ଭୁବନେଶ୍ବର: ମାଓ ସଂଗଠନକୁ ଶକ୍ତ ଝଟକା ଲାଗିଛି। ଦୁର୍ବଳ ହେଉଛି ଲାଲ ସଂଗଠନ। ଡିଜିପି ଅଭୟଙ୍କ ମାଲକାନଗିରି ଓ କୋରାପୁଟ ଗସ୍ତ ସମୟରେ ୩ ଜଣ ହାର୍ଡକୋର ମାଓବାଦୀ ଆତ୍ମସମର୍ପଣ କରିଛନ୍ତି । ମାଲକାନଗିରି ଏସପିଙ୍କ କାର୍ଯ୍ୟାଳୟରେ ଡିଜିପିଙ୍କ ଉପସ୍ଥିତିରେ ୨ ଜଣ ଆତ୍ମସମର୍ପଣ କରିଥିବା ବେଳେ କୋରାପୁଟରେ ଜଣେ ମହିଳା ମାଓନେତ୍ରୀ ବି ମୁଖ୍ୟ ସ୍ରୋତକୁ ଆସିଛନ୍ତି।
ମାଲକାନଗିରି ଏସପିଙ୍କ କାର୍ଯ୍ୟାଳୟରେ ଡିଜିପିଙ୍କ ଉପସ୍ଥିତିରେ ଆତ୍ମସମର୍ପଣ କରିଥିବା ଦୁଇ ହାର୍ଡକୋର ମାଓବାଦୀ ହେଲେ ଏରିଆ କମିଟି ମେମ୍ବର ସବିତା ଓ ପାର୍ଟି ମେମ୍ବର ରାଇଧର । ସବିତା ନାଁରେ ୨ ଲକ୍ଷ ଓ ରାଇଧର ନାଁରେ ଲକ୍ଷେ ଟଙ୍କାର ପୁରସ୍କାର ରାଶି ଥିଲା।
ସେହିପରି କୋରାପୁଟରେ ମାଓବାଦୀଙ୍କ ବୈପାରିଗୁଡ଼ା ଏରିଆ କମିଟିର ହାର୍ଡ଼ କୋର ମାଓନେତ୍ରୀ ତାଲସେ ହୁଇକା ଡ଼ିଜିପିଙ୍କ ନିକଟରେ ଆତ୍ମସମର୍ପଣ କରିଛନ୍ତି। ତାଳସେ ହୁଇକା ନାଁରେ ୫ଲକ୍ଷ ଟଙ୍କାର ପୁରସ୍କାର ରାଶି ରହିଥିଲା। ସେ ୧୩ ବର୍ଷ ବୟସରେ ନକ୍ସଲଙ୍କ ଜନ ନାଟ୍ୟ ମଣ୍ଡଳୀ ଦ୍ୱାରା ପ୍ରଭାବିତ ହୋଇ ନକ୍ସଲ ସଂଗଠନରେ ସାମିଲ ହୋଇଥିଲେ । ତାଲସେର ଘର ନାରାୟଣ ପାଟଣା ବ୍ଲକରେ। ଜନ ନାଟ୍ୟ ମଣ୍ଡଳୀରେ ସଦସ୍ୟ ହେବା ପରେ ତାଙ୍କର ସକ୍ରିୟତାକୁ ନେଇ ତାଲସେଙ୍କ ହାତରେ ୩୦୩ ରାଇଫଲ ଠାରୁ ଆରମ୍ଭ କରି ଇନସାସ ପର୍ଯ୍ୟନ୍ତ ବ୍ୟବହାର କରିଥିବା ଡ଼ିଜିପି ସୂଚନା ଦେଇଛନ୍ତି।
ଡିଜିପି ଅଭୟ ଆଜି ତେମୁରୁପାଲି ଠାରେ ହୋଇଥିବା ବିଏସଏଫ କ୍ୟାମ୍ପର ପହଞ୍ଚି ମାଓ ସ୍ଥିତିର ସମୀକ୍ଷା କରିଥିଲେ । ମାଓବାଦୀଙ୍କୁ ନିପାତ କରିବା ଲାଗି ଟେମୃପାଲି ଠାରେ ବିଏସଏଫ୍ କ୍ୟାମ୍ପରେ ସୁରକ୍ଷା କର୍ମୀଙ୍କୁ ଗୁରୁମନ୍ତ୍ର ପ୍ରଦାନ କରିଛନ୍ତି ଡିଜିପି । ହିଂସାର ପଥ ଛାଡି ମୁଖ୍ୟ ସ୍ରୋତରେ ସାମିଲ ହେବା ପାଇଁ ମାଓବାଦୀଙ୍କୁ ଅପିଲ କରିଛନ୍ତି ଡିଜିପି ।