ବର୍ତ୍ତମାନ ବ୍ୟସ୍ତବହୁଳ ଦିନଚର୍ଯ୍ୟା ଭିତରେ ଖାଦ୍ୟ ରୁଚି ବଦଳିଛି। ଖାଇବାକୁ ନେଇ ଅଧିକାଂଶ ଲୋକଙ୍କ ସମସ୍ୟା ବେଶୀ। ଶାସ୍ତ୍ରରେ ଲେଖା ଅଛି ଶରୀର ମାଧ୍ୟମଂ ଖଳୁଧର୍ମ ସାଧନମ୍।
ସାଧାରଣତଃ ଦେଖାଯାଏ ପ୍ରାତଃ ଭୋଜନକୁ ଲୋକମାନେ ଗୁରୁତ୍ୱ ଦେଇ ନଥାନ୍ତି। ଯାହା ମିଳିଲା ଖାଇ ଦିଅନ୍ତି। କେହି କେହି ସକାଳୁ ଖାଲି ପେଟରେ ଧୂମପାନ,ଗୁଡୁଖା ଆଦି ସେବନ କରିଥାଆନ୍ତି। ପରବର୍ତ୍ତୀ ସମୟରେ ଏହାର ଭୟଙ୍କର ପରିସ୍ଥିତି ଶରୀର ପାଇଁ ଅତ୍ୟନ୍ତ କ୍ଷତିକାରକ ହୋଇଥାଏ।
ମନେରଖିବା ଉଚିତ୍ ପ୍ରାତଃଭୋଜନ ବେଳକୁ ଜଣେ ଦଶବାର ଘଣ୍ଟା ପୂର୍ବରୁ କିଛି ଖାଦ୍ୟ ଗ୍ରହଣ କରିଥାଆନ୍ତି। ସକାଳେ ଶରୀରକୁ ଶକ୍ତିର ଆବଶ୍ୟକତା ରହୁଥିବାରୁ ପ୍ରାତଃ ଭୋଜନ ଅତ୍ୟନ୍ତ ଜରୁରୀ। କେବଳ ସେତିକି ନୁହେଁ, ଏହା ଦିବସର ପ୍ରଥମ ଖାଦ୍ୟ ହୋଇଥିବାରୁ ଶରୀର ଓ ମନର ସତେଜତା ପାଇଁ ଏହାର ଆବଶ୍ୟକତାକୁ ଆଦୌ ଏଡାଇ ହେବ ନାହିଁ।
ଶରୀରକୁ ପ୍ରାତଃ ଭୋଜନର ଶକ୍ତି ନମିଳିଲେ ଏହା ଚାପଗ୍ରସ୍ତ କରି ଥକ୍କା ଅନୁଭବ କରାଇଥାଏ। ଏହି ସମୟରେ ଶରୀର ଅନ୍ୟ ଅଂଶକୁ ଶକ୍ତି ଯୋଗାଣ କମ୍ କରି ମସ୍ତିଷ୍କକୁ ଅଧିକ ଶକ୍ତି ପ୍ରେରଣ କରେ। ପରିଣାମରେ ଶରୀର ଅଧିକ ଥକ୍କା ଅନୁଭବ କରିଥାଏ। ଦୀର୍ଘ ସମୟ ପର୍ଯ୍ୟନ୍ତ ପେଟ ଖାଲି ରହିଲେ ଏସିଡ୍ ସୃଷ୍ଟି ହୋଇ ବଦ୍ହଜମୀ ପରି ସମସ୍ୟାକୁ ନିୟନ୍ତ୍ରଣ କରିଥାଏ। କେହି କେହି କଥା ଛଳରେ ବ୍ରେକ୍ଫାଷ୍ଟକୁ ଉପବାସ ଭଙ୍ଗ ବୋଲି କହିଥାଆନ୍ତି।
ସକାଳୁ ବିଛଣା ଛାଡିବା ପରେ ତମ୍ୱା ପାତ୍ରର ବାସି ପାଣି ବହୁତ ଭଲ। ଏହାପରେ ଫଳରସ କିମ୍ୱା ସୁପ୍ ପିଇପାରନ୍ତି। ପ୍ରାତଃ ଭୋଜନ ଖାଦ୍ୟଟି ତାଜା ଥିବା ଦରକାର। ବାସୀ ଖାଦ୍ୟ କିମ୍ୱା ଫ୍ରିଜରୁ କଢାଯାଇଥିବା ଖାଦ୍ୟକୁ ପ୍ରାତଃ ଭୋଜନ ତାଲିକାରେ ଆଦୌ ରଖନ୍ତୁ ନାହିଁ। ସେହିଭଳି ଛଣାଛଣି ବଜାରର ଫାଷ୍ଟଫୁଡ୍ ଅପେକ୍ଷା ସନ୍ତୁଳିତ ସୁଷମ ଖାଦ୍ୟକୁ ଗୁରୁତ୍ୱ ଦେବା ଜରୁରୀ। ଗଜା ମୁଗ,ଭିଜା ବାଦାମ,କାଜୁ ବାଦାମ,ପେସ୍ତା ଖାଇ ପାରନ୍ତି। ଶସ୍ୟ ଜାତୀୟ ଖାଦ୍ୟ ଯଥା ରୁଟି,ଚପାତିକୁ ପ୍ରାତଃ ଭୋଜନରେ ଖାଇ ପାରନ୍ତି। ପ୍ରାତଃ ଭୋଜନ ପରେ ଫଳରସ ପିଇବା ଶରୀରକୁ ସତେଜ କରିଥାଏ।
