ଟୋକିଓ ଅଲିମ୍ପିକ୍ସରେ ଭାରତୀୟ ଖେଳାଳି ଚଳିତ ବର୍ଷ ଦମଦାର ପ୍ରଦର୍ଶନ କରି ସାରା ବିଶ୍ୱରେ ଭାରତର ଟେକ ରଖିଥିଲେ । ପ୍ରଧାନମନ୍ତ୍ରୀଙ୍କଠୁ ଆରମ୍ଭ କରି ରାଷ୍ଟ୍ରପତି ଯାଏ ସମସ୍ତେ ପ୍ରଶଂସାରେ ଖେଳାଳିଙ୍କୁ ପୋତି ପକାଇଥିଲେ । ଅଲିମ୍ପିକ୍ସରେ ଭାରତୀୟ ଖେଳାଳିଙ୍କ ବିଜୟକୁ ନେଇ ଏବେ ବି ଚାରିଆଡେ ଚର୍ଚ୍ଚା ଲାଗିରହିଥିବା ବେଳେ ଏବେ ଖୁସିକୁ ଦ୍ୱିଗୁଣିତ କରିଦେଇଛି ପାରାଅଲିମ୍ପିକ୍ସ । ପାରାଅଲିମ୍ପିକ୍ସରେ ମଧ୍ୟ ଭାରତ ଦୁଇ ଦିନରେ ହାତେଇଛି ୭ଟି ପଦକ । ଯେଉଁଥିରେ ରହିଛି ଦୁଇଟି ସ୍ୱର୍ଣ୍ଣ ।
ସୋମବାରର ଆରମ୍ଭ ହୋଇଥିଲା ଶୁଭ ଖବରରୁ । ସକାଳୁ ସକାଳୁ ହିଁ ଭାରତୀୟ ଖେଳାଳି ଯେଭଳି ପ୍ରଦର୍ଶନ କରି ପଦକ ଆଣିଥିଲେ ଭାରତୀୟଙ୍କ ମନ କୁଣ୍ଢେମୋଟ ହୋଇଯାଇଥିଲା । ସକାଳର ଆରମ୍ଭ ସ୍ୱର୍ଣ୍ଣ ପଦକରୁ ହିଁ ହୋଇଥିଲା । ଏହା ପରେ ପଦକ ସଂଖ୍ୟା ବଢିଚାଲିଥିଲା । ଗୋଟିଏ ଦିନରେ ଭାରତ ହାତେଇଛି ୫ଟି ପଦକ । ଆଜି ପ୍ରଥମେ ସୁଟିଂରେ ସ୍ୱର୍ଣ୍ଣ ପଦକ ଜିତିଥିଲେ ଅବନି ଲେଖରା । ୧୦ ମିଟର ଏୟାର ରାଇଫଲରେ ପ୍ରଥମ ସ୍ଥାନ ଅଧିକାର କରିଥିଲେ ୧୯ ବର୍ଷୀୟା ଅବନି । ପାରାଅଲିମ୍ପିକ୍ସରେ ଭାରତକୁ ସୁଟିଂରେ ସ୍ୱର୍ଣ୍ଣ ମିଳିବା ଏହା ପ୍ରଥମ । ତେଣୁ ସ୍ୱର୍ଣ୍ଣ ପଦକ ଜିତି ଇତିହାସ ରଚିଛନ୍ତି ଅବନି । ଏହା ପରେ ଭାରତକୁ ରୌପ୍ୟ ପଦକ ଦେଇଥିଲେ ଯୋଗେଶ କଥୁରିଆ । ପୁରୁଷ ଡିସକସ ଥ୍ରୋରେ ଯୋଗେଶ କଥୁରିଆ ରୌପ୍ୟ ପଦକ ଜିତିଥିଲେ ।
