ଟିମ୍ଵାର୍କକୁ ଗୁରୁତ୍ୱ ଦେଲେ ମୁଖ୍ୟମନ୍ତ୍ରୀ, ଖୋଲା ସଭାରେ ମନ କଥା ଖୋଲି କହିଲେ
ସରକାରର ସଫଳତା ପଛରେ ମନ୍ତ୍ରୀ, ବିଧାୟକ ଓ ବାବୁଙ୍କ ମିଳିତ ଉଦ୍ୟମ ରହିଛି
ଭୁବନେଶ୍ୱର: ଗତ ୨୦ବର୍ଷର ସରକାରୀ ଆଭିମୁଖ୍ୟରେ ବଡ଼ ପରିବର୍ତନ ଘଟିଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଥମ ଥର ପାଇଁ ଟିମ୍ ଵାର୍କ କଥା ସଙ୍କେତ ଦେଇଛନ୍ତି । ସରକାରର ସଫଳତା ପଛରେ ମନ୍ତ୍ରୀ, ବିଧାୟକ ଓ ଅଫିସରଙ୍କ ଭୂମିକାକୁ ଖୋଲାଖୋଲି କହିଛନ୍ତି । ନବୀନଙ୍କର ଏଭଳି ସଙ୍କେତ ରାଜ୍ୟ ରାଜନୀତି ପାଇଁ ବାର୍ତା ବଡ଼ ବାର୍ତା ରଖୁଛି । ପର୍ଯ୍ୟବେକ୍ଷକ ମହଲ ଏହାକୁ ନେଇ ତର୍ଜମା ଆରମ୍ଭ କରିଦେଲେଣି । ଏହାର ପ୍ରଭାବ ପ୍ରଶାସନ ଓ ସରକାର ଉପରେ କିଭଳି ରହିବ, ତାକୁ ନେଇ ବି ଅଙ୍କକଷା ଚାଲିଛି ।
କାରଣ, ଆଜିଯାଏ ରାଜ୍ୟ ସରକାରରେ ଯେତେବେଳେ ଯାହା ହେଉଥିଲା, ତାର ଶ୍ରେୟ ଏକା ମୁଖ୍ୟମନ୍ତ୍ରୀଙ୍କୁ ଯାଉଥିଲା । ଦଳ ବାରମ୍ୱାର ନିର୍ବାଚନ ଜିତୁ କି ସରକାରରେ କୌଣସି ପ୍ରକଳ୍ପ ପ୍ରତିଷ୍ଠା ହେଉ । ନେତା, ମନ୍ତ୍ରୀ, ବାବୁ, ଦଳୀୟ କର୍ମୀଙ୍କ ଯାଏ ସମସ୍ତେ ସବୁ ବେଳେ ସବୁ ଶ୍ରେୟ ଅଯାଚିତ ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଦେଉଥିଲେ । ଏ ନେଇ ମୁଖ୍ୟମନ୍ତ୍ରୀ କେବେ ବି ଆପତ୍ତି ଉଠାଇନାହାନ୍ତି । ଆଉ ସବୁର ଉର୍ଧ୍ୱରେ ସେ, ଏମିିତି ଏକ ବାତାବରଣ ତିଆରି ପାଇଁ ଏହା ଖୋରାକ ଯୋଗାଇଥିଲା । ସରକାର ବା ଦଳରେ ଭୁଲ କାମ ପାଇଁ ଅନ୍ୟମାନେ ଦଣ୍ଡିତ ହେଉଥିଲେ, ଅଥଚ ସଫଳତାରେ ସେମାନଙ୍କୁ କେବେ କେହି ସ୍ୱୀକୃତି ଦେଇନାହିିଁ । ଏହାଦ୍ୱାରା କିଛି ହେଉ କି ନ ହେଉ, ଶରୀର ତ ବିଜେଡି ବା ସରକାରରେ ଥିଲା, ଅଧିକାଂଶ ନେତା ଓ ମନ୍ତ୍ରୀଙ୍କ ମନ କିନ୍ତୁ ଆଉ କେଉଁଠି ବୁଲୁଥିଲା । ପରୋକ୍ଷ ବା ପ୍ରତ୍ୟକ୍ଷ ଭାବେ ସରକାର ଓ ବିଜେଡି ଏଥିପାଇଁ ଅନେକ କ୍ଷତି ସହିଛନ୍ତି ।
