଇବାର ଏକମାତ୍ର ଉପାୟ ହୋଇପାରିବ ନାହିଁ। ତାହା ମଧ୍ୟ ଜାଣି ଯେ ପିଲାଟି ଚୋରି ହୋଇଯାଇଛି।