ପ୍ରମୁଖ ଖବର

ସାତ ବର୍ଷ ପରେ ପୁଣି ହକି ଇଣ୍ଡିଆ ଲିଗ୍‌: ଡିସେମ୍ବର ୨୭ରୁ ଟୁର୍ଣ୍ଣାମେଣ୍ଟ ଆରମ୍ଭ, ଓଡ଼ିଶାର ଟିମ୍‌ ଖେଳିବ ମ୍ୟାଚ୍‌
ସୁପ୍ରିମକୋର୍ଟରୁ ଜାମିନ ମିଳିଲା ପରେ ମଧ୍ୟ ଜେଲରୁ ବାହାରି ପାରିବେନି କେଜ୍ରିୱାଲ
ଆସ୍ଥା ଭୋଟ୍ ହାରିଲେ ନେପାଳ ପ୍ରଧାନମନ୍ତ୍ରୀ ପ୍ରଚଣ୍ଡ
ରଥ ଉପରକୁ ମୋବାଇଲ ମନା; ନିୟମ ଭାଙ୍ଗିଲେ ହେବ କଡା କାର୍ଯ୍ୟାନୁଷ୍ଠାନ
ଶ୍ରୀମନ୍ଦିର ମୁଖ୍ୟ ପ୍ରଶାସକ ଭାବେ ନିଯୁକ୍ତ ହେଲେ ଅରବିନ୍ଦ ପାଢ଼ୀ
ଫୁଟବଲ ଆସୋସିଏଶନ ଅଫ ଓଡ଼ିଶାର ସଭାପତି ହେଲେ ସମୀର ଦେ
ରାଜଭବନ କର୍ମଚାରୀଙ୍କୁ ମାଡମାରିଲେ ରାଜ୍ୟପାଳ ରଘୁବର ଦାସଙ୍କ ପୁଅ
ଭୁବନେଶ୍ୱର ସପ୍ତମ ବାଟାଲିୟନ କ୍ୟାମ୍ପସରୁ ଜଣେ ଯବାନଙ୍କ ଝୁଲନ୍ତା ମୃତଦେହ ଜବତ

ମୋର୍ଚ୍ଚା ସମ୍ଭାଳିଛନ୍ତି ଅସିତ୍-ପାଣ୍ଡିଆନ୍ ଟିମ୍

0

ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶାସନ କ୍ଷମତାକୁ ଆସିବା ପରଠାରୁ ରାଜ୍ୟରେ ଆଇଏଏସ୍ ଅଫିସରମାନଙ୍କର କ୍ଷମତା ବୃଦ୍ଧି ନେଇ ସବୁବେଳେ ଚର୍ଚ୍ଚା ହୋଇ ଆସିଛି। କେତେବେଳେ ବେଣୁ ମିଶ୍ର ତ ଆଉ କେବେ ଯୁଗଳ ମହାପାତ୍ର। କେବେ ବିଜୟ ପଟ୍ଟନାୟକ, କେବେ ଆଦିତ୍ୟ ପାଢୀ। ମନ୍ତ୍ରୀଙ୍କ ଅପେକ୍ଷା ନବୀନ ସରକାରରେ ଅଫିସରମାନେ ସବୁବେଳେ ଚଳଚଞ୍ଚଳ ରହିଆସିବାର କାରଣ ଅନେକ ବାର ଦେଖାଯାଇଛି। କାରଣ ମନ୍ତ୍ରୀମାନଙ୍କ ଅପେକ୍ଷା ପ୍ରଶାସନରେ ବାବୁମାନେ ଅଧିକ ସକ୍ରିୟ ରହୁଛନ୍ତି। କାହିଁକି କେଜାଣି ଏ ଦିଗରେ ନବୀନ ସରକାର ଅମଳରେ କେହି କେବେ ଆଗ୍ରହ ଦେଖାଇନାହାନ୍ତି। ବନ୍ୟା, ବାତ୍ୟା, ମରୁଡି ମୁକାବିଲା କ୍ଷେତ୍ରରେ ନେତୃତ୍ବ ଯେଭଳି ସକ୍ରିୟ ରହିବା କଥା ତାହା ପରିଦୃଷ୍ଟ ହୋଇନାହିଁ।

