ଭୁବନେଶ୍ବର: କଂଗ୍ରେସରୁ ବହିଷ୍କୃତ ହୋଇଥିବା ବାରବାଟୀ-କଟକର ପୂର୍ବତନ ବିଧାୟକ ମହମ୍ମଦ ମୋକିମ୍ ତାଙ୍କ ନୂଆ ରାଜନୈତିକ ଦଳର ନାଁ ନେଇ ମଙ୍ଗଳବାର ଦିନ ସୂଚନା ଦେଇଛନ୍ତି। ମହମ୍ମଦ ମୋକିମ ନୂଆ ଆଞ୍ଚଳିକ ଦଳ ଗଠନ କରିବା ପୂର୍ବରୁ ତା’ର ନାଁକୁ ନେଇ ଆରମ୍ଭ ହୋଇଯାଇଛି ଚର୍ଚ୍ଚା।
ମୋକିମ କହିଛନ୍ତି ଯେ ସେ ବିଭିନ୍ନ ପର୍ଯ୍ୟାୟରେ ବିଭିନ୍ନ ବ୍ୟକ୍ତିଙ୍କ ସହିତ ଆଲୋଚନା ଜାରି ରହିଛି। ମାର୍ଚ୍ଚ ଶେଷ ସପ୍ତାହରେ ନୂଆ ଦଳ ଘୋଷଣା କରାଯିବ ବୋଲି ପୂର୍ବରୁ କୁହାଯାଇଛି। ଓଡ଼ିଶାର ନାଁକୁ ନେଇ ଆଞ୍ଚଳିକ ଦଳ ଗଠନ କରାଯିବ। ଧର୍ମନିରପେକ୍ଷ ଚିନ୍ତାଧାରା ସହିତ ଥିବାରୁ ଦଳର ନାଁରେ କଂଗ୍ରେସକୁ ବି ରଖାଯିବ। ଦଳର ନାଁ ‘ଓଡ଼ିଶା ଜନତା କଂଗ୍ରେସ’ ରଖିବୁ କି ‘ଓଡ଼ିଶା ଲୋକ କଂଗ୍ରେସ’ ରଖିବୁ, ସେ ନେଇ ଆଲୋଚନା ଚାଲିଛି। ଏନେଇ କିଛି ଚୂଡ଼ାନ୍ତ ହୋଇନାହିଁ। ଏପରିକି ସେ ଓଡ଼ିଶା ଉପରେ କେନ୍ଦ୍ରିତ ଏକ ଆଞ୍ଚଳିକ ଦଳ ଗଠନ କରିବାକୁ ଆଗକୁ ବଢ଼ୁଛନ୍ତି। ଆଲୋଚନା ଏବଂ ଭିତ୍ତିଭୂମି ଏବେ ଏକ ନିର୍ଣ୍ଣାୟକ ପର୍ଯ୍ୟାୟରେ ପହଞ୍ଚିଛି ବୋଲି ପ୍ରକାଶ କରିଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ, “ଆମେ ମାର୍ଚ୍ଚ ଶେଷ ସୁଦ୍ଧା ରାଜ୍ୟବାସୀଙ୍କ ସହିତ ସମସ୍ତ ବିବରଣୀ ସେୟାର କରିବୁ। ଆମେ ଆମର ସମର୍ଥକ ଏବଂ ଶୁଭେଚ୍ଛୁମାନଙ୍କ ସହିତ ପରାମର୍ଶ କରିଛୁ। ପ୍ରସ୍ତାବିତ ଦୁଇଟି ନାମ ମଧ୍ୟରୁ ଗୋଟିଏ ଚୟନ କରାଯିବ ଏବଂ ପରେ ଆନୁଷ୍ଠାନିକ ଭାବରେ ପଞ୍ଜୀକୃତ କରାଯିବ” ବୋଲି ସେ ଏକ ଗଣମାଧ୍ୟମରେ ପ୍ରକାଶ କରିଛନ୍ତି।
ମୋକିମ୍ ସ୍ପଷ୍ଟ କରିଛନ୍ତି ଯେ ଦଳ ଜାତୀୟ ଦଳ ସହିତ ମେଣ୍ଟ କରିବ ନାହିଁ ବରଂ ଧର୍ମନିରପେକ୍ଷ ମୂଲ୍ୟବୋଧ ବଜାୟ ରଖି ଓଡ଼ିଶାର ନିର୍ଦ୍ଦିଷ୍ଟ ପ୍ରସଙ୍ଗଗୁଡ଼ିକୁ ସମର୍ଥନ କରିବ। “ଦଳ କଂଗ୍ରେସ ଚିନ୍ତାଧାରାରେ ମୂଳ ରହିବ ଏବଂ ଯୁବପିଢ଼ିଙ୍କୁ ଏକ ‘ପ୍ଲାଟଫର୍ମ’ ପ୍ରଦାନ କରିବ”।