- ଲଟେରି ଉପରେ ୨୮ ପ୍ରତିଶତ ଜିଏସଟି ଲାଗୁ ପାଇଁ ନିଷ୍ପତ୍ତି
- ବିରୋଧ କଲେ ୮ ରାଜ୍ୟ, ସପକ୍ଷରେ ୨୧ ରାଜ୍ୟ ଦେଲେ ଭୋଟ
ନୂଆଦିଲ୍ଲୀ: ଲଟେରି ଉପରେ ୨୮% ଜିଏସଟି ଲାଗୁ ହେବ। ଜିଏସଟି ପରିଷଦ ବୈଠକରେ ଏ ନେଇ ନିଷ୍ପତ୍ତି ହୋଇଛି। ବିଭିନ୍ନ ରାଜ୍ୟ ମଧ୍ୟରେ ଏ ନେଇ ସହମତି ପ୍ରକାଶ ପାଇନଥିଲା। ଫଳରେ ପ୍ରଥମ ଥର ପାଇଁ ଜିଏସଟି ପରିଷଦ ବୈଠକରେ ଭୋଟିଂ ହୋଇଥିବା ଘଟଣା ସାମ୍ନାକୁ ଆସିଛି। ବିଭିନ୍ନ ସାମଗ୍ରୀ ଓ ସେବା କ୍ଷେତ୍ରରେ ଜିଏସଟି ଲାଗୁ ନେଇ ମଧ୍ୟ ପୂର୍ବରୁ କେବେ ଏଭଳି ବିବାଦର ସୂ୍ତ୍ରପାତ ହୋଇନଥିଲା।
ନିଷ୍ପତ୍ତି ଅନୁସାରେ, ଆସନ୍ତା ମାର୍ଚ୍ଚ ପହିଲାରୁ ଉଭୟ ଘରୋଇ ଓ ସରକାରୀ ଲଟେରି ଉପରେ ୨୮ ପ୍ରତିଶତ ଜିଏସଟି ଲାଗୁ ହେବ। ଲଟେରିରେ ଜିଏସଟି ବୃଦ୍ଧିକୁ ୨୧ଟି ରାଜ୍ୟ ସମର୍ଥନ କରିଥିବା ବେଳେ ୮ଟି ରାଜ୍ୟ ବିରୋଧ କରିଥିଲେ। ବର୍ତମାନ ରାଜ୍ୟସ୍ତରରେ ଲଟେରି ଉପରେ ୧୨ ପ୍ରତିଶତ ଓ ରାଜ୍ୟ ବାହାରେ ଲଟେରି ଉପରେ ୨୮ ପ୍ରତିଶତ ଜିଏସଟି ଆଦାୟ ହେଉଛି।
ଉଲ୍ଲେଖଯୋଗ୍ୟ, ଲଟେରି ଶିଳ୍ପ ଜିଏସଟି ବ୍ୟବସ୍ଥାର ନିଷ୍ପତ୍ତିକୁ ବିରୋଧ କରି ଆସୁଥିଲା। ଦ୍ବୈତ ବ୍ୟବସ୍ଥା ପରିବର୍ତେ ଲଟେରି ଉପରେ ୧୨ ପ୍ରତିଶତ ଟିକସ ଓ ପ୍ରାଇଜ ମନି ଉପରେ ଟିକସ ଛାଡ ନେଇ ସେମାନେ ଦାବି କରୁଛନ୍ତି।