ଗୁଜୁରାଟ: ନଭେମ୍ବର ୧୨ରୁ ଅମୂଲ ଓ ମଦର ଡାଏରୀ କ୍ଷୀର ଦର ଲିଟର ପିଛା ୨ରୁ ୪ ଟଙ୍କା ବୃଦ୍ଧି ପାଇବ। ଚାରା, ପଶୁଖାଦ୍ୟ, ପ୍ୟାକେଜିଂ ଓ ପରିବହନ ଖର୍ଚ୍ଚ ବଢ଼ିଥିବାରୁ ଉଭୟ କମ୍ପାନୀ ଏହି ଦରବୃଦ୍ଧି ଘୋଷଣା କରିଛନ୍ତି। ଅମୂଲ ବ୍ରାଣ୍ଡର ବିପଣନକାରୀ ଗୁଜରାଟ କୋ-ଅପରେଟିଭ୍ ମିଲ୍କ ମାର୍କେଟିଂ ଫେଡେରେସନ୍ (ଜିସିଏମ୍ଏମ୍ଏଫ୍) ଅନୁଯାୟୀ, ଦେଶବ୍ୟାପୀ ପ୍ରମୁଖ ପ୍ୟାକେଟ୍ କ୍ଷୀର ଦର ୪ରୁ ୫ ପ୍ରତିଶତ ବଢ଼ିଛି। ଅମୂଲ ତାଜା ଟୋନ୍ଡ କ୍ଷୀର ଲିଟର ପିଛା ୨ ଟଙ୍କା ଏବଂ ଅମୂଲ ଗୋଲ୍ଡ ୪ ଟଙ୍କା ମହଙ୍ଗା ହୋଇଛି। ଚଳିତ ବର୍ଷ ମେ’ ପରେ ଏହା ଅମୂଲର ଦ୍ୱିତୀୟ ଦରବୃଦ୍ଧି।
ଅନ୍ୟପକ୍ଷରେ, ମଦର ଡାଏରୀ ମଧ୍ୟ ନିଜର ବିଭିନ୍ନ ପ୍ରକାର ତରଳ କ୍ଷୀର ଦର ଲିଟର ପିଛା ୨ରୁ ୪ ଟଙ୍କା ବଢ଼ାଇଛି। କମ୍ପାନୀ ଅନୁଯାୟୀ, ଅନିୟମିତ ମୌସୁମୀ ଯୋଗୁଁ ସବୁଜ ଓ ଶୁଖିଲା ଚାରା ଦର ୨୦ ପ୍ରତିଶତ ଏବଂ ବର୍ଷକ ମଧ୍ୟରେ ପଶୁଖାଦ୍ୟ ଦର ପ୍ରାୟ ୧୦ ପ୍ରତିଶତ ବଢ଼ିଛି। ପ୍ୟାକେଜିଂ, ପରିବହନ ଓ ଅନ୍ୟାନ୍ୟ ପରିଚାଳନା ଖର୍ଚ୍ଚ ମଧ୍ୟ ୨୫ ପ୍ରତିଶତ ପର୍ଯ୍ୟନ୍ତ ବୃଦ୍ଧି ପାଇଛି।