ଏପରିକି ଏକଥା ବି ଦେଖାଯାଇଛି ଯେ ରାଜ୍ୟରେ ଯେତେ ବିପର୍ଯ୍ୟୟ ଆସିଛି, ସେଥିରେ ନେତାଙ୍କ ଅପେକ୍ଷା ଅଫିସରମାନେ ହିଁ ବେଶୀ ଗୁରୁ ଦାୟିତ୍ବ ନିର୍ବାହ କରିଥାନ୍ତି। ଦେହକୁ ଲଗାଇ କାମ କରିଥାନ୍ତି। ଫାଇଲିନ୍ ବେଳେ ଯୁଗଳ ମହାପାତ୍ର-ପ୍ରଦୀପ ଜେନାଙ୍କ ଠାରୁ ଆରମ୍ଭ କରି ଫନିରେ ଅସିତ୍-ପାଣ୍ଡିଆନ୍ ଯୋଡିଙ୍କ ପର୍ଯ୍ୟନ୍ତ ଯୋଗଦାନ କିଛି କମ୍ ନୁହେଁ। ନେତାମାନେ ଓଡ଼ିଶାରେ ଏ କ୍ଷେତ୍ରରେ ପଛରେ। ସେ ମେଣ୍ଟ ସରକାର ଥାଉ କି କେବଳ ବିଜେଡି ସରକାର। ହାତଗଣତି ଦୁଇ ତିନି ଜଣଙ୍କୁ ଛାଡିଦେଲେ ଅନ୍ୟ ନେତାଙ୍କ ସକ୍ରିୟତା ନିଜ ବିଭାଗରେ ଯେମିତି କମ୍, ଯେ କୌଣସି ପରିସ୍ଥିତି ମୁକାବିଲା କ୍ଷେତ୍ରରେ ବି ସେମିତି।

ତେବେ ପ୍ରଶାସନ ସକ୍ରିୟ ଥିଲେ ବି କେଉଁଠି କେଜାଣି ସେମାନଙ୍କ ଭିତରେ ଥିବା ବିଭେଦ ସାମ୍ନାକୁ ଚାଲିଆସିଥାଏ। ଗୋଷ୍ଠୀ ବାଦ ମୁଣ୍ଡ ଟେକିଥାଏ। ନେତାମାନଙ୍କ କ୍ଷେତ୍ରରେ ବି ସମାନ ସ୍ଥିତି। ହେଲେ ପ୍ରଥମ ଥର ପାଇଁ ମୁଖ୍ୟଶାସନ ସଚିବ ଓ ମୁଖ୍ୟମନ୍ତ୍ରୀଙ୍କ ଅଫିସ ଭିତରେ ସମନ୍ବୟ ଏତେ ଅଧିକ ଥିବା ଜଣାପଡୁଛି, ଯାହା ନବୀନଙ୍କ ଗତ ୧୯ବର୍ଷରେ ନଥିଲା। ମୁଖ୍ୟସଚିବ ଅସିତ ତ୍ରିପାଠୀ ଓ ଭି କାର୍ତିକେୟନ୍ ପାଣ୍ଡିଆନଙ୍କ ଟିମ୍ କରୋନା ପାଇଁ ଯେତିକି ଅଧିକ ସକ୍ରିୟ ଭାବେ ଦାୟିତ୍ବ ନିର୍ବାହ କରୁଛନ୍ତି, ସେତିକି ସେତିକି ଏମାନଙ୍କ ଭିତରେ ଥିବା ସଂପୃକ୍ତି ଚର୍ଚ୍ଚାକୁ ଆସୁଛି। ପୂର୍ବରୁ ସବୁବେଳେ ଯେ ଅପଡ ଥିଲା ତାହା ନୁହେଁ, ଶ୍ରୀ ପାଢୀ ମୁଖ୍ୟସଚିବ ଥିବା ବେଳେ ତୃତୀୟ ମହଲାରେ ତାଙ୍କର ଢେର୍ ଦିନ ଯାଏ ବେଶ୍ ପ୍ରଭାବ ଥିଲା। ଅବଶ୍ୟ ଶେଷ ବେଳକୁ ସେ ନିଷ୍ପ୍ରଭ ହୋଇଯାଇଥିଲେ।

