ବେଙ୍ଗାଲୁରୁ: ଆରସିବିର ବିଜୟ ପରେ ୪ ଜୁନ୍ରେ ବେଙ୍ଗାଲୁରୁରେ ହୋଇଥିବା ଦଳାଚକଟାକୁ ନେଇ କର୍ଣ୍ଣାଟକ ସରକାର ଆରସିବି ସହ ବିରାଟ କୋହଲିଙ୍କୁ ଦାୟୀ କରିବା ସହ ଏନେଇ ଏକ ରିପୋର୍ଟ ହାଇକୋର୍ଟଙ୍କୁ ପ୍ରଦାନ କରିଛନ୍ତି। ଏହି ରିପୋର୍ଟରେ ସରକାର ଦଳାଚକଟା ପାଇଁ ଆରସିବିକୁ ସମ୍ପୂର୍ଣ୍ଣ ଦାୟୀ କରିଛନ୍ତି। ଏଥିରେ ଦଳର ଅଭିଜ୍ଞ ଖେଳାଳି ଏବଂ ପୂର୍ବତନ ଅଧିନାୟକ ବିରାଟ କୋହଲିଙ୍କ ନାମ ମଧ୍ୟ ଉଲ୍ଲେଖ କରାଯାଇଛି। କର୍ନାଟକ ସରକାର କହିଛନ୍ତି ଯେ ବିଜୟ ଉତ୍ସବ ପାଇଁ ଆରସିବି ଅନୁମତି ନେଇ ନ ଥିଲା।
ଆଇପିଏଲ୍ ୨୦୨୫ର ବିଜୟର ମୁକୁଟ ଚଳିତ ବର୍ଷ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଫାଇନାଲରେ ପଞ୍ଜାବ କିଙ୍ଗସ୍କୁ ହରାଇ ନିଜ ନାମରେ କରିଛି। ବେଙ୍ଗାଲୁରୁର ଏମ ଚିନ୍ନାସ୍ୱାମୀ ଷ୍ଟାଡିୟମରେ ବିଜୟକୁ ପାଳନ କରିବା ପାଇଁ ଏକ କାର୍ଯ୍ୟକ୍ରମ ଆୟୋଜନ କରାଯାଇଥିଲା, ଯେଉଁଥିରେ କର୍ଣ୍ଣାଟକର ଉପମୁଖ୍ୟମନ୍ତ୍ରୀ ମଧ୍ୟ ଯୋଗ ଦେଇଥିଲେ।
ସେହି ସମୟରେ ଷ୍ଟାଡିୟମ ବାହାରେ ପ୍ରଶଂସକମାନେ ଏତେ ସଂଖ୍ୟାରେ ଏକାଠି ହୋଇଥିଲେ ଯେ ଦଳାଚକଟା ହୋଇଥିଲା ଏବଂ ୧୧ ଜଣଙ୍କର ଜୀବନ ଯାଇଥିଲା। ଏହା ବ୍ୟତୀତ ୫୦ ରୁ ଅଧିକ ଲୋକ ଆହତ ହୋଇଥିଲେ। ଜୁନ ୪ ତାରିଖରେ ଚିନ୍ନାସ୍ବାମୀ ଷ୍ଟାଡିୟମ ବାହାରେ ଦଳାଚକଟା ପାଇଁ କେନ୍ଦ୍ରୀୟ ପ୍ରଶାସନିକ ଟ୍ରିବ୍ୟୁନାଲ ଆରସିବିକୁ ଦାୟୀ କରିଥିଲେ। ଆରସିବି ହଠାତ୍ ପୋଲିସ ଅନୁମତି ବିନା ସୋସିଆଲ ମିଡିଆରେ ବିଜୟ ପରେଡ ଆୟୋଜନ କରିବାକୁ ଘୋଷଣା କରିଥିଲା, ଯାହା ଯୋଗୁ ଲକ୍ଷ ଲକ୍ଷ ଲୋକ ଷ୍ଟାଡିୟମ ବାହାରେ ଜମା ହୋଇଥିଲେ। ଆଶାଠାରୁ ଅଧିକ ଲୋକ କାର୍ଯ୍ୟକ୍ରମରେ ପହଞ୍ଚିଥିଲେ। ପୁଲିସ ଏତେ ଭିଡ଼କୁ ନିୟନ୍ତ୍ରଣ କରିବାକୁ ପ୍ରସ୍ତୁତ ନଥିଲା। ସେହି ସମୟରେ, ଆୟୋଜକମାନେ ଷ୍ଟାଡିୟମରେ ପ୍ରବେଶ ପାଇଁ ପାସ୍ ବିଷୟରେ ସୂଚନା ଦେବା ପରେ ଦ୍ୱନ୍ଦ୍ୱ ସୃଷ୍ଟି ହୋଇଥିଲା। ଏହା ବ୍ୟତୀତ, ଗେଟ୍ ବିଳମ୍ବରେ ଖୋଲିବା ଯୋଗୁଁ ମଧ୍ୟ ଦୁର୍ଘଟଣା ଘଟିଥିଲା।
କୋହଲି ଦଳର ଜଣେ ଅଭିଜ୍ଞ ଖେଳାଳି ଏବଂ ସେ ଆରସିବିର ଚେହେରା ମଧ୍ୟ। ସରକାର ହାଇକୋର୍ଟରେ ଦାଖଲ କରିଥିବା ରିପୋର୍ଟରେ କୋହଲିଙ୍କ ନାମ ଉଲ୍ଲେଖ କରାଯାଇଛି। ସରକାର କହିଛନ୍ତି ଯେ, ଆରସିବି ସାର୍ବଜନୀନ କାର୍ଯ୍ୟକ୍ରମର ପ୍ରଚାର ପାଇଁ ଜୁନ ୪ ତାରିଖରେ ସୋସିଆଲ ମିଡିଆରେ ବିରାଟ କୋହଲିଙ୍କ ଏକ ଭିଡିଓ ଶେୟାର କରିଥିଲା। କୋହଲି ଭିଡିଓ ମାଧ୍ୟମରେ ପ୍ରଶଂସକମାନଙ୍କୁ କାର୍ଯ୍ୟକ୍ରମରେ ମାଗଣାରେ ଯୋଗଦେବାକୁ ଅନୁରୋଧ କରିଥିଲେ। ସରକାରୀ ରିପୋର୍ଟରେ କୁହାଯାଇଛି ଯେ ଆରସିବି କେବଳ ବିଜୟ ପରେଡ୍ ବିଷୟରେ ସୂଚନା ଦେଇଥିଲା, ଏଥିପାଇଁ କୌଣସି ଅନୁମତି ନିଆଯାଇ ନଥିଲା। ଏପରି କାର୍ଯ୍ୟକ୍ରମ ପାଇଁ ଅତି କମରେ ଗୋଟିଏ ସପ୍ତାହ ପୂର୍ବରୁ ଅନୁମତି ନିଆଯାଏ।