ରୁଷିଆ-ୟୁକ୍ରେନ ଯୁଦ୍ଧ: ମୃତ ଭାରତୀୟଙ୍କ ପରିବାରକୁ ସହାୟତା ପାଇଁ କେନ୍ଦ୍ରକୁ ସୁପ୍ରିମକୋର୍ଟଙ୍କ ନିର୍ଦ୍ଦେଶ
ନୂଆଦିଲ୍ଲୀ: ରୁଷିଆ-ୟୁକ୍ରେନ ଯୁଦ୍ଧରେ ମୃତ, ନିଖୋଜ କିମ୍ବା ଆହତ ହୋଇଥିବା ଭାରତୀୟଙ୍କ ପରିବାରକୁ ସହାୟତା ପ୍ରଦାନ ପାଇଁ ସୁପ୍ରିମକୋର୍ଟ ଶୁକ୍ରବାର ବୈଦେଶିକ ବ୍ୟାପାର ମନ୍ତ୍ରଣାଳୟ (MEA)କୁ ଜଣେ ନୋଡାଲ ଅଧିକାରୀ ନିଯୁକ୍ତ କରିବାକୁ ନିର୍ଦ୍ଦେଶ ଦେଇଛନ୍ତି।
ବିଚାରପତି ସୂର୍ଯ୍ୟକାନ୍ତ, ଜଷ୍ଟିସ ଜୟମାଲ୍ୟ ବାଗଚୀ ଏବଂ ଜଷ୍ଟିସ ଭି. ମୋହନଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି ଯେ, ଏହି ନୋଡାଲ ଅଧିକାରୀ ମୃତଦେହ ଭାରତକୁ ଫେରାଇ ଆଣିବା, ଡିଏନଏ ମେଳକ ପ୍ରକ୍ରିୟା ସମନ୍ୱୟ କରିବା ଏବଂ ରୁଷିଆ ଦୂତାବାସ ମାଧ୍ୟମରେ କ୍ଷତିପୂରଣ ପାଇବାରେ ମୃତ କିମ୍ବା ନିଖୋଜ ବ୍ୟକ୍ତିଙ୍କ ପରିବାରକୁ ସହାୟତା କରିବେ। ସୁପ୍ରିମକୋର୍ଟ MEAକୁ ନିର୍ଦ୍ଦେଶ ଦେଇଛନ୍ତି ଯେ, ପ୍ରଭାବିତ ପରିବାରଙ୍କୁ ରୁଷିଆ ଦୂତାବାସରେ କ୍ଷତିପୂରଣ ଦାବି ଦାଖଲ କରିବାରେ ସହଯୋଗ କରାଯିବ। ଏହା ସହିତ ସମସ୍ତ ଆବଶ୍ୟକ ସୂଚନା ଓ ଅପଡେଟ୍ ସ୍ଥାନୀୟ ଭାଷାରେ ଯୋଗାଇ ଦେବାକୁ ମଧ୍ୟ କୋର୍ଟ କହିଛନ୍ତି।
ଏହାଛଡ଼ା, ଜାତୀୟ ଆଇନ ସେବା ପ୍ରାଧିକରଣ (NALSA) ଏବଂ ରାଜ୍ୟ ଆଇନ ସେବା ପ୍ରାଧିକରଣଗୁଡ଼ିକୁ ମଧ୍ୟ ପରିବାରମାନଙ୍କୁ ମୃତଦେହ ଉଦ୍ଧାର, ଡିଏନଏ ମେଳକ ଏବଂ କ୍ଷତିପୂରଣ ପ୍ରକ୍ରିୟାରେ ଆଇନଗତ ଓ ପ୍ରଶାସନିକ ସହାୟତା ଯୋଗାଇବାକୁ ନିର୍ଦ୍ଦେଶ ଦିଆଯାଇଛି।
ଉଲ୍ଲେଖଯୋଗ୍ୟ ଯେ, ଟ୍ରାଭେଲ ଏଜେଣ୍ଟଙ୍କ ପ୍ରତାରଣାର ଶିକାର ହୋଇ ରୁଷିଆ-ୟୁକ୍ରେନ ସଂଘର୍ଷ ଅଞ୍ଚଳକୁ ପଠାଯାଇଥିବା ଏବଂ ସେଠାରେ ମୃତ କିମ୍ବା ନିଖୋଜ ହୋଇଥିବା ଭାରତୀୟଙ୍କ ପରିବାର ପକ୍ଷରୁ ଦାଖଲ ହୋଇଥିବା ଆବେଦନର ଶୁଣାଣି କରି ସୁପ୍ରିମକୋର୍ଟ ଏହି ନିର୍ଦ୍ଦେଶ ଜାରି କରିଛନ୍ତି।