ଇସ୍ତାହାର ଜାରି କଲା କଂଗ୍ରେସ
୨୬୦୦ ଟଙ୍କାରେ ଧାନ ବିକ୍ରି ସୁଯୋଗ
ବାର୍ଧକ୍ୟ ଭତ୍ତା ବୃଦ୍ଧି, ଚାଷୀଙ୍କୁ ଋଣ ଛାଡ ଲୋଭ
ଭୁବନେଶ୍ୱର:୨୦୧୯ନିର୍ବାଚନରେ ଲୋକଙ୍କ ମନ ଜିଣିବା ଲାଗି ରାଜ୍ୟ କଂଗ୍ରେସ ଯେଉଁ ନିର୍ବାଚନ ଇସ୍ତାହାର ପ୍ରକାଶ କରିଛି, ସେଥିରେ ୧୯ଟି ପ୍ରତିଶ୍ରୁତି ଦେଇଛି । ପିସିସି ସଭାପତି ନିରଞ୍ଜନ ପଟ୍ଟନାୟକ ଆଜି ରାଜ୍ୟ କଂଗ୍ରେସ କାର୍ଯ୍ୟାଳୟରେ ଆସିବ କଂଗ୍ରେସ ହସିବ ଓଡ଼ିଶା ନାମକ ଏ ସଂକ୍ରାନ୍ତ ପୁସ୍ତକର ଉନ୍ମୋଚନ କରିଥିଲେ । କଂଗ୍ରେସ ଇସ୍ତାହାରରେ ପ୍ରତି ପରିବାରକୁ ନିଶ୍ଚିତ ନିଯୁକ୍ତି ମିଳିବ ବୋଲି ପ୍ରତିଶ୍ରୁତି ଦେବା ଚାଷୀ, ମହିଳା, ଯୁବକ, ଆଦିବାସୀଙ୍କ ମନ କିଣିବାକୁ ଚେଷ୍ଟା କରିଛି ।
କଂଗ୍ରେସ ସଂକଳ୍ପ ପତ୍ରରେ କୁହାଯାଇଛି, ଅଖିଳ ଭାରତ କଂଗ୍ରେସ କମିଟିର ନ୍ୟାୟ ଯୋଜନାରେ ପ୍ରତି ଗରିବ ପରିବାରକୁ ମାସିକ ୬ ହଜାର ଟଙ୍କା ସହାୟତା ଦେବା କଥା କୁହାଯାଇଥିଲା । ଏଣୁ ସ୍ୱାଭାବିକ ଭାବେ ରାଜ୍ୟରେ ଯଦି କଂଗ୍ରେସ କ୍ଷମତାକୁ ଆସେ ତେବେ ଗରିବ ଲୋକଙ୍କୁ ମାସିକ ୬ ହଜାର ଟଙ୍କାର ନିଶ୍ଚିତ ରୋଜଗାର ବ୍ୟବସ୍ଥା କରିବ । ଏହି ଟଙ୍କା ଗରିବ ପରିବାରର ମହିଳାଙ୍କ ଖାତାରେ ଜମା କରାଯିବ । ପ୍ରତି ପରିବାରର ଅନ୍ତତଃ ଜଣକୁ ସରକାରୀ ବା ବେସରକାରୀ କ୍ଷେତ୍ରରେ ନିଯୁକ୍ତି, ଚାକିରି ଆରମ୍ଭ ବୟସ ସୀମା ବୃଦ୍ଧି, ବେକାରିଙ୍କୁ ମାସିକ ୩ ହଜାର ଟଙ୍କାର ଭତ୍ତା, ଠିକା କର୍ମଚାରୀଙ୍କୁ ନିୟମିତ କରାଯିବା ଲାଗି ଦଳ ପ୍ରତିଶ୍ରୁତି ଦେଇଛି ।
