ଭୁବନେଶ୍ବର; ଆଜି ଭାରତୀୟ ପାଣିପାଗ ବିଭାଗ ତରଫ ରୁ ନଭେମ୍ବର ମାସ ପାଇଁ ଦୀର୍ଘ କାଳୀନ ପାଣିପାଗ ଆକଳନ ଜାରି କରାଯାଇଛି। ଆକଳନ ଅନୁସାରେ ଚଳିତ ମାସ ରେ ଦେଶ ର ଅଧିକାଂଶ ସ୍ଥାନ ରେ ସ୍ଵାଭାବିକ କିମ୍ବା ସ୍ଵାଭାବିକ ଠାରୁ ଅଧିକ ବର୍ଷା ର ପ୍ରଭାବ ରହିବ। କେବଳ ଦକ୍ଷିଣ ଭାରତ ର କିଛି ଅଞ୍ଚଳ, ଉତ୍ତର ପଶ୍ଚିମ ଓ ଉତ୍ତର ପୂର୍ବ ଭାରତ ର କିଛି ଅଞ୍ଚଳ ରେ କମ୍ ବର୍ଷା ହୋଇପାରେ।
ସେହିପରି ଚଳିତ ମାସ ରେ ସର୍ବୋଚ୍ଚ ତାପମାତ୍ରା (ଦିନ ତାପମାତ୍ରା) ଦେଶର ଅଧିକାଂଶ ସ୍ଥାନ ରେ ସ୍ଵାଭାବିକ କିମ୍ବା କମ୍ ରହିପାରେ, କେବଳ ଉତ୍ତର ପୂର୍ବ , ଉତ୍ତର ପଶ୍ଚିମ ଭାରତ ର ଅନେକ ଅଞ୍ଚଳ ସହ ପୂର୍ବ ଭାରତ ର କିଛି ଅଞ୍ଚଳ ରେ ଦିନ ତାପମାତ୍ରା ସ୍ଵାଭାବିକ କିମ୍ୱା ଏହା ଠାରୁ ଅଧିକ ରହିବାର ସମ୍ଭାବନା ଅଛି।
ଅନ୍ୟପକ୍ଷେ ସର୍ବନିମ୍ନ ତାପମାତ୍ରା (ରାତି ତାପମାତ୍ରା) ଦେଶ ର ଅଧିକାଂଶ ସ୍ଥାନ ରେ ସ୍ଵାଭାବିକ କିମ୍ୱା ଏହା ଠାରୁ ଅଧିକ ରହିପାରେ । କେବଳ ଉତ୍ତର ପଶ୍ଚିମ ଭାରତ ଓ ହିମାଳୟ ପାଦ ଦେଶ କିଛି ଅଞ୍ଚଳ ରେ ରାତି ତାପମାତ୍ରା ସ୍ଵାଭାବିକ ଠାରୁ କମ୍ ରହିବ।
ଓଡ଼ିଶା ରେ ନଭେମ୍ବର ମାସ ରେ ବର୍ଷା ର ପ୍ରଭାବ ରହିବ। ଦକ୍ଷିଣ ଆଭ୍ୟନ୍ତର ଓଡ଼ିଶା ରେ ସ୍ଵାଭାବିକ ଠାରୁ ଅଧିକ ବର୍ଷା ସମ୍ଭାବନା ରହିଛି। ଦକ୍ଷିଣ ଉପକୂଳ ଓଡ଼ିଶା ର ଅଧିକାଂଶ ଅଞ୍ଚଳ ସହ ଉତ୍ତର ଓ ଉତ୍ତର ଉପକୂଳ ଓଡ଼ିଶା ରେ ସ୍ଵାଭାବିକ କିମ୍ବା ସ୍ଵାଭାବିକ ଠାରୁ ଅଧିକ ବର୍ଷା ସମ୍ଭାବନା ରହିଛି। ପଶ୍ଚିମ ଓଡ଼ିଶା ଓ ଉତ୍ତର ଆଭ୍ୟନ୍ତର ଓଡ଼ିଶା ର ଅନେକ ଅଞ୍ଚଳ ରେ ସ୍ଵାଭାବିକ ବର୍ଷା ସମ୍ଭାବନା ରହିଛି। ସେହିପରି ନଭେମ୍ବର ମାସ ରେ ରାତି ତାପମାତ୍ରା ସ୍ଵାଭାବିକ ଠାରୁ ଅଧିକ ରହିବା ହେତୁ ଶୀତ ର ପ୍ରଭାବ କମ୍ ରହିବା ସମ୍ଭାବନା ରହିଛି।
ବର୍ତ୍ତମାନ ବିଷୁବ ରେଖୀୟ ପ୍ରଶାନ୍ତ ମହାସାଗର ରେ ଲା ନିନା ସ୍ଥିତି ଓ ଭାରତ ମହାସାଗର ରେ ନେଗେଟିଭ ଆଇ ଓ ଡି ରହିଛି। ଗ୍ଲୋବାଲ ମଡେଲ ଙ୍କ ଆକଳନ ଅନୁଯାୟୀ ଆସନ୍ତା ସିଜିନ ଯାଏଁ ଲା ନିନା ସ୍ଥିତି ରହିବ ଏବଂ ନେଗେଟିଭ ଆଇ ଓ ଡି ଆସନ୍ତା ମାସ ମାନଙ୍କରେ ଦୁର୍ବଳ ହୋଇଯିବ।
ସାର୍ଥକ ମିଶ୍ର