ଆଇଟିଆର୍, ପିଏଫ୍, କ୍ରେଡିଟ୍ କାର୍ଡ ଓ ପାସପୋର୍ଟ ଫି’ରେ ପ୍ରଭାବ
ନୂଆଦିଲ୍ଲୀ: ଜୁଲାଇ ମାସ ଆରମ୍ଭ ସହିତ ଦେଶରେ ଅନେକ ଗୁରୁତ୍ୱପୂର୍ଣ୍ଣ ଆର୍ଥିକ ପରିବର୍ତ୍ତନ ଲାଗୁ ହୋଇଛି। ଆଇଟିଆର୍ ଦାଖଲ ସମୟସୀମାଠାରୁ ଆରମ୍ଭ କରି ୟୁପିଆଇ ମାଧ୍ୟମରେ ପିଏଫ୍ ଟଙ୍କା ଉଠାଣ, କ୍ରେଡିଟ୍ କାର୍ଡ ସୁବିଧାରେ ପରିବର୍ତ୍ତନ, ପାସପୋର୍ଟ ଫି’ ବୃଦ୍ଧି ଏବଂ ଏଲପିଜି ଦର ହ୍ରାସ ପର୍ଯ୍ୟନ୍ତ ଅନେକ ନୂଆ ନିୟମ ସାଧାରଣ ଲୋକଙ୍କୁ ପ୍ରଭାବିତ କରିବ। ଆସେସମେଣ୍ଟ ବର୍ଷ ୨୦୨୬-୨୭ ପାଇଁ ଆଇଟିଆର୍-୧ ଓ ଆଇଟିଆର୍-୨ ଦାଖଲ କରୁଥିବା କରଦାତାଙ୍କ ପାଇଁ ୩୧ ଜୁଲାଇ ଶେଷ ତାରିଖ ରହିଛି। ଅନ୍ୟପଟେ EPFO ‘EPFO 3.0’ ଅଧୀନରେ ୟୁପିଆଇ ମାଧ୍ୟମରେ ପିଏଫ୍ ଟଙ୍କା ଉଠାଣ ସୁବିଧା ଆରମ୍ଭ କରିବାକୁ ଯାଉଛି, ଯାହା ଗ୍ରାହକଙ୍କ ପାଇଁ ପ୍ରକ୍ରିୟାକୁ ଅଧିକ ସହଜ କରିବ।
ସରକାରୀ କର୍ମଚାରୀ ଓ ପେନସନଭୋଗୀମାନେ ମହଙ୍ଗା ଭତ୍ତା ବୃଦ୍ଧି ଘୋଷଣାକୁ ଅପେକ୍ଷା କରିଥିବା ବେଳେ, HDFC ବ୍ୟାଙ୍କ Regalia Gold କ୍ରେଡିଟ୍ କାର୍ଡର ଏୟାରପୋର୍ଟ ଲାଉଞ୍ଜ୍ ସୁବିଧା ପାଇଁ ନୂଆ ଖର୍ଚ୍ଚ ସୀମା ଲାଗୁ କରିଛି। ସେହିପରି ଏସବିଆଇ କାର୍ଡ ମଧ୍ୟ କିଛି କାର୍ଡର ରିୱାର୍ଡ ପଏଣ୍ଟ ଉପରେ କ୍ୟାପିଂ ବ୍ୟବସ୍ଥା ଆଣିଛି। ଏହାସହ ୧୯ କିଲୋଗ୍ରାମ ବିଶିଷ୍ଟ କମର୍ସିଆଲ୍ ଏଲପିଜି ସିଲିଣ୍ଡର ଦରରେ ହ୍ରାସ କରାଯାଇଥିବା ବେଳେ, ଘରୋଇ ଗ୍ୟାସ୍ ଦର ଅପରିବର୍ତ୍ତିତ ରହିଛି। UIDAI ପକ୍ଷରୁ ଆଧାର ମୋବାଇଲ୍ ଆପ୍ ମାଧ୍ୟମରେ ଇମେଲ୍ ଅପଡେଟ୍ ସେବାକୁ ୬ ମାସ ପାଇଁ ମାଗଣା କରାଯାଇଛି।
ରିଜର୍ଭ ବ୍ୟାଙ୍କ ମଧ୍ୟ ବ୍ୟାଙ୍କ ଦ୍ୱାରା ବିକ୍ରି ହେଉଥିବା ବୀମା ଓ ନିବେଶ ଉତ୍ପାଦ ସମ୍ପର୍କରେ ନୂଆ ସ୍ୱଚ୍ଛତା ନିୟମ ଲାଗୁ କରିଛି। ଏହାସହ ପାସପୋର୍ଟ ଆବେଦନ ଓ ନବୀକରଣ ଫି’ରେ ବୃଦ୍ଧି କରାଯାଇଛି। ତେବେ ଜୁଲାଇ-ସେପ୍ଟେମ୍ବର ତ୍ରୈମାସିକ ପାଇଁ କ୍ଷୁଦ୍ର ସଞ୍ଚୟ ଯୋଜନାଗୁଡ଼ିକର ସୁଧ ହାର ଅପରିବର୍ତ୍ତିତ ରଖାଯାଇଛି। ଏହି ସମସ୍ତ ପରିବର୍ତ୍ତନ ଚାକିରିଆ, କରଦାତା, ବ୍ୟାଙ୍କ ଗ୍ରାହକ ଓ ସାଧାରଣ ପରିବାରମାନଙ୍କ ଆର୍ଥିକ ଯୋଜନା ଉପରେ ସିଧାସଳଖ ପ୍ରଭାବ ପକାଇବ।