ଭୁବନେଶ୍ବର: ଆଗକୁ ମାଟ୍ରିକ ପରୀକ୍ଷା ଆସୁଥିବାବେଳେ କେମିତି ଛାତ୍ରଛାତ୍ରୀ ଚାପମୁକ୍ତ ରହିବେ । କେମିତି ସଫଳତା ହାସଲ କରିବେ, ଏ ନେଇ ଶିକ୍ଷା ବିଭାଗ ପକ୍ଷରୁ ନିର୍ଦ୍ଦେଶାବଳୀ ଜାରି କରାଯାଇଛି । ଏଥିପାଇଁ ଛାତ୍ରଛାତ୍ରୀ ପ୍ରସ୍ତୁତି କିଭଳି କରିବେ ସେ ନେଇ ମାର୍ଗଦର୍ଶିକାରେ ବିସ୍ତୁତ ଭାବେ କୁହାଯାଇଛି । ରାଜ୍ୟର ସମସ୍ତ ହାଇସ୍କୁଲ ଯେପରି ‘ଜିରୋ ଏଫ୍ ମିଶନ’ ତଥା ଶତ ପ୍ରତିଶତ ରେଜଲ୍ଟ କରିବେ ସେ ଉପରେ ଗୁରୁତ୍ୱ ଦିଆଯାଇଛି ।
ବିଭାଗ ପକ୍ଷରୁ କୁହାଯାଇଛି ଛାତ୍ରଛାତ୍ରୀଙ୍କ ମଧ୍ୟରେ ସକରାତ୍ମକ ଭାବନା ମୁଖ୍ୟ ଉପାଦେୟ । ପାଠ ପଢିବା ସମୟରେ ବ୍ରେକ୍ ନିଅନ୍ତୁ । ଦୀର୍ଘ ସମୟ ଧରି ପଢନ୍ତୁ ନାହିଁ ଏଥିରେ ମାନସିକ ଚାପ ବୃଦ୍ଧି ପାଇଥାଏ । ସାଙ୍ଗସାଥିଙ୍କ ସହ ପଢ଼ିବା ବେଳେ ପାଠ କମ କଥାବାର୍ତ୍ତା ଅଧିକ ହୋଇଥାଏ । ତେଣୁ ସାଙ୍ଗଙ୍କ ସହ ଏକାଠି ପଢ଼ନ୍ତୁ ନାହିଁ, ଯଦି ପଢ଼ୁଛନ୍ତି ପାଠ ବ୍ୟତୀତ ଅନ୍ୟ ବିଷୟରେ କଥା ହୁଅନ୍ତୁ ନାହିଁ ।
ସୁଷମ ଖାଦ୍ୟ ଖାଇବା ସହ ବିଶ୍ରାମ ନେବାକୁ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଛି ଶିକ୍ଷା ବିଭାଗ । ୧୦ରୁ ୧୪ ଘଣ୍ଟା ପାଠ ପଢି ଅତି କମରେ ୬ରୁ ୭ ଘଣ୍ଟା ଭଲ ନିଦରେ ଶୋଇବା ଉଚିତ । ପାଠ ପଢିବାକୁ ସମୟ ନିର୍ଘଣ୍ଟ କରିବାକୁ ପରାମର୍ଶ ଦେଇଛି ବିଭାଗ । ସକାଳେ ୧୦ଟାରୁ ମଧ୍ୟାହ୍ନ ସାଢେ ଗୋଟାଏ । ଅପରାହ୍ନ ସାଢେ ୨ଟାରୁ ସାଢେ ୪ଟା । ସଂଧ୍ୟା ସାଢେ ୫ଟାରୁ ରାତି ୯ଟା । ରାତିରେ ସାଢେ ୯ଟାରୁ ରାତି ୧୧ଟା ପର୍ଯ୍ୟନ୍ତ ପଢିବାକୁ ପରାମର୍ଶ ଦିଆଯାଇଛି । ସମସ୍ୟା ହେଲେ ଘର ଲୋକଙ୍କ ସହିତ ଆଲୋଚନା କରନ୍ତୁ।
ଭଲ ମାର୍କ ନଆସିଲେ ଭାଙ୍ଗି ନପଡ଼ି ଜୀବନର ପରବର୍ତ୍ତୀ ସୋପାନକୁ କିପରି ସୁଦୃଢ କରିବେ ସେଥିପ୍ରତି ଯୋଜନା କରନ୍ତୁ । ସୁସ୍ଥ ରହିବାକୁ ଯୋଗାଭ୍ୟାସ କରନ୍ତୁ । ଯୋଗାଭ୍ୟାସ ମାନସିକ ଚାପ କମାଇବାରେ ସହାୟକ ହୁଏ । ମୋବାଇଲର ସଦୁପଯୋଗ କରନ୍ତୁ । ଅଯଥା ଗେମ ଖେଳନ୍ତୁ ନାହିଁ । ଟାଇମ ଟେବୁଲ କରି ପଢନ୍ତୁ । ପରୀକ୍ଷା ପୂର୍ବରୁ ପାଠପଢା ଶେଷ କରନ୍ତୁ । ଦୁର୍ବଳ ବିଷୟକୁ ଅଧିକ ସମୟ ଧ୍ୟାନ ଦିଅନ୍ତୁ । ତେଲଯୁକ୍ତ ଖାଦ୍ୟ ଖାଅନ୍ତୁ ନାହିଁ । ଦିନକୁ ୬ରୁ ୮ ଗ୍ଲାସ ଉଷୁମ ପାଣି ପିଇବାକୁ ଶିକ୍ଷା ବିଭାଗ ପକ୍ଷରୁ କୁହାଯାଇଛି ।
ଏପଟେ ସ୍କୁଲ ଗୁଡିକରେ ଛାତ୍ରଛାତ୍ରୀଙ୍କ ଶତ ପ୍ରତିଶତ ଫଳାଫଳ ହେଲେ ପୁରସ୍କାର ଦିଆଯିବ ଓ ଖରାପ ରେଜଲ୍ଟ ହେଲେ କାର୍ଯ୍ୟାନୁଷ୍ଠାନର ମଧ୍ୟ ନିର୍ଦ୍ଦେଶ ରହିଛି । ଯଦି ବ୍ଲକର କୌଣସି ବିଦ୍ୟାଳୟରେ ଶତ ପ୍ରତିଶତ ରେଜଲ୍ଟ ନହୁଏ ତେବେ ବିଇଓ, ଏବିଇଓ, ପ୍ରଧାନଶିକ୍ଷକ, ସିଆରସିସି ଆଦି ଉତ୍ତରଦାୟୀ ରହିବେ । ସେହିପରି ଜିଲ୍ଲାରେ ଶତପ୍ରତିଶତ ରେଜଲ୍ଟ ହେଲେ, ସର୍ବାଧିକ ଏ-ୱାନ ଗ୍ରେଡ କରିଥିବା ତିନୋଟି ସ୍କୁଲକୁ ପୁରସ୍କୃତ କରାଯିବ ।