ସେହିପରି ଜାଭଲିନ ଥ୍ରୋରେ କମାଲ କରିଥିଲେ ଦେବେନ୍ଦ୍ର ଝାଝାରିଆ ଓ ସୁନ୍ଦର ସିଂ ଗୁର୍ଜର ।ଦେବେନ୍ଦ୍ର ରୌପ୍ୟ ପଦକ ଜିତିଥିବା ବେଳେ ସୁନ୍ଦର ସିଂ ବ୍ରୋଞ୍ଜ ପଦକ ଜିତିଥିଲେ । ଦେବେନ୍ଦ୍ର ଝାଝାରିଆ ୬୪.୩୫ ମିଟର ଏବଂ ସୁନ୍ଦର ସିଂ ୬୪.୦୧ ମିଟର ଥ୍ରୋ କରିଥିଲେ । ତେବେ ଦିନ ଆରମ୍ଭ ଅବନି ସ୍ୱର୍ଣ୍ଣରେ ଆରମ୍ଭ କରିଥିବା ବେଳେ ଦିନ ଶେଷ ବି ସ୍ପର୍ଣ୍ଣରେ ହୋଇଛି । ଜାଭେଲିନ ଥ୍ରୋରେ ସୁମିତ ଅନ୍ତିଲ ସ୍ୱର୍ଣ୍ଣପଦକ ହାତେଇଛନ୍ତି । ବିଶ୍ୱ ରେକର୍ଡ ସହ ସୁମିତ ସ୍ୱର୍ଣ୍ଣ ପଦକ ଜିତିଛନ୍ତି । ୬୮.୫୫ ମିଟର ଦୂରକୁ ଜାଭେଲିନ ଫିଙ୍ଗି ସ୍ୱର୍ଣ୍ଣ ପଦକ ଜିତିଛନ୍ତି ସୁମିତ । ଖେଳାଳିଙ୍କ ଆଜିର ଦମଦାର ପ୍ରଦର୍ଶନ ପରେ ପ୍ରଧାନମନ୍ତ୍ରୀ ଖେଳାଳିଙ୍କୁ ଶୁଭେଚ୍ଚା ଜଣାଇଛନ୍ତି । ଗତକାଲି ମଧ୍ୟ ଭାରତକୁ ୨ଟି ପଦକ ମିଳିଥିଲା । ଟେବୁଲ ଟେନିସ ତାରକା ଭାବିନା ପଟେଲ ରୌପ୍ୟ ଆଣିଥିଲେ । ସେହିପରି ହାଇଜମ୍ପରେ ନିଷାଦ କୁମାର ମଧ୍ୟ ରୌପ୍ୟ ପଦକ ଜିତିଥିଲେ । ହେଲେ ଭାରତ ପାଇଁ ଆଉ ଏକ ନିରାଶ ଜନକ ଖବର ହେଲା ଗତକାଲି ଡିସକସ ଥ୍ରୋରେ ବ୍ରୋଞ୍ଜ ପଦକ ହାତେଇଥିବା ବିନୋଦ କୁମାରଙ୍କୁ ତାଙ୍କ ପଦକ ହରାଇବାକୁ ପଡିଛି । ଦିବ୍ୟାଙ୍ଗ ବର୍ଗରେ ଅଯୋଗ୍ୟ ଘୋଷଣା ପରେ ସେ ବ୍ରୋଞ୍ଜ ପଦକ ହରାଇଛନ୍ତି । ଟୋକିଓ ପାରାଅଲିମ୍ପିକ୍ସରୁ ଭାରତକୁ ଏଯାଏ ୭ଟି ପଦକ ମିଳିସାରିଛି । ଟୋକିଓ ଅଲିମ୍ପିକ୍ସରେ ମଧ୍ୟ ଭାରତ ୭ଟି ପଦକ ଜିତିଥିଲା । ଜାଭେଲିନ ଥ୍ରୋରେ ନିରଜ କୁମାର ସ୍ୱର୍ଣ୍ଣ ଜିତି ନୂଆ ରେକର୍ଡ କରିଥିଲେ ।