ମନେରଖନ୍ତୁ ପ୍ରାତଃଭୋଜନ ଦ୍ୱାରା ଶରୀରର ହଜମ ପ୍ରକ୍ରିୟା ସୁସ୍ଥ ରହିବା ସହ ଅଧିକ କ୍ୟାଲୋରି ଖର୍ଚ୍ଚ ହେଉଥିବାରୁ ଅନାବଶ୍ୟକ ଚର୍ବି ଜମାଟ ବାନ୍ଧି ପାରେ ନାହିଁ। ପିଲାମାନଙ୍କ ପାଇଁ ପ୍ରାତଃ ଭୋଜନ ସେମାନଙ୍କ ମାନସିକ କ୍ଷମତାକୁ ତ୍ୱରାନ୍ୱିତ ସହ ଶରୀରକୁ ସକ୍ରିୟ ରଖିଥାଏ।
ପ୍ରାତଃ ଭୋଜନ ନକଲେ ଶରୀରରେ କୋଲେଷ୍ଟ୍ରୋଲ ଏବଂ ଟ୍ରାଇଗ୍ଲିସେରାଇଡ ପରିମାଣ ବୃଦ୍ଧି ପାଇଥାଏ। ରାତିରେ ବିଳମ୍ୱିତ ସମୟରେ ଶୋଇବା ଅଭ୍ୟାସ ପ୍ରାତଃଭୋଜନକୁ ପ୍ରଭାବିତ କରିଥାଏ। ବିଳମ୍ୱିତ ପ୍ରହରରେ ଖାଦ୍ୟ ବୃକ୍କକୁ ପ୍ରଭାବିତ କରିବାର ଆଶଙ୍କା ରଖିବା ସହ ହଜମ ପ୍ରକିୟାକୁ ବାଧାପ୍ରାପ୍ତ କରିଥାଏ। ଅନେକ ଲୋକ ପ୍ରାତଃ ଭୋଜନକୁ ଏଡାଇ ଦେଇ ଖାଲି ପେଟରେ ଘରୁ ବାହାରି ଯାଆନ୍ତି।
ଅଧୁଆ ମୁହଁରେ ଖାଲି ପେଟରେ ଥିବା ସମୟରେ ଚା,କଫି ପିଇବା ଶରୀର ପାଇଁ କ୍ଷତିକାରକ। ଖାଲି ପେଟରେ ଦୀର୍ଘ ସମୟ ରହିବାର ଭୟଙ୍କର ପରିଣତି ପରବର୍ତ୍ତୀ ସମୟରେ ଲୋକଟି ପାଇଁ କ୍ଷତିକାରକ ହୋଇଥାଏ। ଋତୁଚକ୍ର ଅନୁଯାୟୀ ପ୍ରକୃତି ପ୍ରଦତ୍ତ ଫଳ ମଣିଷର ସ୍ୱାସ୍ଥ୍ୟ ରକ୍ଷା ପାଇଁ ଶ୍ରେଷ୍ଠ ଅଟେ। ପାଞ୍ଚଟି ପୁଷ୍ଟିକର ଶସ୍ୟକୁ ନେଇ ପ୍ରସ୍ତୁତ ବଜାରରେ ମିଳୁଥିବା ପ୍ରୋଟିନ୍ ପାଉଡର କିମ୍ୱା ଚୁଡା,ଦହି,କଦଳୀ,ଗୁଡର ସମ୍ମିଶ୍ରିତ ଖାଦ୍ୟ ପ୍ରାତଃ ଭୋଜନ ପାଇଁ ବହୁତ ଭଲ।
କେହି କେହି ପୂର୍ବ ରାତ୍ରିର ରନ୍ଧା ହୋଇଥିବା ମାଣ୍ଡିଆ ଚୁନାର ପ୍ରସ୍ତୁତିକୁ ଦହି ମିଶାଇ କରି ସକାଳୁ ଖାଇଥାଆନ୍ତି। ଏହା ଶରୀର ପାଇଁ ଭଲ। ବିଶେଷକରି ପାଚନ ପ୍ରକ୍ରିୟାକୁ ଶୁଦ୍ଧତା ରଖିଥାଏ। ପ୍ରାତଃ ଭୋଜନର ଯଥେଷ୍ଟ ପୂର୍ବରୁ ପାଣି ପିଇବା ଶରୀରର ଲିଭର ଠାରୁ ସ୍ନାୟୁ ସବୁ ଦିଗକୁ ସୁରକ୍ଷିତ ରଖିଥାଏ।
- ଶୋଭନୀୟ ଆନ୍ଦୋଳନ, ଉଦୟଗିରି,ଯାଜପୁର