ବିଜେପି ଭଳି କଂଗ୍ରେସ ବି କହିଛି ଯେ ୨୦୨୪ ମସିହା ସୁଦ୍ଧା ସମସ୍ତଙ୍କୁ ଘର ଦିଆଯିବ । ଏହି ସମୟ ସୁଦ୍ଧା ରାଜ୍ୟର ସବୁ ଗାଁ ଓ ସହରାଞ୍ଚଳର ଲୋକଙ୍କୁ ପିଇବା ପାଣି ସୁବିଧା ବି ଯୋଗାଇ ଦିଆଯିବ । ମନରେଗାରେ ୧୫୦ ଦିନର କାମ, ମହିଳା ସଶକ୍ତିକରଣ ପାଇଁ ସଂସଦ, ବିଧାନସଭା ଓ ସରକାରୀ ଚାକିରିରେ ସେମାନଙ୍କ ଲାଗି ୩୩ ପ୍ରତିଶତ ସଂରକ୍ଷଣ ପ୍ରତିଶ୍ରୁତି ବି କଂଗ୍ରେସ ଦେଇଛି । କେବଳ ସେତିକି ନୁହେଁ, ଚିଟଫଣ୍ଡ ଅର୍ଥ ଫେରସ୍ତ କରାଯିବ ବୋଲି ମଧ୍ୟ ଦଳ ଆଶା ଦେଖାଇଛି ।
ପୂର୍ବ ଘୋଷଣା ମୁତାବକ, କଂଗ୍ରେସ ମହିଳାଙ୍କୁ ମାଗଣା ଶିକ୍ଷା, ଗରିବ ପରିବାରକୁ ବିବାହ ପ୍ରୋତ୍ସାହନ, ବାହାଘର ସମୟରେ ଆର୍ଥିକ ସହାୟତା, ଦ୍ୱାଦଶ ଯାଏ ମାଗଣା ଶିକ୍ଷା ଓ ମହିଳାଙ୍କ ନାମରେ ଥିବା ସମସ୍ତ ମାମଲା ପ୍ରତ୍ୟାହାର କରାଯିବ ବୋଲି ଦଳ ପ୍ରତିଶ୍ରୁତି ଦେଇଛି ।
ପୂର୍ବରୁ ରାହୁଲ ଗାନ୍ଧୀ ଧାନର ସର୍ବନିମ୍ନ ସହାୟକ ମୂଲ୍ୟ କ୍ୱିଣ୍ଟାଲ ପ୍ରତି ୨୬୦୦ ଟଙ୍କା ହେବ ବୋଲି କହିଥିଲେ ।ଏହା ଇସ୍ତାହାରରେ ସ୍ଥାନ ପାଇଛି । ସ୍ୱାମୀନାଥନ୍ କମିଟିକୁ ଗ୍ରହଣ କରାଯିବା, ୩ ବର୍ଷପାଇଁ ବାର୍ଷିକ ୧୦ ହଜାର ଟଙ୍କା ଲେଖାଏଁ ଆର୍ଥିକ ସହାୟତା ବି ଯୋଗାଇ ଦିଆଯିବ । ଚାଷୀଙ୍କ ୨ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଛାଡ, ମାଗଣା ବିଦ୍ୟୁତ, ଯେଉଁଠାରେ ଚାଷୀମାନେ ଋଣ ଫେରାଇଛନ୍ତି, ସେମାନଙ୍କୁ ସେମାନଙ୍କର ଟଙ୍କା ମଧ୍ୟ ସରକାର ଫେରାଇଦେବେ ।
ଏହାବ୍ୟତୀତ ବାର୍ଧକ୍ୟ ଭତ୍ତା ମାସିକ ୧୫୦୦ ଟଙ୍କାକୁ ବୃଦ୍ଧି, ବିଧବା ଓ ଅସହାୟଙ୍କୁ ୨୦୦୦ ଟଙ୍କା ପେନସନ୍, ୭୦ବର୍ଷରୁ ଅଧିକ ବୟସ୍କ ନାଗରିକଙ୍କୁ ୨ହଜାର ଟଙ୍କା ବାର୍ଧକ୍ୟ ଭତ୍ତା ଦେବାକୁ ଦଳ କହିଛି । ଏହାବ୍ୟତୀତ ସବୁ ଡାକ୍ତରଖାନାରେ ମାଗଣା ଚିକିତ୍ସା ଲାଗି ମଧ୍ୟ ନେତାମାନେ ପ୍ରତିଶ୍ରୁତି ରଖିଥିଲେ । ଏହି କାର୍ଯ୍ୟକ୍ରମରେ ଦଳର ବରିଷ୍ଠ ନେତାମାନେ ଉପସ୍ଥିତ ଥିଲେ ।