ନୂଆଦିଲ୍ଲୀ: ଲୋକସଭାରେ ଗୃହୀତ ହେବା ପରେ ଆଣ୍ଟି-ପେପର ଲିକ୍ ବିଲ୍କୁ ଗୁରୁବାର ରାଜ୍ୟସଭା ମଧ୍ୟ ଅନୁମୋଦନ କରିଛି। ଉପରାଷ୍ଟ୍ରପତି ତଥା ରାଜ୍ୟସଭା ଅଧ୍ୟକ୍ଷ ସି.ଭି. ରାଧାକୃଷ୍ଣନ୍ ଭଏସ୍ ଭୋଟ୍ରେ ବିଲ୍କୁ ପାସ୍ କରିଥିଲେ। ବିଲ୍ ଉପରେ ଆଲୋଚନା ସମୟରେ ବିରୋଧୀ ଦଳ ୱାକ୍ଆଉଟ୍ କରିଥିଲେ। ବିଲ୍କୁ ଉପସ୍ଥାପନ କରି କେନ୍ଦ୍ରମନ୍ତ୍ରୀ କହିଥିଲେ ଯେ, ଲୋକସଭାରେ ପ୍ରାୟ ୧୦ ଘଣ୍ଟା ଧରି ଆଲୋଚନା ପରେ ଏହା ଗୃହୀତ ହୋଇଥିଲା। ବାରମ୍ବାର ହଟ୍ଟଗୋଳ ହେବା ସତ୍ତ୍ୱେ ସରକାର ବିଲ୍ ସମ୍ପର୍କରେ ସବିଶେଷ ଉତ୍ତର ରଖିଥିଲେ। ରାଜ୍ୟସଭାକୁ ସେ ଅଭିଜ୍ଞ ଓ ପ୍ରଜ୍ଞାବାନ ସଦସ୍ୟଙ୍କ ଗୃହ ବୋଲି ବର୍ଣ୍ଣନା କରି ବିଲ୍ ଉପରେ ଗଠନମୂଳକ ଆଲୋଚନା ପାଇଁ ଆହ୍ୱାନ କରିଥିଲେ।
ସରକାରଙ୍କ ମତରେ, ଏହି ଆଇନ ଛାତ୍ରଛାତ୍ରୀ ଓ ଯୁବପିଢ଼ିଙ୍କ ସ୍ୱାର୍ଥ ସୁରକ୍ଷା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ସରକାରୀ ପରୀକ୍ଷାରେ ପ୍ରଶ୍ନପତ୍ର ଲିକ୍ ଓ ଅସାଧୁ ଉପାୟକୁ ରୋକିବା ପାଇଁ ଆଇନକୁ ଅଧିକ କଠୋର କରିବା ଏହାର ମୂଳ ଉଦ୍ଦେଶ୍ୟ। ପ୍ରସ୍ତାବିତ ସଂଶୋଧନ ଅନୁଯାୟୀ, ପ୍ରଶ୍ନପତ୍ର ଲିକ୍ କିମ୍ବା ଏଥିରେ ସମ୍ପୃକ୍ତ ଅପରାଧରେ ଦୋଷୀ ସାବ୍ୟସ୍ତ ହେଲେ ସର୍ବାଧିକ ୧୦ ବର୍ଷ ପର୍ଯ୍ୟନ୍ତ କାରାଦଣ୍ଡ ଏବଂ ୫୦ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନାର ବ୍ୟବସ୍ଥା ରହିଛି।
ଉଲ୍ଲେଖଯୋଗ୍ୟ, ନିଟ୍ ପରୀକ୍ଷାରେ ପ୍ରଶ୍ନପତ୍ର ଲିକ୍ ଅଭିଯୋଗକୁ ନେଇ ସାରା ଦେଶରେ ଛାତ୍ର ଆନ୍ଦୋଳନ ହୋଇଥିଲା। ଏହାପରେ କେନ୍ଦ୍ର ସରକାର ଏହି ସଂଶୋଧନ ବିଲ୍ ଆଗତ କରିଥିଲେ। ମୌସୁମୀ ଅଧିବେଶନରେ ବିରୋଧୀ ଦଳଗୁଡ଼ିକ ଏହି ପ୍ରସଙ୍ଗକୁ ନେଇ ସରକାରଙ୍କୁ ଘେରିବା ସହ ବାରମ୍ବାର ଗୃହ କାର୍ଯ୍ୟରେ ବାଧା ସୃଷ୍ଟି କରିଥିଲେ।