ମୁଖ୍ୟମନ୍ତ୍ରୀଙ୍କୁ କେହି ଏକଥା କହୁ ବା ସେ ନିଜେ ଅନୁଭବ କରିଛନ୍ତି, ତାହା ଜାଣିବା ମୁସ୍କିଲ । କିନ୍ତୁ ସରକାର ଓ ଦଳରେ ଟିମ୍ ଵାର୍କ ସଙ୍କେତ ଦେଇ ନବୀନ ଜାତୀୟ ରାଜନୀତିକୁ ଭିନ୍ନ ବାର୍ତା ଦେଇଛନ୍ତି । ଦେଶରେ ମୁଁ କୁ ନେଇ ରାଜନୀତି ଚାଲିଥିବା ବେଳେ ଓଡ଼ିଶାର ଶାସନରୁ ଆସୁଥିବା ଏହି ପରିବର୍ତନର ଗନ୍ଧର ବଡ଼ ପ୍ରଭାବ ପଡିବ ବୋଲି କୁହାଯାଉଛି ।
ଗତକାଲି ଏକ ଇଂରାଜି ଗଣମାଧ୍ୟମର ସାହିତ୍ୟ ଉତ୍ସବରେ ମୁଖ୍ୟମନ୍ତ୍ରୀ ତାଙ୍କର ସଫଳତା ସଂପର୍କରେ କହିବା ବେଳେ ଶ୍ରେୟ ବାଣ୍ଟିଥିଲେ । ରାଜନୈତିକ ପର୍ଯ୍ୟବେକ୍ଷକ ମହଲର କହିବା କଥା ହେଉଛି, ଏବେ ନବୀନ ଯାହା କହିଲେ, ତାକୁ ଆଚରଣରେ ପ୍ରଦର୍ଶନ କରିବା ଦରକାର । ତେବେ ଲୋକସେବା ଭବନରେ ମନ୍ତ୍ରୀଙ୍କ ଗୁରୁତ୍ୱ ବଢିବ, ବିଧାନସଭାରେ ବିଧାୟକଙ୍କର । ପ୍ରଶାସନରେ ସବୁ ବିଭାଗର ସଚିବ ଯେଭଳି ଗୁରୁତ୍ୱ ପାଇବେ, ନିର୍ଦେଶକ, କର୍ମଚାରୀଙ୍କୁ ବି ସମ ପରିମାଣରେ ସ୍ୱୀକୃତି ମିଳିବ । ଜିଲ୍ଲାପାଳ ଜିଲ୍ଲାରେ ସର୍ବେସର୍ବା ହୋଇପାରନ୍ତି, କିନ୍ତୁ ଗାଁର ଶିକ୍ଷକର ଅବଦାନ ବି ଜାତି ଗଢିବାରେ କମ୍ ନାହିଁ । କୃଷି ଅଧିକାରୀମାନେ ପରିସଂଖ୍ୟାନ ଓ ତଥ୍ୟର ଯାଦୁରେ ନିଜର ପାଣ୍ଡିତ୍ୟ ପ୍ରଦର୍ଶନ କରିପାରନ୍ତି, କିନ୍ତୁ ଚାଷୀର ଅନୁଭବକୁ ବି ସମ୍ମାନ ମିଳିବା ଦରକାର । ଏହା ହେଲେ ଯାଇ ନୂଆ ଓଡ଼ିଶା ଗଠନ ହୋଇପାରିବ ବୋଲି ଏହି ମହଲ ମତ ରଖୁଛନ୍ତି ।