ନୂଆଦିଲ୍ଲୀ: ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ତହୱୁର ରାଣାକୁ ଭାରତ ଅଣାଯାଇଛି। ୨୦୦୮ରୁ ୨୦୨୫; ସମସ୍ତ ଉପେକ୍ଷା, ଅପେକ୍ଷା ପରେ ଆଜି ଶେଷରେ ଭାରତ ହାତରେ ଲାଗିଛି ୨୬/୧୧ ମୁମ୍ବାଇ ଆକ୍ରମଣର ଅନ୍ୟତମ ମାଷ୍ଟରମାଇଣ୍ଡ ତହବୁର ରାଣା। ମୁମ୍ବାଇ ଆତଙ୍କବାଦୀ ଆକ୍ରମଣର ମୁଖ୍ୟ ଅଭିଯୁକ୍ତ ତହବୁର ରାଣା ଗୁରୁବାର ଦିନ ଆମେରିକାରୁ ପ୍ରତ୍ୟର୍ପଣ ହେବା ପରେ ଆଜି ଦିଲ୍ଲୀରେ ପହଞ୍ଚିଛି। ପାଲମ ବିମାନବନ୍ଦର ବାହାରେ ପୋଲିସ ବ୍ୟାରିକେଡ ଲଗାଇଛି। ଅପରାହ୍ନ ପ୍ରାୟ ୨:୫୦ ସମୟରେ ବିମାନବନ୍ଦରରେ ଅବତରଣ କରିଥିଲା ତହବୁର।
ଗୁରୁବାର ଆମେରିକାରୁ ସ୍ଵତନ୍ତ୍ର ବିମାନ ଯୋଗେ ତାକୁ ଦିଲ୍ଲୀ ଅଣାଯାଇଛି। ଦିଲ୍ଲୀର ପାଲମ ବିମାନବନ୍ଦରରେ ପହଞ୍ଚିବାପରେ ତାକୁ ସିଧାସଳଖ ଜାତୀୟ ତଦନ୍ତକାରୀ ସଂସ୍ଥା(ଏନଆଇଏ) ମୁଖ୍ୟାଳୟକୁ ନିଆଯାଇଛି। ସେଠାରେ ତଦନ୍ତକାରୀ ସଂସ୍ଥାର ଟିମ୍ ତାକୁ ପଚରାଉଚରା କରିବେ। ଏହାପରେ ତହବୁର ରାଣାକୁ ତିହାର ଜେଲ୍ରେ ରଖାଯିବ, ଯେଉଁଠାରେ ତା’ର ସୁରକ୍ଷାକୁ ନେଇ ସ୍ଵତନ୍ତ୍ର ବ୍ୟବସ୍ଥା କରାଯାଇଛି।
ଏହାପରେ ବୁଲେଟପ୍ରୁଫ୍ ଯାନ ଏବଂ ସଶସ୍ତ୍ର କମାଣ୍ଡୋଙ୍କ ଏକ କାରକେଡ୍ ମୁତୟନ କରାଯାଇଛି, ଯାହା ତହବୁରକୁ ଜାତୀୟ ତଦନ୍ତ ସଂସ୍ଥା, ଏନଆଇଏ ମୁଖ୍ୟାଳୟକୁ ନେଇଯିବ, ଯେଉଁଠାରେ ଏକ ଉଚ୍ଚ-ସୁରକ୍ଷା ପଚରାଉଚରା ପ୍ରକୋଷ୍ଠ ପ୍ରସ୍ତୁତ କରାଯାଇଛି। ୨୬/୧୧ ଆକ୍ରମଣରେ ତାର ଭୂମିକା, ଏଥିରେ ପାକିସ୍ତାନୀ ପ୍ରମୁଖଙ୍କ ଭୂମିକା ନେଇ ରାଣାକୁ ପଚରାଉଚରା କରାଯିବା ପରେ ୨୬/୧୧ ଷଡ଼ଯନ୍ତ୍ରକାରୀକୁ ହେପାଜତ ପାଇଁ ଦିଲ୍ଲୀ କୋର୍ଟରେ ହାଜର କରାଯିବାର ସମ୍ଭାବନା ରହିଛି। ତେବେ ଯୋଜନା ଅନୁସାରେ, ସମସ୍ତ ପଚରାଉଚରା କାର୍ଯ୍ୟ ସରିବା ପରେ, ତହବୁରକୁ ଏନଆଇଏ ଦ୍ୱାରା ଆନୁଷ୍ଠାନିକ ଭାବରେ ଗିରଫ କରାଯିବ। ଏହାପରେ ତାକୁ ତିହାର ଜେଲରେ ରଖାଯିବ। ଯେଉଁଠାରେ ତାର ରହଣି ପାଇଁ ସମସ୍ତ ପ୍ରସ୍ତୁତି ହୋଇଛି।
