ଭୁବନେଶ୍ୱର: ରାଜ୍ୟରେ କାଳବୈଶାଖୀର ପ୍ରଭାବ ଜାରି ରହିଥିବା ବେଳେ ରାଜଧାନୀରୁ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି। ଭୁବନେଶ୍ୱରର ନୀଳାଦ୍ରି ବିହାର ଅଞ୍ଚଳର ସୋମନାଥ ବସ୍ତିରେ ଏକ ଘର ଉପରେ ବଜ୍ରପାତ ହେବାରୁ ଗୋଟିଏ ପରିବାରର ୩ ଜଣ ସଦସ୍ୟ ଗୁରୁତର ଭାବେ ପୋଡ଼ି ଯାଇଛନ୍ତି।
ବଜ୍ରପାତର ତୀବ୍ର ଆଘାତରେ ଘରର ଛପର ଉଡ଼ିଯାଇଥିଲା ଓ ଘର ଭିତରେ ଥିବା ତିନିଜଣ ଗୁରୁତର ଭାବେ ଆହତ ହୋଇଥିଲେ। ସ୍ଥାନୀୟ ଲୋକମାନେ ତୁରନ୍ତ ଉଦ୍ଧାର କରି ସେମାନଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଥିଲେ। ପରେ ସ୍ୱାସ୍ଥ୍ୟାବସ୍ଥା ଅଧିକ ଗୁରୁତର ହେବାରୁ ସେମାନଙ୍କୁ କଟକକୁ ସ୍ଥାନାନ୍ତର କରାଯାଇଛି।ଖବର ପାଇ ଚନ୍ଦ୍ରଶେଖରପୁର ଥାନା ପୋଲିସ ଘଟଣାସ୍ଥଳରେ ପହଞ୍ଚି ପ୍ରାଥମିକ ତଦନ୍ତ ଆରମ୍ଭ କରିଛି।
ଅନ୍ୟପଟେ, ସାରା ଓଡ଼ିଶାରେ ବର୍ତ୍ତମାନ କାଳବୈଶାଖୀର ପ୍ରଭାବ ବ୍ୟାପକ ଭାବେ ଦେଖାଦେଉଛି। ଘଡ଼ଘଡ଼ି, ବଜ୍ରପାତ ଓ ପ୍ରବଳ ବର୍ଷାରେ ସାଧାରଣ ଜନଜୀବନ ପ୍ରଭାବିତ ହୋଇଛି। ପାଣିପାଗ ବିଭାଗ ପକ୍ଷରୁ ଆଜି ମଧ୍ୟ ରାଜ୍ୟରେ କାଳବୈଶାଖୀର ଆଶଙ୍କା ଥିବା ସତର୍କ ସୂଚନା ଜାରି କରାଯାଇଛି। ୪ଟି ଜିଲ୍ଲା ପାଇଁ ଅରେଞ୍ଜ ୱାର୍ଣ୍ଣିଂ ଓ ଅନ୍ୟ ୨୬ଟି ଜିଲ୍ଲା ପାଇଁ ୟେଲୋ ୱାର୍ଣ୍ଣିଂ ଜାରି ହୋଇଛି। ବିଶେଷକରି ଭୁବନେଶ୍ୱର ଓ କଟକରେ ଗତକାଲି ସନ୍ଧ୍ୟାରୁ ମେଘାଚ୍ଛନ୍ନ ପାଗ ସହ ବର୍ଷା ଜାରି ରହିଛି, ଯାହାରେ ଲୋକମାନଙ୍କ ଦୈନିକ ଜୀବନ ଅସୁବିଧାର ସମ୍ମୁଖୀନ ହେଉଛି।