କଳାକାରଙ୍କୁ ଭୂଆଁ ବୁଲାଉଛନନ୍ତି ସରକାର
ରାଜଧାନୀ ରାଜରାସ୍ତାକୁ ଓହ୍ଲାଇଛନ୍ତି ଯାତ୍ରା କଳାକାର । ବିଭିନ୍ନ ଦାବି ନେଇ ଯାତ୍ରା କଳାକାର ସଂଘ ପକ୍ଷରୁ ଧାରଣା ଦିଆଯାଇଛି । ମହାମାରୀ କରୋନା ପାଇଁ ଅନେକ ଦିନ ଧରି ଯାତ୍ରା ବନ୍ଦ ରହିଥିଲା । ଏବେ ଅଗଷ୍ଟଗାଇଡଲାଇନରେ କଟକଣା କୋହଳ ପରେ ଯାତ୍ରା ପାଇଁ ସରକାର ଅନୁମତି ଦେଇଛନ୍ତି । ୫୦ ପ୍ରତିଶତ ଦର୍ଶକଙ୍କୁ ନେଇ ଯାତ୍ରା କରିବାକୁ ଅନୁମତି ମିଳିଛି । ହେଲେ ସାରା ରାଜ୍ୟରେ ନାଇଟ କର୍ଫ୍ୟୁ ବଳବତର ଥିବା ବେଳେ ରାତିରେ ଯାତ୍ରା ପରିବେଷଣ କିଭଳି ହେବ ତାକୁ ନେଇ ପ୍ରଶ୍ନ ଉଠିଛି । ସରକାର କଳାକାରଙ୍କୁ ଭୂଆଁ ବୁଲାଉଛନ୍ତି ବୋଲି ଯାତ୍ରା କଳାକାର ଦାବି କରିଛନ୍ତି । ମହାମାରୀ କରୋନା ପାଇଁ ଲକଡାଉନ ବେଳେ ଅନେକ କଳାକାର କ୍ଷତିର ସମ୍ମୁଖୀନ ହୋଇଛନ୍ତି । ଲକଡାଉନ ସମୟରେ ଆର୍ଥିକ ଦୂରାବସ୍ଥାର ଶିକାର ହୋଇଛନ୍ତି ଯାତ୍ରା କଳାକାର । ଲକଡାଉନରେ ଯାତ୍ରା ବନ୍ଦ ଥିବାରୁ ଟଙ୍କା ରୋଜଗାର କରିବା ବନ୍ଦ ହୋଇପଡିଛି । ତେଣୁ ଏବେ ସରକାର ତାଙ୍କୁ ଆର୍ଥିକ ସହାୟତା ଦେବାକୁ ଦାବି କରିଛନ୍ତି । ୬ ମାସ ପାଇଁ ମାସକୁ ୫ ହଜାର ଲେଖାଁଏ ପ୍ୟାକେଜ ଘୋଷଣା ପାଇଁ ଦାବି କରିଛନ୍ତି । ଏହା ସହ ନାଇଟ କର୍ଫ୍ୟୁ ରଖି କିଭଳି ଯାତ୍ରା ପାଇଁ ଅନୁମତି ଦେଲେ ସେ ନେଇ କିଛି ବିଚାର କରିବାକୁ ଯାତ୍ରା କଳାକାର ସଂଘ ଦାବି କରିଛି ।