ନିକଟରେ ଓଡ଼ିଶାବାସୀ ଦେଖିଛନ୍ତି, ବିଭିନ୍ନ ପର୍ଯ୍ୟଟନ କ୍ଷେତ୍ର ସ୍ଥିତି ସମୀକ୍ଷା କରିବା ବେଳେ ମୁଖ୍ୟଶାସନ ସଚିବ ଶ୍ରୀ ତ୍ରିପାଠୀ ଏକ ଗାଡି ଚଳାଉଥିଲେ ଓ ପାଣ୍ଡିଆନ୍ ଏବଂ ପୂର୍ତ ସଚିବ ଡ.କ୍ରିଷନ୍ କୁମାର ସେଥିରେ ବସିଥିଲେ। ଏହାକୁ ଗୋଟିଏ ପକ୍ଷ ନାପସନ୍ଦ କରିଥିଲେ। କିନ୍ତୁ ଅନ୍ୟ ଗୋଟିଏ ପକ୍ଷ ଶ୍ରୀ ତ୍ରିପାଠୀଙ୍କ ନେତୃତ୍ବ ନେବାର କୌଶଳକୁ ପ୍ରଶଂସା କରିବାକୁ ଭୁଲିନଥିଲେ। ସାଙ୍ଗରେ ମୁଖ୍ୟମନ୍ତ୍ରୀଙ୍କ ଅଫିସକୁ ରଖି ସେ ପ୍ରଶାସନରେ ନିଜର ବଳିଷ୍ଠ ବ୍ୟକ୍ତିତ୍ବକୁ ସାମ୍ନାକୁ ଆଣିବାକୁ ଚାହିଁଥିଲେ। ତତ୍କାଳ କାର୍ଯ୍ୟକ୍ରମ ନେବାରେ ଏହି କୌଶଳ କେତେ ଉପଯୋଗୀ ଏକଥା ମ୍ୟାନେଜମେଣ୍ଟ କରିଥିବା ଯେ କୌଣସି ବିଶେଷଜ୍ଞ ବୁଝନ୍ତି।

