- ଫେସବୁକ ଲାଇଭରେ ଦେଶବାସୀଙ୍କ ସହ ଭାବ ବିନିମୟ କଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ
- ତୈଳ ସଂରକ୍ଷଣ କ୍ଷେତ୍ରରେ ଏକ ବଡ଼ ଉତ୍ତର ରଖିଲେ କେନ୍ଦ୍ରମନ୍ତ୍ରୀ, ଆଶ୍ବସ୍ତ ହେଲେ ପ୍ରଶ୍ନକର୍ତା
- ଲକଡାଉନରେ ଗରିବଙ୍କୁ ସହାୟକ ହୋଇଛି ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା
- ଗ୍ୟାସ ବିତରଣକୁ ସୁନିଶ୍ଚିତ କରିଥିବା କରୋନା ଯୋଦ୍ଧାଙ୍କୁ ପେଟ୍ରୋଲିୟମ ମନ୍ତ୍ରୀଙ୍କ ପ୍ରଶଂସା
- ଧୈର୍ଯ୍ୟ ରକ୍ଷାଲାଗି ବାହାର ରାଜ୍ୟରୁ ଫେରିଥିବା ଓଡ଼ିଆଙ୍କୁ କେନ୍ଦ୍ରମନ୍ତ୍ରୀଙ୍କ ନିବେଦନ
- ଲକଡାଉନ ନିମୟକୁ ମାନିବା ଓ ସାମାଜିକ ଦୂରତା ରକ୍ଷା କରିବା ପାଇଁ ପରାମର୍ଶ ଦେଲେ
- ସମସ୍ତଙ୍କୁ ମୋବାଇଲରେ ଆରୋଗ୍ୟ ସେତୁ ଆପ ଡାଉନଲୋଡ କରିବା ପାଇଁ କହିଲେ
ଭୁବନେଶ୍ବର: କେନ୍ଦ୍ର ପେଟ୍ରୋଲିୟମ୍ ଓ ପ୍ରାକୃତିକ ବାଷ୍ପ ତଥା ଇସ୍ପାତ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଜି ଫେସବୁକ୍ ଲାଇଭ ଯୋଗେ ଦେଶବାସୀ ତଥା ବିଶେଷ କରି ଓଡ଼ିଶାର ଜନସାଧାରଣଙ୍କ ସହ ଭାବ ବିନିମୟ କରିଛନ୍ତି । ଏହି ଆଲୋଚନା କାର୍ଯ୍ୟକ୍ରମରେ ମନ୍ତ୍ରୀ ଶ୍ରୀ ପ୍ରଧାନ ବିଭିନ୍ନ ଲୋକଙ୍କ ପ୍ରଶ୍ନର ଉତ୍ତର ମଧ୍ୟ ଦେଇଛନ୍ତି। ଏଭଳି ମହାମାରୀ ବିରୋଧରେ ସଂଯମ ଓ ସଂକଳ୍ପର ସହ ଲଢ଼େଇ କରିବାକୁ ସେ ଦେଶ ତଥା ରାଜ୍ୟବାସୀଙ୍କୁ ପରାମର୍ଶ ଦେଇଛନ୍ତି ।
ଆଜି ପୂର୍ବାହ୍ଣ ୧୧ଟା ବେଳେ ଫେସବୁକ୍ ଜରିଆରେ ରାଜ୍ୟବାସୀଙ୍କ ସହ ଭାବ ବିନିମୟ କରି ମନ୍ତ୍ରୀ ଶ୍ରୀ ପ୍ରଧାନ କହିଲେ ଯେ ପ୍ରଧାନମନ୍ତ୍ରୀଙ୍କ ଆହ୍ୱାନ କ୍ରମେ ଦେଶର ୧୩୦ କୋଟି ଜନସାଧାରଣ ମହାମାରୀ କରୋନା ବିରୋଧରେ ସେମାନଙ୍କର ସଂଗ୍ରାମ ଜାରି ରଖିଛନ୍ତି । ଉତ୍ପନ୍ନ ସ୍ଥିତିକୁ ଦୃଷ୍ଟିରେ ରଖି କେନ୍ଦ୍ର ସରକାରଙ୍କ ପକ୍ଷରୁ ଆଜିଠାରୁ ତୃତୀୟ ପର୍ଯ୍ୟାୟ ଲକଡାଉନ୍ ଆରମ୍ଭ ହୋଇଛି । ତାହା ମେ ୧୭ ତାରିଖ ପର୍ଯ୍ୟନ୍ତ ବଳବତ୍ତର ରହିବ। ଉଭୟ କେନ୍ଦ୍ର ତଥା ରାଜ୍ୟ ସରକାରମାନେ ଏକ ମନରେ ଏବେ କରୋନା ବିରୋଧରେ ସଂଗ୍ରାମ ଜାରି ରଖିଛନ୍ତି । କେବଳ କେନ୍ଦ୍ର ଓ ରାଜ୍ୟ ସରକାର ନୁହନ୍ତି, ଜନସାଧାରଣଙ୍କ ପୂର୍ଣ୍ଣ ସହଯୋଗ ହିଁ ଏପର୍ଯ୍ୟନ୍ତ ଏଭଳି ମହାମାରୀକୁ ନିୟନ୍ତ୍ରଣରେ ରଖିଛି । ବିଶ୍ୱର ଅଧିକାଂଶ ସମ୍ପନ୍ନ ରାଷ୍ଟ୍ରରେ କରୋନା ସଂକ୍ରମଣ ସ୍ଥିତି ଗମ୍ଭୀର ଆକାର ଧାରଣ କରିଥିବା ବେଳେ ଭାରତରେ ସେ ତୁଳନାରେ ସ୍ଥିତି ବେଶ ନିୟନ୍ତ୍ରଣାଧୀନ ରହିଛି ।
ମନ୍ତ୍ରୀ ଶ୍ରୀ ପ୍ରଧାନ କହିଲେ ଯେ ଏକ ବିଷମ ପରିସ୍ଥିତି ଦେଇ ସମସ୍ତେ ଗତି କରୁଛନ୍ତି । ତେଣୁ ଏଥିରେ କଷ୍ଟ ଓ ସମସ୍ୟା ରହିବା ସ୍ୱାଭାବିକ । ସେଥିପାଇଁ ସମସ୍ତଙ୍କୁ ସହଯୋଗର ମାନସିକତା ପ୍ରଦର୍ଶନ କରିବାକୁ ପଡ଼ିବ । ରାଜ୍ୟ ବାହାରେ ରହିଥିବା ଓଡ଼ିଆ ଭାଇଭଉଣୀମାନଙ୍କୁ ଓଡ଼ିଶାକୁ ଫେରାଇ ଅଣାଯିବା ଉଚିତ କି ନୁହେଁ ବୋଲି ଏକ ପ୍ରଶ୍ନର ଉତ୍ତର ଦେଇ ମନ୍ତ୍ରୀ ଶ୍ରୀ ପ୍ରଧାନ କହିଲେ ଯେ ଦୁର୍ଗତ ଲୋକମାନେ ଘରକୁ ଫେରିବାର ଆବଶ୍ୟକତା ରହିଛି । ସେମାନଙ୍କ ଫେରିବା ତଥା ସେମାନଙ୍କ ସ୍ୱାସ୍ଥ୍ୟର ସ୍ଥିତି ସଂପର୍କରେ ସରକାର ସଂପୂର୍ଣ୍ଣ ଅବଗତ ଅଛନ୍ତି । ଏହି ଦିଗରେ କେନ୍ଦ୍ର ଓ ରାଜ୍ୟ ସରକାର ପୂର୍ଣ୍ଣ ସହଯୋଗରେ କାର୍ଯ୍ୟ କରୁଛନ୍ତି । ନିଜର ପ୍ରିୟଜନମାନଙ୍କ ପ୍ରତି କୌଣସି ପ୍ରକାର ଅସୂୟା ଭାବ ପ୍ରଦର୍ଶନ କରିବା ଉଚିତ ନୁହେଁ ବୋଲି ସେ କହିଥିଲେ । ଅନ୍ୟ ରାଜ୍ୟରୁ ଫେରୁଥିବା ଓଡ଼ିଆ ଭାଇଭଉଣୀମାନଙ୍କୁ ଧୈର୍ଯ୍ୟଧରି ସରକାରଙ୍କ ସହଯୋଗ କରିବା ପାଇଁ ସେ ନିବେଦନ କରିଥିଲେ ।
