- ପୁରୀ ବିକାଶ ପେଡି ଖୋଲିଲେ ନବୀନ
- ରାଜ୍ୟବାସୀଙ୍କ ସହଯୋଗ ଲୋଡିଲେ
- ଉପଯୁକ୍ତ ଥଇଥାନ ପାଇଁ ଆଶ୍ୱସ୍ତ କଲେ
ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ପୁରୀ ବିକାଶ ସଂପର୍କରେ ରାଜ୍ୟବାସୀଙ୍କୁ ବାର୍ତା ଦେଇଛନ୍ତି । କହିଛନ୍ତି, ମହାପ୍ରଭୁଙ୍କ ସେବା ଭାବି ପୁରୀ ବିକାଶରେ ସରକାରଙ୍କୁ ସହଯୋଗ କରନ୍ତୁ । ଏହି ତ୍ୟାଗକୁ ଓଡ଼ିଶା ଜାତି ସବୁଦିନ ପାଇଁ ମନେ ରଖିବ । କେବଳ ସେତିକି ନୁହେଁ, ମୁଖ୍ୟମନ୍ତ୍ରୀ ଏ କଥା ବି ଦେଇଛନ୍ତି ଯେ ଶ୍ରୀମନ୍ଦିର ସୁରକ୍ଷା ଜୋନରେ ଯେଉଁମାନଙ୍କ ଘର ବା ଦୋକାନ ଆସୁଛି, ସେମାନଙ୍କର ଠିକ୍ ଭାବେ ଥଇଥାନ କରାଯିବ । ମଠ ଗୁଡିକୁ ପୁଣି ଥରେ ଗଢିବାରେ ରାଜ୍ୟ ସରକାର ସହଯୋଗ କରିବେ ।
ଆଜି ମୁଖ୍ୟମନ୍ତ୍ରୀ ନୂଆଦିଲ୍ଲୀ ଗସ୍ତ ପୂର୍ବରୁ ଲୋକସେବା ଭବନରେ ଏକ ବୈଠକ କରିଥିଲେ । କହିଥିଲେ, ଶ୍ରୀଜଗନ୍ନାଥଙ୍କୁ ସ୍ମରଣ କରି କାମ ଆରମ୍ଭ କଲେ, ସବୁ କାମ ଶୁଭ ହୋଇଥାଏ । ଏହା ଓଡ଼ିଶା ଜାତିର ବିଶ୍ୱାସ । ପୁରୀ ଓଡ଼ିଆ ଜାତିର ପ୍ରାଣକେନ୍ଦ୍ର । ମହାପ୍ରଭୁ ଆମର ଆତ୍ମା । ଶହ ଶହ ବର୍ଷ ଧରି ଶ୍ରୀମନ୍ଦିର ସୁରକ୍ଷା ପାଇଁ ଓଡ଼ିଆ ଜାତି ଅନେକ ତ୍ୟାଗ କରିଛି । ଅନେକ ବଳିଦାନ ଦେଇଛି । ମହାପ୍ରଭୁଙ୍କୁ ଧରି ଚିଲିକାରୁ ସୋନପୁର ପର୍ଯ୍ୟନ୍ତ ବୁଲିଛି । ଶହ ଶହ ବର୍ଷ ଧରି ମହାପ୍ରଭୁ ପାତାଳି ହୋଇ ରହିଛନ୍ତି । ବହୁ ବର୍ଷ ଧରି ପବିତ୍ର ରଥଯାତ୍ରା ମଧ୍ୟ ବନ୍ଦ ହୋଇଯାଇଥିଲା । କିନ୍ତୁ ଓଡ଼ିଆ ଜାତିକୁ ତାର ଆତ୍ମା ମହାପ୍ରଭୁ ଶ୍ରୀଜଗନ୍ନାଥଙ୍କ ଠାରୁ କେହି ଅଲଗା କରିପାରିନାହିଁ । କରିପାରିବେ ନାହିଁ । ବିଶର ମହାନ୍ତିଙ୍କ ତ୍ୟାଗ ଏ ଜାତି କେବେ ଭୁଲିନାହିଁ ।
ମୁଖ୍ୟମନ୍ତ୍ରୀ କହିଛନ୍ତି, ଆମ ସଂସ୍କୃତି, ଆମ ପରମ୍ପରା ମହାପ୍ରଭୁଙ୍କୁ କେନ୍ଦ୍ର କରି ଗଢି ଉଠିଛି । ସେ ହେଉଛନ୍ତି ଆମ ଅସ୍ମିତାର ପ୍ରତୀକ । ଶ୍ରୀମନ୍ଦିର ଓ ମହାପ୍ରଭୁଙ୍କ ସୁରକ୍ଷା ଓଡ଼ିଆ ଜାତିର ଧର୍ମ । ବର୍ତମାନ ସାରା ବିଶ୍ୱ ପାଇଁ ଆତଙ୍କବାଦ ଏକ ବଡ ସମସ୍ୟା ଭାବେ ଦେଖାଦେଇଛି । ଆତଙ୍କବାଦର ଧର୍ମ ନାହିଁ । ବିଭିନ୍ନ ଧର୍ମ ଅନୁଷ୍ଠାନକୁ ସେମାନେ ଟାର୍ଗେଟ କରୁଛନ୍ତି । ତେଣୁ ଶ୍ରୀମନ୍ଦିରର ନିରାପତ୍ତା ପାଇଁ ଆସିଥିବା ସୁପାରିସ କାର୍ଯ୍ୟକାରୀ କରାଯିବା ନିହାତି ଜରୁରୀ ।
