ନୂଆଦିଲ୍ଲୀ: ଏଣିକି କେନ୍ଦ୍ର କ୍ୟାବିନେଟ୍ ବୈଠକଗୁଡ଼ିକ ସେବାତୀର୍ଥରେ ଅନୁଷ୍ଠିତ ହେବ ବୋଲି ସୂଚନା ଓ ପ୍ରସାରଣ ମନ୍ତ୍ରୀ ଅଶ୍ୱିନୀ ବୈଷ୍ଣବ ସୂଚନା ଦେଇଛନ୍ତି। ଗଣମାଧ୍ୟମକୁ ସମ୍ବୋଧନ କରି ସେ କହିଛନ୍ତି ଯେ, ସାଉଥ ବ୍ଲକରେ ଶେଷ କ୍ୟାବିନେଟ୍ ବୈଠକ ଅନୁଷ୍ଠିତ ହୋଇଥିଲା ଏବଂ ଏଥିରେ ଏକ ସଂକଳ୍ପ ଗୃହୀତ ହୋଇଛି। ତତ୍କାଳୀନ ବ୍ରିଟିଶ ଶାସନକାଳୀନ ସମୟରେ ଭାରତୀୟଙ୍କୁ ଦାସତ୍ୱର ଶୃଙ୍ଖଳରେ ବାନ୍ଧି ରଖିବା ପାଇଁ ସାଉଥ୍ ବ୍ଲକ୍ ଏବଂ ନର୍ଥ ବ୍ଲକର ନିର୍ମାଣ କରାଯାଇଥିଲା। ସ୍ୱାଧୀନତା ପରେ ସାଉଥ୍ ବ୍ଲକରେ ଅନେକ ଐତିହାସିକ ଓ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗ୍ରହଣ କରାଯାଇଛି।
ମନ୍ତ୍ରୀ କହିଛନ୍ତି, ଡିଜିଟାଲ୍ ଇଣ୍ଡିଆ ଓ ଜିଏସ୍ଟି ପରି ସଂସ୍କାରମୂଳକ ପଦକ୍ଷେପ ଦେଶରେ ସର୍ବନିମ୍ନ ସରକାର-ସର୍ବାଧିକ ଶାସନ ଧାରଣାକୁ ପ୍ରେରଣା ଦେଇଆସିଛି। ସେହିପରି ସର୍ଜିକାଲ୍ ଷ୍ଟ୍ରାଇକ୍ ଓ ଅପରେସନ ସିନ୍ଦୂର ପରି ଗୁରୁତ୍ୱପୂର୍ଣ୍ଣ ନିଷ୍ପତ୍ତିମାନେ ମଧ୍ୟ ସାଉଥ୍ ବ୍ଲକର ଗ୍ରହଣ କରାଯାଇଥିବା ସେ ଉଲ୍ଲେଖ କରିଛନ୍ତି। ଆଗାମୀ ଦିନରେ ଉତ୍ତର ଓ ଦକ୍ଷିଣ ବ୍ଲକ୍ ‘ଯୁଗଯୁଗୀନ ଭାରତ’ ସଂଗ୍ରହାଳୟର ଅଂଶ ଭାବେ ରହିବ ବୋଲି ସେ କହିଛନ୍ତି।