ନୂଆଦିଲ୍ଲୀ: ପୁଣି ମନୋରଞ୍ଜନ ଇଣ୍ଡଷ୍ଟ୍ରିରୁ ଆସିଲା ଦୁଃଖଦ ଖବର। ଦୁନିଆକୁ ଅଲବିଦା କହିଲେ “ଫକୀର” ନାମରେ ଜଣାଶୁଣା ଗାୟକ ତଥା ଅଭିନେତା ଋଷଭ ଟଣ୍ଡନ । ଦିଲ୍ଲୀରେ ହୃଦଘାତରେ ଆଖି ବୁଜିଛନ୍ତି ଗାୟକ। ମୃତ୍ୟୁ ବେଳକୁ ତାଙ୍କୁ ମାତ୍ର ୩୫ ବର୍ଷ ହୋଇଥିଲା।
ସୂଚନା ଅନୁଯାୟୀ, ଋଷଭ ଟଣ୍ଡନ ତାଙ୍କ ପରିବାରକୁ ଭେଟିବା ପାଇଁ ଦିଲ୍ଲୀ ଯାଇଥିଲେ ଏବଂ ଗତକାଲି ରାତିରେ ତାଙ୍କର ଦିଲ୍ଲୀସ୍ଥିତ ତାଙ୍କ ଘରେ ମୃତ୍ୟୁ ହୋଇଥିଲା। କହିରଖୁଛୁ କି, ଋଷଭଙ୍କ ଦେହାନ୍ତ ପୂର୍ବରୁ କାମ କରିଥିବା ତାଙ୍କର ଅନେକ ଗୀତ ରିଲିଜ ହୋଇନାହିଁ। ତେବେ ତାଙ୍କ ଦେହାନ୍ତରେ ପରିବାର ଏବଂ ଫ୍ୟାନ୍ସଙ୍କ ମହଲରେ ଶୋକର ଛାୟା ଖେଳିଯାଇଛି। ସୋସିଆଲ ମିଡିଆରେ ସମସ୍ତେ ତାଙ୍କୁ ଭାବପ୍ରବଣ ଶ୍ରଦ୍ଧାଞ୍ଜଳି ଦେଉଛନ୍ତି । ଋଷଭ ଟଣ୍ଡନଙ୍କ ହଠାତ୍ ଦେହାନ୍ତରେ ସଂଗୀତ ଏବଂ ଚଳଚ୍ଚିତ୍ର ଜଗତ ମର୍ମାହତ। ରିଷଭ ‘ଏ ଆଶିକୀ’ ଏବଂ ‘ଇସ୍କ ଫକିରାନା’ ଭଳି ଗୀତଗୁଡ଼ିକ ମାଧ୍ୟମରେ ଲୋକପ୍ରିୟତା ହାସଲ କରିଥିଲେ। ତାଙ୍କ ପ୍ରଶଂସକମାନେ ସ୍ତବ୍ଧ ଅଛନ୍ତି। ରିଷଭ ମୁମ୍ବାଇରେ ତାଙ୍କ ପତ୍ନୀ ଓଲେସିଆ ନେଡୋବେଗୋଭାଙ୍କ ସହ ରହୁଥିଲେ। ରିଷଭ ଏବଂ ଓଲେସିଆ ୨୦୧୯ ମସିହାରେ ବିବାହ ବନ୍ଧନରେ ଆବଦ୍ଧ ହୋଇଥିଲେ। କିଛି ଦିନ ପୂର୍ବେ ଉଭୟେ ଏକାଠି କରବାଚୌଥ ପର୍ବ ପାଳନ କରିଥିଲେ।
ଫକିର ନାମରେ ଜଣାଶୁଣା ରିଷଭ ଟଣ୍ଡନ ତାଙ୍କର ନମ୍ର ସ୍ୱଭାବ ପାଇଁ ଜଣାଶୁଣା ଥିଲେ। ଜଣେ ଅଭିନେତା ହେବା ସହ ସେ ଜଣେ ଗାୟକ ଏବଂ ସଂଗୀତକାର ମଧ୍ୟ ଥିଲେ। ଋଷଭ ଜଣେ ଗାୟକ ଭାବରେ ତାଙ୍କର କ୍ୟାରିଅର ଆରମ୍ଭ କରିଥିଲେ ଏବଂ ପରେ ଅଭିନୟ କ୍ଷେତ୍ରରେ ପ୍ରବେଶ କରିଥିଲେ। ତାଙ୍କର ସଂଗୀତ ଯୁବପିଢ଼ିଙ୍କ ମଧ୍ୟରେ ଅତ୍ୟନ୍ତ ଲୋକପ୍ରିୟ। ୧୦ ମାସ ପୂର୍ବେ ମୁକ୍ତିଲାଭ କରିଥିବା ତାଙ୍କର ଗୀତ “ଇସ୍କ ଫକିରାନା” ଇତିହାସ ସୃଷ୍ଟି କରିଥିଲା ଏବଂ ଆଜି ପର୍ଯ୍ୟନ୍ତ ଏକ ପ୍ରିୟ ହୋଇ ରହିଛି। ଏହି ଗୀତଟି ୟୁଟ୍ୟୁବରେ ୨ ନିୟୁତରୁ ଅଧିକ ଥର ଦେଖାଯାଇଛି। ସେ “ଫକୀର- ଲିଭିଂ ଲିମିଟଲେସ୍” ଏବଂ “ରାଶନା: ଦି ରେ ଅଫ୍ ଲାଇଟ୍” ଭଳି ଫିଲ୍ମରେ ଅଭିନୟ କରିଥିଲେ।