ଭୁବନେଶ୍ୱରର କୁଶେଶ୍ୱର ବେଉରା ଅଭିଯୋଗ ବାଢ଼ିଥିଲେ ଯେ କ୍ୱାରେଣ୍ଟାଇନ ସେଣ୍ଟର ଠିକ ଭାବେ କାର୍ଯ୍ୟ କରୁନାହିଁ । ତାହାର ଉତ୍ତରରେ ଶ୍ରୀ ପ୍ରଧାନ କହିଲେ ଯେ ଆମ ପରିବାରରେ ମଧ୍ୟ ସବୁ କାମ ଠିକ ଭାବେ ଚାଲି ନଥାଏ । କେଉଁଠି କେମିତି ଭୁଲ ଭଟକାକୁ ଧରିବାର ଏହା ଅବସର ନୁହେଁ । ବରଂ ସକାରାତ୍ମକ ମନୋଭାବ ଓ ସହଯୋଗର ସହ ଏଭଳି ବିପଦକୁ ସାମନା କରିବାରେ ହିଁ ସମସ୍ତଙ୍କର ମଙ୍ଗଳ। ଯାଜପୁରରେ ଏବେ ଆକ୍ରାନ୍ତଙ୍କ ସଂଖ୍ୟା ବଢ଼ିଛି । ତେଣୁ କେନ୍ଦ୍ର ଓ ରାଜ୍ୟ ସରକାର ଏ ଦିଗ ପ୍ରତି ବିଶେଷ ଧ୍ୟାନ ଦିଅନ୍ତୁ ବୋଲି ଅନ୍ୟ ଜଣେ ବ୍ୟକ୍ତିଙ୍କ ପ୍ରଶ୍ନର ଉତ୍ତରରେ ଶ୍ରୀ ପ୍ରଧାନ କହିଲେ ଯେ ଏବେ ଯାଜପୁର ରେଡ଼ ଜୋନରେ ରହିଛି । ସରକାର ସମସ୍ତଙ୍କ ପ୍ରତି ସମାନ ଦୃଷ୍ଟି ଦେଇ କାର୍ଯ୍ୟ କରୁଛନ୍ତି । ଲକ୍ ଡାଉନ କଟକଣାକୁ ଉଚିତ ଭାବେ ଅନୁପାଳନ ଏବଂ ସରକାରଙ୍କ ସହ ସହଯୋଗ ଦ୍ୱାରା ହିଁ ରୋଗୀମାନଙ୍କୁ ଚିହ୍ନଟ ଓ ଚିକିତ୍ସା କରାଯାଇ ଆରୋଗ୍ୟ କରିହେବ ।
ସୋନପୁରର ଅଶୋକଙ୍କ ପ୍ରଶ୍ନର ଉତ୍ତରରେ ମନ୍ତ୍ରୀ ଶ୍ରୀ ପ୍ରଧାନ କହିଲେ ଯେ ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ଏଭଳି ଲକଡାଉନ୍ ସମୟରେ ଗରିବ ଓ ଅସହାୟ ଲୋକମାନଙ୍କ ପାଇଁ ବରଦାନ ସଦୃଶ ହୋଇଛି । ଗରିବ ଲୋକମାନଙ୍କୁ ଖାଦ୍ୟ ସୁରକ୍ଷା ଯୋଜନାରେ ମୁଣ୍ଡପିଛା ମାସିକ ୫ କେଜି ଚାଉଳ ଓ ୧ କେଜି ଡାଲି ତିନିମାସ ପର୍ଯ୍ୟନ୍ତ ଯୋଗାଇ ଦିଆଯାଉଛି । ଜନଧନ ଖାତାଧାରୀ ମହିଳାମାନଙ୍କ ଜମାଖାତାରେ ପ୍ରତିମାସରେ ୫୦୦ ଟଙ୍କା ଲେଖାଏଁ ଭରାଯାଉଛି । ସେହିଭଳି ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନାରେ ଗରିବ ଲୋକମାନଙ୍କୁ ୩ଟି ସିଲିଣ୍ଡର ମାଗଣାରେ ଦିଆଯାଉଛି । ଏହା ବ୍ୟତୀତ ବାର୍ଦ୍ଧକ୍ୟ ଭତ୍ତା, ବିଧବା ଭତ୍ତା ଓ ଦିବ୍ୟାଙ୍ଗ ଭତ୍ତାଧାରୀମାନଙ୍କୁ ମଧ୍ୟ ୧୦୦୦ ଟଙ୍କା ଲେଖାଏଁ ସହାୟତା ରାଶି ଯୋଗାଇ ଦିଆଯାଉଛି । ନିର୍ମାଣ ଶ୍ରମିକମାନଙ୍କୁ ୧୫୦୦ ଟଙ୍କା ଲେଖାଏଁ ସରକାର ଦେଉଥିବା ସେ ସୂଚାଇଥିଲେ ।
