ଖୋଲା ଉଲ୍ଲଂଘନ କରିଛନ୍ତି ପର୍ଯ୍ୟଟନ ମନ୍ତ୍ରୀ
ଭ୍ରଷ୍ଟାଚାରକୁ ଇଙ୍ଗିତ କରୁଛି କାରନାମା, ଲୋକାୟୁକ୍ତ ଟାଣିପାରନ୍ତି
ମୁଖ୍ୟମନ୍ତ୍ରୀଙ୍କୁ ବଦନାମ ପାଇଁ ବଡ଼ ଧରଣର ଷଡ଼଼ଯନ୍ତ୍ର
ଭୁବନେଶ୍ୱର: ଦୁଇ ମହିଳାଙ୍କ ସହ ପର୍ଯ୍ୟଟନ ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀଙ୍କ ହାଇଦ୍ରାବାଦ ଗସ୍ତ ପ୍ରସଙ୍ଗକୁ ଚାପିଦେବା ଲାଗି ଯେତିକି ଉଦ୍ୟମ ହେଉଛି, ଏ ସଂପର୍କରେ ସେତିକି ଅଧିକ ରୋଚକ ତଥ୍ୟ ହସ୍ତଗତ ହେବାରେ ଲାଗିଛି । ସଂପୃକ୍ତ ମହିଳାଙ୍କୁ ନିଜର ସମ୍ପର୍କୀୟା ବୋଲି ଦର୍ଶାଇ ମନ୍ତ୍ରୀ ଖୋଦ୍ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ବିଭ୍ରାନ୍ତି ଜାଲରେ ଛନ୍ଦି ଦେଇଛନ୍ତି । ବିଶ୍ୱସ୍ତସୂତ୍ରରୁ ମିଳିଥିବା ସୂଚନା ମୁତାବକ, ଏକ ବଡ଼ ପ୍ରଭାବଶାଳୀ ଗୋଷ୍ଠୀ ମନ୍ତ୍ରୀଙ୍କ ସୁରକ୍ଷା ପାଇଁ ଅଣ୍ଟା ଭିଡିଛନ୍ତି ।
ହେଲେ ଯେଉଁ ପ୍ରସଙ୍ଗଟି ଏବେ ବୁଦ୍ଧିଜୀବୀ ମହଲକୁ ଆନ୍ଦୋଳିତ କରୁଛି, ତାହା ହେଉଛି, ମୁଖ୍ୟମନ୍ତ୍ରୀଙ୍କ ଚେହେରାରେ ଦାଗ ଲଗାଇବା ପାଇଁ ଏକ ବିଧିବଦ୍ଧ ଷଡ଼ଯନ୍ତ୍ର ଆରମ୍ଭ ହୋଇଛି । ଅତୀତରେ ମନ୍ତ୍ରୀ ମନମୋହନ ସାମଲଙ୍କୁ ମୁଖ୍ୟମନ୍ତ୍ରୀ ଗୋଟିଏ ଝଟକାରେ ବିଦା କରିଥିଲେ । ତତ୍କାଳୀନ ବାଚସ୍ପତିଙ୍କ ବିରୋଧରେ ଅଭିଯୋଗ ଆସିଲା ବୋଲି ପ୍ରମାଣ ଅାଗରୁ ତାଙ୍କୁ ଇସ୍ତଫା ଦେବାର ବାଟ ଫିଟାଯାଇଥିଲା । ସବୁଠାରୁ ବଡ କଥା ହେଲା, ଯେଉଁ କଥାଟି ଏହି ପ୍ରସଙ୍ଗରେ ସବୁଠାରୁ ବିସ୍ମୟକର, ତାହା ହେଉଛି, ରାଜଭବନରେ ମନ୍ତ୍ରୀ ନେଇଥିବା ଶପଥର ଖୋଲା ଉଲ୍ଲଂଘନ ହୋଇଛି । କୌଣସି ସଂପର୍କୀୟ ପାଇଁ ବା କାହା କଥାରେ ପ୍ରଭାବିତ ନ ହେବା ଲାଗି ରାଜଭବନରେ ମୁଖ୍ୟମନ୍ତ୍ରୀଙ୍କ ସାମ୍ନାରେ ତଥା ରାଜ୍ୟପାଳ ସଂପୃକ୍ତ ମନ୍ତ୍ରୀଙ୍କୁ ଯେଉଁ ଶପଥ କରାଇଥିଲେ, ତାହାକୁ ସେ ପୋଡିଖାଇଛନ୍ତି । ମନ୍ତ୍ରୀଙ୍କ ବିରୋଧରେ ଏଯାଏ କାର୍ଯ୍ୟାନୁଷ୍ଠାନ ନ ହେବା, ସୂଚାଉଛି ଯେ ରାଜଭବନରେ ମନ୍ତ୍ରୀଙ୍କ ଶପଥ ପାଠ ଯେମିତି ମୂଲ୍ୟହୀନ ।
କେବଳ ସେତିକି ନୁହେଁ, ସଂପୃକ୍ତ ମହିଳାଙ୍କ ଠାରୁ ସଂପର୍କ ଲୁଚାଇବାକୁ ଯାଇ ଯେଉଁ ଗଳାବାଟ ତିଆରି କରାଯାଇଛି, ତାହା ଆହୁରି ବିପଜ୍ଜନକ ସାବ୍ୟସ୍ତ ହୋଇଛି । ତାହା ବ ରାଜଭବନ ଶପଥ ପାଠର ଖୋଲା ଉଲ୍ଲଂଘନ କରୁଛି । ସରକାରରେ ଭ୍ରଷ୍ଟାଚାରକୁ ଇଙ୍ଗିତ କଲେଣି । ଏ କ୍ଷେତ୍ରରେ ଗୁରୁବାର କଂଗ୍ରେସ ଯେଉଁ ଅଭିଯୋଗ ଆଣିଛି, ତାହା ସତ୍ୟ ହୋଇଥିଲେ ସାଂଘାତିକ । ହାଇଦ୍ରାବାଦରେ ଏକ ସରକାରୀ କାର୍ଯ୍ୟକ୍ରମରେ ଯୋଗଦେବାକୁ ମନ୍ତ୍ରୀ ଯାଇଥିଲେ । ହେଲେ ମନ୍ତ୍ରୀଙ୍କ ଗସ୍ତ ଓ ରହଣୀ ବାବଦ ଅର୍ଥ କେଉଁ ପରିସ୍ଥିତିରେ ଅବା କାହିିଁକି ଫେଡେରେସନ୍ ଅଫ୍ ଚାମ୍ୱର ଅଫ କମର୍ସ ବହନ କଲା, ତାହା ବୁଝାପଡୁନାହିିଁ । ରାଜ୍ୟ ସରକାର ଏ ଦିଗକୁ ତଦନ୍ତ ନ କଲେ, ଲୋକାୟୁକ୍ତ ତଦନ୍ତ କରି ସରକାରଙ୍କୁ ଅକଳରେ ପକାଇବାର ସମ୍ଭାବନାକୁ ଏଡାଇ ଦେଇ ହେବ ନାହିଁ ।
ଏହି ଘଟଣାରେ ଆହୁରି ଏକ ଗୁରୁତ୍ୱପୂର୍ଣ୍ଣ ଦିଗ ହେଉଛି, ମନ୍ତ୍ରୀଙ୍କ ବ୍ୟକ୍ତିଗତ ସଚିବ ତାଙ୍କ ଚିଠିରେ ସଂପୃକ୍ତ ଦୁଇ ମହିଳାଙ୍କ ବିମାନଯାତ୍ରା ପାଇଁ ଲେଖିଛନ୍ତି । ଏହା ମଧ୍ୟ ଭ୍ରଷ୍ଟାଚାରକୁ ଇଙ୍ଗିତ କରୁଛି । ସରକାର ଏଯାଏ ଏ ଦିଗଟିକୁ ଗୁରୁତ୍ୱର ସହ ଗ୍ରହଣ କରିନାହାନ୍ତି, ଯାହା ଲୋକାୟୁକ୍ତଙ୍କ ନିକଟରେ ମନ୍ତ୍ରୀଙ୍କୁ ଦୋଷୀ କରିବା ପାଇଁ ଯଥେଷ୍ଟ ।
ଉଲ୍ଲେଖଯୋଗ୍ୟ, ସଂପୃକ୍ତ ମହିଳାଙ୍କ ସହ ମନ୍ତ୍ରୀଙ୍କ ସଂପର୍କ ଘଟଣାରେ ଯେତିକି ଗୁରୁତ୍ୱ ବହନ କରୁନି, ରାଜ୍ୟ ସରକାରଙ୍କୁ ଜଣେ ମନ୍ତ୍ରୀ ଭ୍ରଷ୍ଟାଚାର ଭିତରକୁ ଟାଣିନେଇଥିବା ଘଟଣା ସେତିକି ଗମ୍ଭୀର ବୋଲି ସାଧାରଣରେ ଚର୍ଚ୍ଚା ଆରମ୍ଭ ହେଲାଣି । ରାଜ୍ୟ ସରକାର ଗୋଟିଏ ପଟେ ଶୂନ ସହନଶୀଳତା ବା ଜିରୋ ଟଲରାନ୍ସ ନୀତି ଗ୍ରହଣ କରୁଛନ୍ତି । ୪୦ରୁ ଅଧିକ ସରକାରୀ କର୍ମଚାରୀଙ୍କୁ ଚାକିରିରୁ ବିଦା କରିସାରିଲେଣି । ଯଦି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କ କ୍ୟାବିନେଟ୍ ସହଯୋଗୀଙ୍କ ଭ୍ରଷ୍ଟାଚାରକୁ ସୁରକ୍ଷା ଦିଅନ୍ତି, ତେବେ ଅନ୍ୟ ସରକାରୀ କର୍ମଚାରୀଙ୍କ ବିରୋଧରେ ଭ୍ରଷ୍ଟାଚାର ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ସ୍ୱାଭାବିକ ଭାବେ ପ୍ରଶ୍ନଚିହ୍ନ ସୃଷ୍ଟି କରିବ ।
କୌତୂହଳର କଥା ହେଉଛି, ସଂପୃକ୍ତ ମନ୍ତ୍ରୀଙ୍କ ଅନୈତିକ ଓ ଭ୍ରଷ୍ଟାଚାରୀ କାର୍ଯ୍ୟକୁ ଶାସକ ଦଳ ନେତାମାନେ ଖୋଲାଖୋଲି ସୁରକ୍ଷା ଦେଉଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସରକାରରେ ପୂର୍ବରୁ ଏଭଳି ସ୍ଥିତି ଉପୁଜିନଥିଲା । ମନ୍ତ୍ରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆନଯିବା ଭଳି ଏହି ପ୍ରସଙ୍ଗରେ ବି ଦଳର ଶୀର୍ଷ ନେତୃତ୍ୱ ସେମାନଙ୍କୁ ତାଗିଦ୍ କରୁନାହାନ୍ତି । ଗୁରୁବାର ସରକାରୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକଙ୍କ ମନ୍ତବ୍ୟ ଏହାର ଅଂଶବିଶେଷ ବୋଲି କୁହାଯାଇପାରେ ।