ସମାନ କୌଶଳରେ ଏବେ ଦେଖାଯାଉଛି, କରୋନା ମୁକାବିଲାରେ ମୁଖ୍ୟସଚିବ ଦିନରାତି ଏକ କରି କାମ କରୁଛନ୍ତି। କେତେବେଳେ ନିଜେ ଯାଇ କଲ୍ ସେଣ୍ଟର ଦେଖିଲେଣି ତ ଆଉ କେତେବେଳେ ପ୍ରବାସୀ ଓଡ଼ିଆ ଶ୍ରମିକଙ୍କ ସଂପର୍କରେ ବୈଠକ ନେଲେଣି। ସେହିଭଳି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ପାଣ୍ଡିଆନ୍ ଘନ ଘନ ବୈଠକ ନେଉଛନ୍ତି। ସମାନ୍ତରାଳ ଭାବେ ସ୍ବତନ୍ତ୍ର ସଚିବ ଡି ଏସ କୁଟ୍ଟେ ପାଣ୍ଡିଆନଙ୍କ ଟିମରେ ବେଶ ସକ୍ରିୟ ଅଛନ୍ତି। ଉଭୟ ନକ୍ସା ପ୍ରସ୍ତୁତ କରୁଛନ୍ତି। ଏମାନଙ୍କ ଟିମରେ ଆଇଏଏସ ରୁପାରୋଶନ ସାହୁ, ପ୍ରଦୀପ୍ତ ମହାପାତ୍ର, ଆଇଆରଏସ ମନୋଜ ମିଶ୍ର, ଅବସରପ୍ରାପ୍ତ ଆଇଏଏସ୍ ଦିଲ୍ଲୀପ ମହାନ୍ତି ପ୍ରମୁଖ ଦିନ ରାତି ଏକ କରି କାମ କରୁଛନ୍ତି। ଏମାନଙ୍କ ଟିମରେ ଏବେ ବେଶ ସକ୍ରିୟ ଅଛନ୍ତି କ୍ରିଷନ୍ କୁମାର, ଆଇଜି ଅମିତାଭ ଠାକୁର। ସାମ୍ନାରେ ନ ଥିଲେ ବି କେନ୍ଦ୍ରାଞ୍ଚଳ ଡିଆଇଜି ଆଶିଷ ସିଂହଙ୍କ ଭୂମିକା କିଛି କମ୍ ଗୁରୁତ୍ବପୂର୍ଣ୍ଣ ନୁହେଁ। ସେହିଭଳି ସୂଚନା ଓ ଲୋକସଂପର୍କ ବିଭାଗର ସଚିବ ସଂଜୟ ସିଂହ ମଧ୍ୟ ଏବେ ବେଶ ସକ୍ରିୟ ଅଛନ୍ତି। ହେଲେ ସମସ୍ତେ ଜାଣି ଆଶ୍ଚର୍ଯ୍ୟ ହେବେ ଏହି ଟିମକୁ ପଛରେ ରହି ପରାମର୍ଶ ଦେଉଛନ୍ତି ମୁଖ୍ୟମନ୍ତ୍ରୀଙ୍କ ମୁଖ୍ୟ ପରାମର୍ଶଦାତା ଆର ବାଲକ୍ରିଷନ୍। ଏବଂ ସରକାରଙ୍କ ସବୁ ଭଲକାମକୁ ସାମ୍ନାକୁ ଆଣିବା ଲାଗି ସୁବ୍ରତ ବାଗଚୀଙ୍କୁ ରଖାଯାଇଛି।

ସେପଟେ ମୁଖ୍ୟସଚିବ ତାଙ୍କ ଟିମରେ ଉନ୍ନୟନ କମିସନର ସୁରେଶ ମହାପାତ୍ର, ରାଜସ୍ବ ସଚିବ ପ୍ରଦୀପ ମହାପାତ୍ର, ଗ୍ରାମ୍ୟ ଉନ୍ନୟନ ସଚିବ ପ୍ରଦୀପ କୁମାର ଜେନା, ଗୃହ ସଚିବ ସଂଜୀବ ଚାେପ୍ରା, ସ୍ବାସ୍ଥ୍ୟ ସଚିବ ନିକୁଞ୍ଜ ଧଳ, ମୁଖ୍ୟସଚିବଙ୍କ ଓଏସଡି ବିଶାଳ ଦେବ, ଶ୍ରମ ସଚିବ ଅନୁ ଗର୍ଗ ଓ ସ୍ବାସ୍ଥ୍ୟ ମିସନ ମୁଖିଆ ଶାଳିନୀ ପଣ୍ଡିତ ପ୍ରମୁଖଙ୍କୁ ନେଇ ସରକାରର ସବୁ ନିର୍ଦେଶକୁ କାର୍ଯ୍ୟକାରୀ କରିବା ଲାଗି ଆପ୍ରାଣ ଚେଷ୍ଟା ଚଳାଇଛନ୍ତି। ଏକମାତ୍ର ଉଦ୍ଦେଶ୍ୟ ଆକ୍ରାନ୍ତ ସଂଖ୍ୟାକୁ ଏକ ଅଙ୍କରେ ରଖିବା, ଜଣେ ବି କେହି ପ୍ରାଣ ହରାଇବେନି ଓଡ଼ିଶାରେ। ଅତୀତରେ ବାତ୍ୟା ମୁକାବିଲା କ୍ଷେତ୍ରରେ ମଧ୍ୟ ନବୀନଙ୍କ ଏହି ଫର୍ମୁଲା ବେଶ୍ ଚର୍ଚ୍ଚାର ବିଷୟ ହୋଇଛି ଆନ୍ତର୍ଜାତିକ ସ୍ତରରେ।

Leave A Reply

Your email address will not be published.