କରୋନା ମହାମାରୀ ଯୋଗୁ ସାରା ବିଶ୍ୱରେ ତୈଳ ସଂକଟ ଉତ୍ପନ୍ନ ହୋଇଛି ବୋଲି ଅବତାରଣା କରି ମନ୍ତ୍ରୀ ଶ୍ରୀ ପ୍ରଧାନ କହିଲେ ଯେ ସେହି ପରିସ୍ଥିତିରୁ କିଭଳି ଫାଇଦା ନିଆଯାଇପାରିବ ସେ ଦିଗରେ ତାଙ୍କ ମନ୍ତ୍ରଣାଳୟ କାର୍ଯ୍ୟ କରୁଛନ୍ତି । ତେବେ ଭାରତ ସମେତ ସାରା ବିଶ୍ୱରେ ଏବେ ତୈଳ ଚାହିଦା ହ୍ରାସ ପାଇଛି । ଭାରତରେ ତୈଳ ଚାହିଦାରେ ୭୦% ହ୍ରାସ ଘଟିଛି । ତେଣୁ ତୈଳ ଉତ୍ପାଦନକାରୀ ରାଷ୍ଟ୍ରମାନେ ସେମାନଙ୍କର ଉତ୍ପାଦନ କମାଇଛନ୍ତି । ଆମଦାନିକାରୀ ରାଷ୍ଟ୍ରମାନେ ମଧ୍ୟ ଆମଦାନି କରୁନାହାନ୍ତି । ଭାରତ ଏଭଳି ତୈଳଦର ହ୍ରାସ ବେଳେ ଷ୍ଟ୍ରାଟେଜିକ୍ ରିଜର୍ଭରେ ଅଧିକ ତୈଳ ମହଜୁଦ ରଖୁଛି । ଏପର୍ଯ୍ୟନ୍ତ ୭ ନିୟୁତ ମେଟ୍ରିକ ଟନ ଅଶୋଧିତ ତୈଳ କମ୍ ମୂଲ୍ୟରେ ଭାରତ କିଣି ସାରିଛି । ଏପରିକି ସମୁଦ୍ରରେ ଥିବା ଟ୍ୟାଙ୍କରରେ ସୁଦ୍ଧା ତୈଳ କିଣି ଭାରତ ରଖିଛି । ସେହିଭଳି କରୋନା ଜନିତ ଲକଡାଉନ ସମୟରେ ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନାର ୮ କୋଟି ଲାଭାର୍ଥୀଙ୍କ ମଧ୍ୟରୁ ଏପ୍ରିଲ ମାସରେ ୪ କୋଟି ୫୦ ଲକ୍ଷଙ୍କୁ ମାଗଣା ସିଲିଣ୍ଡର ଯୋଗାଇ ଦିଆଯାଇଥିବା ସେ କହିଥିଲେ । ଦୈନିକ ଦେଶରେ ପ୍ରାୟ ୫୦ରୁ ୬୦ ଲକ୍ଷ ପର୍ଯ୍ୟନ୍ତ ରନ୍ଧନ ଗ୍ୟାସ ସିଲିଣ୍ଡର ବିଭିନ୍ନ ତୈଳ ବିତରକ କମ୍ପାନୀମାନଙ୍କ କର୍ମଚାରୀମାନେ ପହଞ୍ଚାଉଛନ୍ତି ।
ପ୍ରଧାନମନ୍ତ୍ରୀଙ୍କ ଆହ୍ୱାନ ‘ଜାନ ହୈ ତୋ ଜହାନ ହୈ’ ଏବଂ ‘ଜାନ୍ ଭି ହୈ, ଔର ଜହାନ ଭି ହୈ’ର ଅବତାରଣା କରି ମନ୍ତ୍ରୀ ଶ୍ରୀ ପ୍ରଧାନ କହିଲେ ଯେ ସମଗ୍ର ପୃଥିବୀ ଏବେ ବଦଳୁଛି । ଦେଶ ବଦଳୁଛି, ରାଜ୍ୟ ମଧ୍ୟ ବଦଳୁଛି । ଅର୍ଥନୀତି, ବ୍ୟବସାୟ, ଲୋକ ସ୍ୱଭାବ ଓ ଚରିତ୍ର ତଥା ସମ୍ବେଦନଶୀଳତାରେ ଢ଼େର ପରିବର୍ତ୍ତନ ଆସିଛି । ତେଣୁ ଆମକୁ ସେହି ଅନୁସାରେ ଖାପ ଖୁଆଇ ପରିବର୍ତ୍ତନ କରିବା ଦ୍ୱାରା ହିଁ ସମୟର ଆହ୍ୱାନକୁ ସାମନା କରାଯାଇପାରିବ ବୋଲି ସେ କହିଥିଲେ ।