ଏଥିରେ କିଛି ପରିବାର ନିଶ୍ଚିତ ପ୍ରଭାବିତ ହେବେ ବୋଲି ସୂଚନା ଦେଇ ମୁଖ୍ୟମନ୍ତ୍ରୀ କହିଛନ୍ତି, ଶ୍ରୀମନ୍ଦିର ନିରାପତ୍ତା ପାଇଁ ଏହି ତ୍ୟାଗ ଗୁରୁତ୍ୱପୂର୍ଣ୍ଣ ।
ମଠ ସଂପର୍କରେ ସୂଚନା ଦେଇ ମୁଖ୍ୟମନ୍ତ୍ରୀ କହିଛନ୍ତି, ସେମାନଙ୍କର ଶ୍ରୀମନ୍ଦିର ସହିତ ସ୍ୱତନ୍ତ୍ର ସଂପର୍କ ରହିଛି । ପୁରୀରେ ଥିବ ସବୁ ମଠକୁ ଅଭଡା ଯୋଜନାରେ ରାଜ୍ୟ ସରକାର ସାହାଯ୍ୟ ଦେବେ । ପ୍ରଥମ ପର୍ଯ୍ୟାୟରେ ଏଥିପାଇଁ ୧୦୦ କୋଟି ଟଙ୍କା ରଖାଯାଇଛି । ମଠ ସଂସ୍କୃତିର ସୁରକ୍ଷା ପାଇଁ ସରକାର ପୂରା ସହଯୋଗ କରିବେ ।
ଫନି ପରେ ପୁରୀ ଗସ୍ତରେ ଯିବା ବେଳର ସ୍ମୃତି ମନେ ପକାଇ ମୁଖ୍ୟମନ୍ତ୍ରୀ କହିଛନ୍ତି, ସେତେବେଳେ ପୁରୀର ଅବସ୍ଥା ଦେଖି ବହୁତ କଷ୍ଟ ଲାଗିଥିଲା । ପୁରୀକୁ ବିଶ୍ୱ ଐତିହ୍ୟ ସହର ଭାବେ ଗଢିବା ପାଇଁ ସେଦିନ ହିଁ ସଂକଳ୍ପ ନେଇଥିଲି । ନିକଟରେ ପୁରୀର ଭିତ୍ତିଭୂମିର ବିକାଶ ପାଇଁ ସରକାର ୨୭୫ କୋଟି ଟଙ୍କାର ପ୍ରକଳ୍ପ ଆରମ୍ଭ କରିବାକୁ ଯାଉଛନ୍ତି । ଆଜି ଆଉ ୫୦୦ କୋଟିର ପ୍ରକଳ୍ପ ଅନୁମୋଦନ ମିଳିଛି । ପୁରୀରେ ରାଜ୍ୟର ପ୍ରଥମ ଟ୍ରମ୍ପେଟ୍ ବ୍ରିଜ ତିଆରି ହେବ । ପୁରୀରେ ଥିବା ପବିତ୍ର ପୋଖରୀର ପୁନରୁଦ୍ଧାର ହେବ । ଅଠରନଳାର ବିକାଶ ହେବ । ମୂଷା ନଦୀର ପୁନରୁଦ୍ଧାର କରାଯାଇ ଏହାକୁ ମଙ୍ଗଳା ନଦୀ ସହିତ ଯୋଡାଯିବ । ପୁରୀରେ ୨୮ ଏକର ଜମିରେ ବହୁତ ବଡ ପୋଖରୀ ନିର୍ମାଣ କରାଯିବ । ଯାତ୍ରୀଙ୍କ ସୁବିଧା ପାଇଁ ପୁରୀକୁ ବହୁ ଲେନ୍ ବିଶିଷ୍ଟ ରାସ୍ତା ଓ ବଡ ପାର୍କିଂ ବ୍ୟବସ୍ଥା ହେବ ।
ମୁଖ୍ୟମନ୍ତ୍ରୀ କହିଛନ୍ତି, ଶ୍ରୀ ଜଗନ୍ନାଥ ହେଉଛନ୍ତି, ଓଡ଼ିଆ ଜାତିିର ସବୁଠାରୁ ବଡ ପରିଚୟ । ପୁରୀ ଧାମର ଗରିମା ବୃଦ୍ଧି ଦିଗରେ ସମସ୍ତଙ୍କ ସହଯୋଗ ମିଳିବା ଉଚିତ୍ । ଏଥିସହିତ ସେ ମୁଖ୍ୟମନ୍ତ୍ରୀଙ୍କ ଆଶୀର୍ବାଦ କାମନା କରିଥିଲେ ।