ଖ୍ରୀଷ୍ଟମାସ ପରେଡ ଭିତରେ ମାଡିଗଲା କାର । ଆମେରିକା ୱିସକୋସିନରେ ଏଭଳି ଅଘଟଣ ଘଟିଛି । କାର ମାଡି ଯିବାରୁ ୨୦ ଜଣ ଗୁରୁତର ଭାବେ ଆହତ ହୋଇଛନ୍ତି । ଆହତଙ୍କ ମଧ୍ୟରେ ଅନେକ ଛୋଟଛୁଆ ମଧ୍ୟ ଅଛନ୍ତି । ତେବେ ଆଶ୍ୱସ୍ତିକର କଥା ହେଉଛି, କାହାର ମୃତାହତ ର ଖବର ଆସିନାହିଁ । ସମସ୍ତ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।
ପରେଡ ଚାଲୁଥିବା ବେଳେ ହଠାତ ଏକ ନାଲି ରଙ୍ଗର କାର ଦ୍ରୁତ ଗତିରେ ମାଡିଆସିଥିଲା । ପରେଡ ଦେଖିବାକୁ ବହୁ ଲୋକଙ୍କ ଭିଡ ଜମିଥିବା ବେଳେ କାରଟି ଲୋକଙ୍କୁ ଧକ୍କା ଦେଇଥିଲା । ତେବେ ପୁଲିସ ଗାଡି ଡ୍ରାଇଭରଙ୍କୁ ହେପାଜତକୁ ନେଇଛି । କିନ୍ତୁ ଏଯାଏଁ ଗିରଫ କରାଯାଇନାହିଁ । ପୁଲିସ ଘଟଣାର ତଦନ୍ତ ଅଲଗା ଅଲଗା ଦିଗରୁ କରୁଥିବା ବେଳେ ଡ୍ରାଇଭରକୁ ପଚରାଉଚରା କରାଯାଉଛି ।
ସିଟି ପୁଲିସ ମୁଖ୍ୟ ଡାନ ଥମ୍ପସନ କହିଛନ୍ତି, ଦୁର୍ଘଟଣା ଘଟାଇଥିବା ଗାଡିକୁ ଜବତ କରାଯାଇଛି ଏବଂ ଘଟଣାର ତଦନ୍ତ ଚାଲିଛି । ସିସିଟିଭି ଫୁଟେଜ ମଧ୍ୟ ମିଳିଛି । ଭିଡିଓରେ କାରଟି ପରେଡ ବାହାର କରୁଥିବା ଲୋକଙ୍କୁ ଧକ୍କା ଦେଉଥିବା ଦେଖିବାକୁ ମିଳିଛି । ରବିବାର ସନ୍ଧ୍ୟାରେ ଏଭଳି ଘଟଣା ଘଟିଛି । ଅଧିକାରୀମାନେ ଘଟଣା ସମ୍ପର୍କରେ ତଥ୍ୟ ସଂଗ୍ରହରେ ଲାଗିଛନ୍ତି । ଆମେରିକା ସମୟ ଅନୁଯାୟୀ ଘଟଣା ସନ୍ଧ୍ୟା ସାଢେ ୪ଟାରେ ଘଟିଛି । ଜଣେ ସନ୍ଦିଗ୍ଧଙ୍କୁ ଚିହ୍ନଟ କରାଯାଇଥିବା ପୁଲିସ କହିଛି ।