ଦିଲ୍ଲୀ ଟ୍ରାଫିକ ପୋଲିସ ଆତଙ୍କବାଦୀ ତହୱୁର ରାଣାକୁ ପଟିଆଲା ହାଉସ କୋର୍ଟ ଏବଂ ଏନଆଇଏ ମୁଖ୍ୟାଳୟକୁ ନେବା ପାଇଁ ଏକ ସ୍ବତନ୍ତ୍ର ଯୋଜନା ପ୍ରସ୍ତୁତ କରିଛି। ଦିଲ୍ଲୀ ଟ୍ରାଫିକ ପୋଲିସ ରାଣାଙ୍କୁ ନେବା ପାଇଁ ତିନୋଟି ରାସ୍ତା ତିଆରି କରିଛି। ଏହା ବ୍ୟତୀତ ୨ଟି ବିକଳ୍ପ ରାସ୍ତା ମଧ୍ୟ ପ୍ରସ୍ତୁତ କରାଯାଇଛି। ଯଦି ସ୍ଥିର ରାସ୍ତାରେ କୌଣସି ସମସ୍ୟା ହୁଏ, ତେବେ ଏକ ବିକଳ୍ପ ରାସ୍ତା ବ୍ୟବହାର କରାଯିବ। ଗ୍ରୀନ କରିଡର ନିର୍ମାଣ କରାଯାଉନାହିଁ, କିନ୍ତୁ ରେଡ ଲାଇଟରେ ଗ୍ରୀନ ସିଗନାଲ ଦିଆଯିବ। ପାଲମ ଏୟାରବେସରୁ ଏନଆଇଏ ମୁଖ୍ୟାଳୟର ଦୂରତା ୧୭ କିଲୋମିଟର। ପଟିଆଲା ହାଉସ କୋର୍ଟରୁ ୧୪ କିଲୋମିଟର ଦୂରତା ଅଛି। ଆତଙ୍କବାଦୀ ତହୱୁର ରାଣାକୁ ସ୍ବତନ୍ତ୍ର ଏନଆଇଏ ବିଚାରପତି ଚନ୍ଦ୍ରଜିତ ସିଂହଙ୍କ କୋର୍ଟରେ ହାଜର କରାଯିବ। ଏନଆଇଏ ତହୱୁର ରାଣାକୁ ମୁମ୍ବାଇ ଆତଙ୍କବାଦୀ ଆକ୍ରମଣର ମୁଖ୍ୟ ଷଡ଼ଯନ୍ତ୍ରକାରୀ ବୋଲି ବର୍ଣ୍ଣନା କରିଛି।
୬୪ ବର୍ଷୀୟ ଆତଙ୍କବାଦୀ ଆକ୍ରମଣ ମାଷ୍ଟରମାଇଣ୍ଡ ତହବୁର ବିରୋଧରେ ଦିଲ୍ଲୀର ଏକ ସ୍ୱତନ୍ତ୍ର ଏନଆଇଏ କୋର୍ଟରେ ବିଚାର କରାଯିବ। ଯେହେତୁ ମାମଲାଟି ଏବେ ଦିଲ୍ଲୀରେ ଶୁଣାଣି ହେବ, ତାକୁ ଏବେ ମୁମ୍ବାଇ ପଠାଯିବ ନାହିଁ। ଆମେରିକା ସହ ପ୍ରତ୍ୟର୍ପଣ ଚୁକ୍ତି ଏବଂ ଭାରତ ଆମେରିକାକୁ ଦେଇଥିବା ପ୍ରତିଶ୍ରୁତି ଅନୁଯାୟୀ, ତହବୁରକୁ ନିର୍ଯାତନା ଦିଆଯିବ ନାହିଁ, ଜେଲରେ ପର୍ଯ୍ୟାପ୍ତ ସୁରକ୍ଷା ଯୋଗାଇ ଦିଆଯିବ ଏବଂ କେବଳ ସେହି ଅପରାଧ ପାଇଁ ବିଚାର କରାଯିବ ଯାହା ପାଇଁ ତାଙ୍କୁ ପ୍ରତ୍ୟର୍ପଣ କରାଯାଇଛି।