ଆସାମ: ବିଧାନସଭା ନିର୍ବାଚନରେ ବିଜେପି ଦମଦାର ପ୍ରଦର୍ଶନ କରି ହ୍ୟାଟ୍ରିକ ଜୟ ଦିଗରେ ଆଗୁଆ ହୋଇଛି। କଂଗ୍ରେସ ପାଇଁ ଏହି ନିର୍ବାଚନ ଭାରି ଝଟକା ସାବିତ ହୋଇଛି। ଦଳର ରାଜ୍ୟ ମୁଖିଆ ଓ ସାଂସଦ ଗୌରବ ଗୋଗୋଇ ମଧ୍ୟ ଜୋରହାଟ ବିଧାନସଭା ଆସନରୁ ପରାଜିତ ହୋଇଛନ୍ତି। ପ୍ରଥମଥର ପାଇଁ ବିଧାନସଭା ନିର୍ବାଚନ ଲଢ଼ୁଥିବା ଗୌରବ ଗୋଗୋଇଙ୍କୁ ବିଜେପି ପ୍ରାର୍ଥୀ ହିତେନ୍ଦ୍ରନାଥ ଗୋସ୍ୱାମୀ ପରାସ୍ତ କରିଛନ୍ତି। ହିତେନ୍ଦ୍ରନାଥ ୫୯,୧୧୩ ଭୋଟ ପାଇଥିବା ବେଳେ ଗୋଗୋଇ ୩୯,୪୯୪ ଭୋଟରେ ସୀମିତ ରହିଛନ୍ତି।
ଗୋଲାଘାଟ ଆସନରେ ବିଜେପିର ଅଜନ୍ତା ନେଓଗ ମଧ୍ୟ ବିଜୟ ହାସଲ କରିଛନ୍ତି। ସେ ୭୩,୯୮୩ ଭୋଟ ପାଇଥିବା ବେଳେ କଂଗ୍ରେସ ପ୍ରାର୍ଥୀ ବିଟୁପନ ସାଇକିଆ ୪୩,୨୮୬ ଭୋଟ ପାଇଛନ୍ତି। ରାଜ୍ୟର ୧୨୬ଟି ଆସନ ମଧ୍ୟରୁ ବିଜେପି ୧୦ଟିରେ ଜିତିଥିବା ସହ ୮୭ଟିରେ ଆଗୁଆ ରହିଛି। କଂଗ୍ରେସ ୨୭ଟି ଆସନରେ ଲିଡ କରୁଥିବା ବେଳେ ଅନ୍ୟ ଦଳ ୨ଟିରେ ଆଗରେ ରହିଛନ୍ତି। ସରକାର ଗଠନ ପାଇଁ ଆବଶ୍ୟକ ୬୪ ମ୍ୟାଜିକ ନମ୍ବରକୁ ବିଜେପି ସହଜରେ ଅତିକ୍ରମ କରିବା ଦିଗରେ ଅଛି।