ଓଡ଼ିଶାରେ ସାମୁଦ୍ରିକ ବନ୍ଦର ଓ ଜଳପଥ ବିକାଶକୁ ବଜେଟ୍‌ରେ ଗୁରୁତ୍ୱ

ଭୁବନେଶ୍ବର: ଓଡ଼ିଶାରେ ସାମୁଦ୍ରିକ ବନ୍ଦର ଓ ଜଳପଥ ବିକାଶକୁ ବଜେଟ୍‌ରେ ବିଶେଷ ଗୁରୁତ୍ୱ ଦିଆଯାଇଛି। କେନ୍ଦ୍ରାପଡ଼ାରେ ଏକ ଜାତୀୟ ବୃହତ୍ ଜାହାଜ ନିର୍ମାଣ କ୍ଲଷ୍ଟର ସ୍ଥାପନ କରାଯିବାକୁ ଯୋଜନା ହୋଇଛି ଏବଂ ଏହି ପ୍ରକଳ୍ପ ପାଇଁ ୨୨ ହଜାର ୭ ଶହ କୋଟି ଟଙ୍କା ବିନିଯୋଗ କରାଯିବ। ଏଥିରେ ଓଡ଼ିଶା ସାମୁଦ୍ରିକ ବୋର୍ଡ ଓ ପାରାଦୀପ ବନ୍ଦର ପ୍ରାଧିକରଣର ସହଭାଗିତା ରହିବ। ଗଞ୍ଜାମ ଜିଲ୍ଲାର ବାହୁଡ଼ା ମୁହାଣରେ ସବୁଦିନିଆ ସାଟେଲାଇଟ୍ ବନ୍ଦର ନିର୍ମାଣ କାମ ଚାଲିଛି ଏବଂ ସାଗରମାଳା ଫାଇନାନ୍ସ କର୍ପୋରେସନ୍ ଲିମିଟେଡ୍‌ର ୨୧ ହଜାର ୫ ଶହ କୋଟି ଟଙ୍କା ସହାୟତା ମିଳିଛି। ଆଭ୍ୟନ୍ତରୀଣ କାର୍ଗୋ ପରିବହନକୁ ଶକ୍ତିଶାଳୀ କରିବା ପାଇଁ ୧୨ ହଜାର ୨ ଶହ କୋଟି ଟଙ୍କା ବିନିଯୋଗରେ ଜାତୀୟ ଜଳପଥ ୫ କାର୍ଯ୍ୟକ୍ଷମ କରାଯିବ। ପୁରୀରେ ୫ ଶହ କୋଟି ଟଙ୍କା ବ୍ୟୟରେ ଆନ୍ତର୍ଜାତୀୟ କ୍ରୁଜ୍ ଟର୍ମିନାଲ ନିର୍ମାଣ ହେବ ଯାହା ପର୍ଯ୍ୟଟନ ଓ ବିଶ୍ୱ ସଂଯୋଗକୁ ବୃଦ୍ଧି କରିବ। ପୁରୀରୁ ପାରାଦୀପ, ଦୀଘା, ଭିସାଖାପାଟଣା ଓ ଆଣ୍ଡାମାନ୍ ନିକୋବରକୁ ଯାତ୍ରୀବାହୀ ଜାହାଜ ସେବା ଆରମ୍ଭ କରାଯିବା ପାଇଁ ଯୋଜନା ରହିଛି। ବ୍ରହ୍ମଗିରିରୁ ସାତପଡ଼ା ମଧ୍ୟରେ ଶ୍ରୀଜଗନ୍ନାଥ ବିମାନବନ୍ଦର ନିକଟରେ ଯାତ୍ରୀବାହୀ ଜାହାଜ ଚଳାଚଳ କେନ୍ଦ୍ର ସ୍ଥାପନ କରାଯିବାକୁ ପ୍ରସ୍ତାବ ରହିଛି ଏବଂ ରାଜ୍ୟ ସରକାରଙ୍କ ପର୍ଯ୍ୟଟନ ବିଭାଗ ଓ ଇପିକଲ ମିଳିତ ଭାବେ ଏହି ପ୍ରକଳ୍ପକୁ ଆଗେଇ ନେଉଛନ୍ତି। ଏହି ସମସ୍ତ ପଦକ୍ଷେପ ଫଳରେ ରୋଜଗାର ସୃଷ୍ଟି, ରପ୍ତାନି ଓ ଆମଦାନି ବୃଦ୍ଧି ସହ ପର୍ଯ୍ୟଟନ କ୍ଷେତ୍ରରେ ଓଡ଼ିଶା ଆହୁରି ଶକ୍ତିଶାଳୀ ହେବ ବୋଲି ଆଶା କରାଯାଉଛି।