ପାକିସ୍ତାନ: ପାକିସ୍ତାନର ପେଶାୱାରରେ ଏକ ଘରୋଇ ସ୍କୁଲ୍ର ଛାତ ଭୁଶୁଡ଼ି ପଡ଼ିବାରୁ ୨୯ ଜଣଙ୍କ ମୃତ୍ୟୁ ହୋଇଛି। ଏହି ମର୍ମନ୍ତୁଦ ଦୁର୍ଘଟଣାରେ ୪୦ରୁ ଅଧିକ ଆହତ ହୋଇଛନ୍ତି। ମୃତକଙ୍କ ମଧ୍ୟରେ ଅନେକ ଛାତ୍ରଛାତ୍ରୀଙ୍କ ସହ ଜଣେ ମହିଳା ଶିକ୍ଷୟିତ୍ରୀ ଅଛନ୍ତି। ମୃତ ପିଲାମାନଙ୍କ ବୟସ ୧୩ ବର୍ଷ କିମ୍ବା ତା’ଠାରୁ କମ୍ ବୋଲି ଜଣାପଡ଼ିଛି।
ଲେଡି ରିଡିଂ ହସ୍ପିଟାଲର ମୁଖପାତ୍ର ମହମ୍ମଦ ଅସୀମ କହିଛନ୍ତି ଯେ ଘଟଣା ପରେ ହସ୍ପିଟାଲରେ ଜରୁରୀକାଳୀନ ସ୍ଥିତି ଘୋଷଣା କରାଯାଇଛି। ତୁରନ୍ତ ଆହତଙ୍କ ଚିକିତ୍ସା ପାଇଁ ଆବଶ୍ୟକ ବ୍ୟବସ୍ଥା କରାଯାଇଛି। ଘଟଣାସ୍ଥଳରେ ୧୭ ଜଣ ଛାତ୍ରଛାତ୍ରୀଙ୍କ ମୃତ୍ୟୁ ହୋଇଥିବାବେଳେ ଅନ୍ୟ କେତେକ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଛନ୍ତି। ପେଶାୱାର ଡେପୁଟି କମିଶନରଙ୍କ କାର୍ଯ୍ୟାଳୟର ସୂଚନା ଅନୁଯାୟୀ, ଛାତ୍ରଛାତ୍ରୀମାନେ ଶ୍ରେଣୀଗୃହରେ ଥିବାବେଳେ ହଠାତ୍ ଛାତ ଭୁଶୁଡ଼ି ପଡ଼ିଥିଲା। ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ଭଗ୍ନାବଶେଷ ତଳୁ ମୃତଦେହ ଉଦ୍ଧାର କରିବା ସହ ଆହତଙ୍କୁ ହସ୍ପିଟାଲକୁ ପଠାଇଥିଲେ।
ପାକିସ୍ତାନରେ ଶିକ୍ଷାନୁଷ୍ଠାନର କୋଠା ଭୁଶୁଡ଼ିବା ଘଟଣା ବାରମ୍ବାର ସାମ୍ନାକୁ ଆସୁଛି। ୨୦୨୬ ଜୁଲାଇରେ ଉମରକୋଟ ନିକଟରେ ଏକ ସରକାରୀ ସ୍କୁଲ୍ର କାନ୍ଥ ଭୁଶୁଡ଼ି ତିନି ଜଣ ଝିଅଙ୍କ ମୃତ୍ୟୁ ହୋଇଥିଲା। ସେହି ମାସରେ ଲାହୋରର ବାଗବାନପୁରାରେ ନିର୍ମାଣାଧୀନ ସ୍କୁଲ୍ର ଛାତ ଭୁଶୁଡ଼ି ଜଣେ ଶିଶୁଙ୍କ ଜୀବନ ଯାଇଥିଲା ଏବଂ ପାଞ୍ଚ ଜଣ ଆହତ ହୋଇଥିଲେ। ଜୁନ୍ରେ ଲାହୋରର କାହ୍ନା ଅଞ୍ଚଳର ଏକ ଟ୍ୟୁସନ୍ ସେଣ୍ଟରର ଛାତ ଭୁଶୁଡ଼ି ୧୪ ଜଣ ପିଲାଙ୍କ ମୃତ୍ୟୁ ଘଟିଥିଲା।