ନୂଆଦିଲ୍ଲୀ: ପଞ୍ଜାବରେ ବହୁ କଳ୍ପନାଜଳ୍ପନା ଏବଂ ବିବାଦ ପରେ ଏଆଇସିସି ସଭାପତି ସୋନିଆ ଗାନ୍ଧୀ ରବିବାର ଦିନ ନବଜୋତ ସିଂ ସିଦ୍ଧୁଙ୍କୁ ପଞ୍ଜାବ ପ୍ରଦେଶ କଂଗ୍ରେସ କମିଟିର ସଭାପତି ଭାବରେ ନିଯୁକ୍ତ କରିଛନ୍ତି। ସୋନିଆ ରାଜ୍ୟ ରାଜନୀତିରେ ମୁଖ୍ୟମନ୍ତ୍ରୀ ଅମରିନ୍ଦର ସିଂହ ଓ ସିଦ୍ଧୁଙ୍କ ମଧ୍ୟରେ ଭାରସାମ୍ୟ ରକ୍ଷା କରିବା ଲାଗି ଚାରିଜଣ କାର୍ଯ୍ୟକାରୀ ସଭାପତିଙ୍କୁ ମଧ୍ୟ ନିଯୁକ୍ତ ଦେଇଛନ୍ତି। ସେମାନେ ହେଲେ ସଙ୍ଗତ ସିଂ ଗିଲଜିଆନ୍, ସୁଖବିନ୍ଦର ସିଂ ଡାନି, ପୱନ ଗୋଏଲ ଏବଂ କୁଲଜିତ ସିଂ ନାଗ୍ରା।
ସିଦ୍ଧୁ ଏବଂ ପଞ୍ଜାବର ମୁଖ୍ୟମନ୍ତ୍ରୀ ଅମରିନ୍ଦର ସିଂଙ୍କ ସହ କଂଗ୍ରେସ ହାଇକମାଣ୍ଡର ଅନେକ ବୈଠକ ପରେ ଏହି ନିଷ୍ପତ୍ତି ନିଆଯାଇଛି। ସିଦ୍ଧୁ ପୂର୍ବରୁ ଅମରିନ୍ଦର ସିଂଙ୍କ କ୍ୟାବିନେଟରେ ଥିଲେ। କିନ୍ତୁ ୨୦୧୯ରେ ତାଙ୍କ ବିଭାଗ ପରିବର୍ତ୍ତନ ହେବା ପରେ ସେ ଇସ୍ତଫା ଦେଇଥିଲେ। କେବଳ ସେତିକି ନୁହେଁ, ସିଦ୍ଧୁ ପରବର୍ତ୍ତୀ ସମୟରେ ଅମରିନ୍ଦର ସିଂଙ୍କୁ ୨୦୧୫ ବଳିଦାନ ଘଟଣା ତଥା ପରବର୍ତ୍ତୀ ଗୁଳି ବିନିମୟ ମାମଲାରେ ସମାଲୋଚନା କରିଥିଲେ। ଆସନ୍ତା ବର୍ଷ ରାଜ୍ୟ ମତଦାନ ଥିବା ପରିପ୍ରେକ୍ଷୀରେ ଏହାକୁ ନେଇ କଂଗ୍ରେସ ହାଇକମାଣ୍ଡଙ୍କ ଚିନ୍ତା ବଢିଯାଇଥିଲା। କଂଗ୍ରେସ ଏହି ବିବାଦର ସମାଧାନ ପାଇଁ ଉଦ୍ୟମ ଜାରି ରଖିଥିଲା। ମତଭେଦ ଦୂର କରିବା ପାଇଁ ପଞ୍ଜାବର ଦାୟିତ୍ୱରେ ଥିବା ହରିଶ ରାୱତ ସିଦ୍ଧୁ ଏବଂ ସିଂଙ୍କ ସହ ଏକାଧିକ ରାଉଣ୍ଡ ବୈଠକ କରିଥିଲେ। ସିଦ୍ଧୁ ୨୦୧୭ରେ କଂଗ୍ରେସରେ ଯୋଗ ଦେଇଥିଲେ।
ଉଲ୍ଲେଖଥାଉକି, ଅମରିନ୍ଦର ଚାହୁଁଥିଲେ ଯେ ହିନ୍ଦୁ ସମ୍ପ୍ରଦାୟର କେହି ଜଣେ ଦଳର ନେତୃତ୍ୱ ନିଅନ୍ତୁ। କାରଣ ସେ ଏବଂ ସିଦ୍ଧୁ ଉଭୟ ଶିଖ୍। କଂଗ୍ରେସ ନେତା ତଥା ପଞ୍ଜାବର ବୃହତ ଶିଳ୍ପ ବିକାଶ ବୋର୍ଡର ଚେୟାରମ୍ୟାନ୍ ପୱନ ଦେୱାନଙ୍କ ନାମ ଚର୍ଚ୍ଚାକୁ ଆସିଥିଲା। ଶୁକ୍ରବାର ଦିନ ଏକ ଟୁଇଟ୍ରେ ଦେୱାନ କହିଥିଲେ ଯେ ପଞ୍ଜାବ କଂଗ୍ରେସ ସଭାପତିଙ୍କ ଠାରୁ ଆରମ୍ଭ କରି ମୁଖ୍ୟମନ୍ତ୍ରୀ, ଯୁବ କଂଗ୍ରେସ ସଭାପତି ସମସ୍ତେ ଶିଖ୍। ହିନ୍ଦୁ ସଂପ୍ରଦାୟର ପ୍ରତିନିଧିତ୍ବ କେଉଁଠାରେ ଅଛି?
ପ୍ରକାଶ ଥାଉକି, ଅମରିନ୍ଦର କହିଛନ୍ତି ଯେ ସେ ବଳିଦାନ ମାମଲା ଏବଂ ବିଦ୍ୟୁତ ଉପରେ ସରକାରଙ୍କୁ ସମାଲୋଚନା କରିଥିବା ଟୁଇଟ୍ ପାଇଁ କ୍ଷମା ନ ମାଗିବା ପର୍ଯ୍ୟନ୍ତ ସେ ସିଦ୍ଧୁଙ୍କୁ ଭେଟିବେ ନାହିଁ।