ଭୁବନେଶ୍ୱର: ଥଣ୍ଡା, କାଶ ଓ ଜ୍ୱର ସହିତ ନିଶ୍ୱାସ ନେବାରେ କଷ୍ଟ ଅନୁଭବ କରିବା ସମସ୍ୟା ନେଇ ୯ ମାସର ଶିଶୁ ପୁତ୍ରକୁ ତା’ର ପିତାମାତା ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ ଆଣ୍ଡ ସମ ହସ୍ପିଟାଲ୍ରେ ଚିକିତ୍ସା ନିମନ୍ତେ ଭର୍ତି କରାଇଥିଲେ।
ରାୟଗଡ଼ା ଜିଲ୍ଲା ନିବାସୀ ଅନୀଲ ପଲେଇ ଓ ତାଙ୍କ ପତ୍ନୀ ବର୍ଷା ପଲେଇଙ୍କ ୯ ମାସର ଶିଶୁ ପୁତ୍ର ଜନ୍ମ ହେବା ପର ଠାରୁ ହିଁ ଅନବରତ ଥଣ୍ଡା, କାଶ ଓ ଜ୍ୱରରେ ପୀଡ଼ିତ ରହୁଥିଲା। ଯାହା ଫଳରେ ଶିଶୁଟିକୁ ନିଃଶ୍ୱାସ ପ୍ରଶ୍ୱାସ ନେବାରେ ଅସୁବିଧା ଦେଖାଦେଇଥିଲା। ଉଭୟ ମାତା ପିତା ଶିଶୁ ପୁତ୍ରର ଚିକିତ୍ସା ନିମନ୍ତେ ବିଭିନ୍ନ ଡାକ୍ତରଖାନାରେ ଚିକିତ୍ସା କରାଇବା ସତ୍ୱେ ଶିଶୁର ସ୍ୱାସ୍ଥ୍ୟାବସ୍ଥାରେ କୌଣସି ଉନ୍ନତି ପରିଲକ୍ଷିତ ହୋଇ ନଥିଲା।
ଶେଷରେ ଶିଶୁଟିର ପିତାମାତା ସେପ୍ଟେମ୍ବର ୧୨ ତାରିଖ ଦିନ ଭୁବନେଶ୍ୱର ସ୍ଥିତ ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ରେ ଚିକିତ୍ସା ନିମନ୍ତେ ଭର୍ତି କରାଇଥିଲେ। ସ୍ୱାସ୍ଥ୍ୟ ସମସ୍ୟା ଜଟିଳ ଥିବା ଶିଶୁଟିର ହସ୍ପିଟାଲ୍ର ଶିଶୁ ରୋଗ ବିଭାଗର ମୁଖ୍ୟ ପ୍ରଫେସର ଡାକ୍ତର ମମତାଦେବୀ ମହାନ୍ତିଙ୍କ ତତ୍ୱାବଧାନରେ ଚିକିତ୍ସା ଆରମ୍ଭ କରାଯାଇଥିଲା । ଶିଶୁଟିକୁ ଅଧିକ ମାତ୍ରାରେ ନିମୋନିଆ ହୋଇଯାଇଥିବା ଯୋଗୁଁ ତାକୁ ଭେଂଟିଲେଟରରେ ରଖାଯାଇଥିଲା। ସମସ୍ତ ପ୍ରକାର ଚିକିତ୍ସା ସତ୍ୱେ ଶିଶୁଟିର ନିମୋନିଆ ଭଲ ହୋଇନଥିଲା ଯାହା ଫଳରେ ତାକୁ ଭେଂଟିଲେଟରରୁ ବାହାର ମଧ୍ୟ କରାଯାଇ ପାରୁ ନଥିଲା । ଶିଶୁର ଇକୋ ନର୍ମାଲ ଥିବା ସତ୍ୱେ ତାକୁ ୧୫ ଦିନ ଭେଂଟିଲେଟରରେ ରଖାଯାଇଥିଲା।
ଏଭଳି ଜଟିଳ ସମସ୍ୟାରେ ପୀଡ଼ିତ ଥିବା ଶିଶୁଟିକୁ ହସ୍ପିଟାଲ୍ର ସିଟିଭିଏସ୍ (କାର୍ଡିଆକ୍ ସର୍ଜନ) ଡାକ୍ତର ସଂଗ୍ରାମ କେଶରୀ ବେହେରାଙ୍କ ତତ୍ୱାବଧାନରେ ଚିକିତ୍ସା କରାଯିବା ସହ ବିଭିନ୍ନ ପ୍ରକାରର ସ୍ୱାସ୍ଥ୍ୟ ପରୀକ୍ଷା କରାଯାଇଥିଲା । ସିଟି ସ୍କାନ ରିପୋର୍ଟରେ ଶିଶୁଟି ଡବଲ୍ ଆଓର୍ଟିକ୍ ଆର୍ଚ ସମସ୍ୟାରେ ପୀଡ଼ିତ ଥିବା ଜଣାପଡ଼ିଥିଲା। ସେହି କାରଣରୁ ଶିଶୁଟି ନିଶ୍ୱାସ ପ୍ରଶ୍ୱାସର କଷ୍ଟ ଅନୁଭବ କରିବା ସହ ଭେଂଟିଲେଟରର ଆବଶ୍ୟକତା ପଡ଼ିଥିଲା ବୋଲି ଡାକ୍ତର ବେହେରା କହିଥିଲେ।
