ନୂଆଦିଲ୍ଲୀ: ପୂର୍ବତନ ଆଇପିଏସ୍ ଅଫିସର କେ ବିଜୟ କୁମାରଙ୍କ ଉପରେ କେନ୍ଦ୍ର ସରକାର ପୁଣି ଥରେ ଭରସା କରିଛନ୍ତି। ତାଙ୍କୁ ସ୍ବରାଷ୍ଟ୍ର ମନ୍ତ୍ରାଳୟର ବରିଷ୍ଠ ସୁରକ୍ଷା ପରାମର୍ଶଦାତା ଭାବେ ନିଯୁକ୍ତି ଦିଆଯାଇଛି। ସେ କଶ୍ମୀର ସମସ୍ୟା ସହିତ ମାଓ ଉପଦ୍ରୁତ ରାଜ୍ୟ ପାଇଁ ପରାମର୍ଶଦାତା ଭାବେ କାର୍ଯ୍ୟ କରିବେ। ବର୍ଷକ ପାଇଁ ସରକାର ତାଙ୍କୁ କେନ୍ଦ୍ର ସରକାର ଏହି ନିଯୁକ୍ତି ଦେଇଥିବା ସୂଚନା ମିଳିଛି।
୧୯୭୫ ବ୍ୟାଚର ଏହି ଆଇପିଏସ୍ ଅଫିସର ୨୦୧୮ ମସିହାରୁ ଜାମୁ ଓ କାଶ୍ମୀର ରାଜ୍ୟପାଳଙ୍କୁ ସୁରକ୍ଷା ସଂପର୍କିତ ପରାମର୍ଶମାନ ଦେଇ ଆସୁଥିଲେ। ୬୭ ବର୍ଷୀୟ ବିଜୟ ସିଆରପିଏଫ୍ ଡିଜି ଭାବେ କାର୍ଯ୍ୟ କରିଥିଲେ। ୨୦୦୪ ମସିହାରେ ତାମିଲନାଡୁରେ ଗଠନ ହୋଇଥିବା ସ୍ବତନ୍ତ୍ର ଟାସ୍କ ଫୋର୍ସର ମୁଖ୍ୟ ଥାଇ ବୀରାପ୍ପାନଙ୍କୁ ମାରିଥିଲେ। ସେତେବେଳେ ତାଙ୍କ ନାମକୁ ନେଇ ସମଗ୍ର ଦେଶରେ ଚହଳ ସୃଷ୍ଟି ହୋଇଥିଲା। ସେ ହାଇଦ୍ରାବାଦ ସ୍ଥିତ ଜାତୀୟ ପୁଲିସ ଏକାଡେମି ନିର୍ଦେଶକ ଭାବେ ମଧ୍ୟ କାର୍ଯ୍ୟ କରିଥିଲେ।