ଶିଶୁର ଛାତିରେ ଏକ ଭାସ୍କୁଲାର ରିଙ୍ଗ୍ ଦେଖାଯାଇଥିବା ଫଳରେ ଏହା ନିଶ୍ୱାସ ନଳୀ ଏବଂ ଖାଦ୍ୟ ନଳୀକୁ ଚାପି ରଖିଥିଲା । ଏହାର ଏକମାତ୍ର ଚିକିତ୍ସା ହେଉଛି ଅସ୍ତ୍ରୋପଚାର । ଶିଶୁର ପିତାମାତାଙ୍କ ପରାମର୍ଶ କ୍ରମେ ଅସ୍ତ୍ରୋପଚାର କରାଯାଇଥିଲା ବୋଲି ଡାକ୍ତର ବେହେରା କହିଥିଲେ।
ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ର ମେଡିକାଲ୍ ସୁପରିଟେଣ୍ଡେଂଟ ପ୍ରଫେସର (ଡାକ୍ତର) ପୁଷ୍ପରାଜ ସାମନ୍ତସିଂହାର କହିଥିଲେ ଯେ ଶିଶୁକୁ ଚାରି ମାସ ବୟସରୁ ବାରମ୍ବାର କାଶ ଓ କଫ ହେଉଥିଲା। ଡବଲ ଆଓର୍ଟିକ ଆର୍ଚ ସମସ୍ୟା ଏକ ବିରଳ ବ୍ୟାଧି ଯାହାକି ଏକ ଲକ୍ଷ ଶିଶୁଙ୍କ ମଧ୍ୟରେ ୫ ଜଣକ ଠାରେ ଦେଖାଯାଏ। ଏଭଳି ବିରଳ ଅସ୍ତ୍ରୋପଚାର ପ୍ରଥମ ଥର ଓଡ଼ିଶା ଏବଂ ସମ୍ ହସ୍ପିଟାଲ୍ରେ ସଫଳ ଭାବେ ସମ୍ପାଦନ କରାଯାଇଥିବା ପ୍ରଫେସର ସାମନ୍ତସିଂହାର କହିଥିଲେ।
ସିଟିଭିଏସ୍ ସର୍ଜନ ଡାକ୍ତର ବେହେରା ଏବଂ କାର୍ଡିଆକ୍ ଆନେସ୍ଥେସିଆ ବିଭାଗର ଡାକ୍ତରଙ୍କ ଦ୍ୱାରା ଏହି ଜଟିଳ ଅସ୍ତ୍ରୋପଚାର କରାଯାଇଥିଲା। ଶିଶୁର ପୋଷ୍ଟ ଅପରେଟିଭ କେୟାର ଭଲ ଭାବରେ ପେଡିଆଟ୍ରିକ ଆଇସିୟୁ ଟିମ୍, ଡାକ୍ତର ଏବଂ ନର୍ସମାନଙ୍କ ଦ୍ୱାରା ନିଆଯାଇଥିଲା। ଅସ୍ତ୍ରୋପଚାର ପରେ ଶିଶୁଟି ବର୍ତମାନ ସୁସ୍ଥ ଥିବା ଜଣାପଡ଼ିଛି।
ଏହି ଅସ୍ତ୍ରୋପଚାରରେ ଡାକ୍ତର ବେହେରାଙ୍କ ବ୍ୟତୀତ ପେଡିଆଟ୍ରିକ୍ ଆଇସିୟୁର ମୁଖ୍ୟ ଡାକ୍ତର ଦେବସ୍ମିତା ରଥ, ପେଡିଆଟ୍ରିକ୍ ଆଇସିୟୁ ଟିମ୍ (ଡାକ୍ତର ସାଗର ଓ ଡାକ୍ତର ଅପର୍ଣ୍ଣା), ଶିଶୁରୋଗ ବିଭାଗର ମୁଖ୍ୟ ଡାକ୍ତର ମମତାଦେବୀ ମହାନ୍ତି, ପେଡିଆଟ୍ରିକ୍ କାର୍ଡିଓଲୋଜିଷ୍ଟ ଡାକ୍ତର ଅନୁସ୍ପନ୍ଦନା ମହାପାତ୍ର, ନର୍ସିଂ ଷ୍ଟାଫ୍ ଏବଂ ଅନ୍ୟାନ୍ୟ କର୍ମଚାରୀ ସାମିଲ ଥିଲେ । ଏହି ଅସ୍ତ୍ରୋପଚାର ପରେ ଶିଶୁର ପିତାମାତାଙ୍କ ସମେତ ତାଙ୍କ ପରିବାରବର୍ଗ ଓ ସମ୍ ହସ୍ପିଟାଲ୍କୁ ଧନ୍ୟବାଦ ଜଣାଇଛନ୍ତି।