ଭୁବନେଶ୍ବର: ମହାପ୍ରଭୁ ଯେଭଳି ରହସ୍ୟମୟ, ତାଙ୍କର ସେବା, ନୀତି ଆଦି ସବୁ ଯେକୌଣସି ବ୍ୟକ୍ତିଙ୍କୁ ଆମୋଦିତ କରିବ। ଏଇ ଯେମିତି ଶ୍ରୀମନ୍ଦିରରେ ଥିବା ଲୁଗାଧୁଆ ଓ ପାଣିକୁଣ୍ଡ ସେବା। ଏହା ସେବା କିଏ କରନ୍ତି, ସେବାରେ କି କି କଥା କରାଯାଇଥାଏ, ଏକଥା ବି ବେଶ୍ ରୋଚକ।
ଗବେଷକଙ୍କ ତଥ୍ୟ ଅନୁସାରେ, ଲୁଗାଧୁଆ ଓ ପାଣିକୁଣ୍ଡ ସେବକ ଦୈନିକ ମଙ୍ଗଳ ଆଳତୀ ପୂର୍ବରୁ ବିମଳା ମନ୍ଦିର ପାଖ କୂଅରୁ ପାଣି ଆଣି ଭିତର ବେଢ଼ାର ବଟ ଅବକାଶ ମନ୍ଦିର ପିଣ୍ଡାରେ ଥିବା ପାଣି କୁଣ୍ଡରେ ରଖିଥାନ୍ତି। ପ୍ରତ୍ୟହ ଶ୍ରୀବିଗ୍ରହମାନଙ୍କ ସେବାକୁ ଆସୁଥିବା ପାଳିଆ ସେବକମାନେ ଗୋଡ ଧୋଇବା ପାଇଁ ଏହି କୁଣ୍ଡରେ ସବୁବେଳେ ପାଣି ଭରି ରଖିବା ଏମାନଙ୍କର କାମ। ଏହି ସେବକ ନିଜ ଖର୍ଚ୍ଚରେ ଦଉଡି ଗରା ଆଦି ବ୍ୟବହାର କରି ସେବା କରିଥାନ୍ତି।
ପାଣିକୁଣ୍ଡ ସେବକମାନେ ଶାଢ଼ୀବନ୍ଧା ସେବକ ନୁହଁନ୍ତି। ଏମାନେ ବ୍ରାହ୍ମଣ ସେବକ। ବ୍ରତ ପରେ ସାବାଳକ ହେଲେ କାମ କରିପାରିବେ। ଏହି ସେବା ବଂଶାନୁକ୍ରମିକ। କାର୍ଯ୍ୟରେ ତ୍ରୁଟି ହେଲେ କିମ୍ବା ସେବା ବାସନ୍ଦ ହେଲେ ଅନ୍ୟ ବ୍ରାହ୍ମଣ ସେବକମାନେ ନିଯୁକ୍ତ ହେବେ ଓ ତ୍ରୁଟି ଯୋଗୁଁ ଖେଇ ବନ୍ଦ ହେବ।
କେବଳ ସେତିକି ନୁହେଁ, ଦୈନିକ ଅବକାଶ ନୀତି ସରିବା ପରେ ଠାକୁରମାନଙ୍କର ମଇଲମ ବସ୍ତ୍ରଗୁଡିକ ଚାଙ୍ଗଡା ମେକାପ ଭଣ୍ଡାର ଦ୍ୱାର ଉପରେ ରଖିବେ। ଲୁଗାଧୁଆ ସେବକ ତାହା ଆଣି ବଟ ଅବକାଶ ଦେଉଳ ମଧ୍ୟରେ ଧୋଇ ଶୁଖାଇ ସେଦିନ ରାତିରେ ଭଣ୍ଡାର ଦ୍ୱାରଠାରେ ଥିବା ଚାଙ୍ଗଡାରେ ରଖିଦେଇ ଆସନ୍ତି । ଯେତେଯେତେ ନୂତନ ସୂତାବସ୍ତ୍ର,ତାହା ଲାଗି ହେବା ପୂର୍ବରୁ ଲୁଗାଧୁଆ ସେବକ ସେସବୁ ଧୋଇ ଶୁଖାଇ ଦେବେ। ଧୋବା ମଇଳାଲୁଗା ସଫା କରିବା ପରେ ଏ ସେବକ ତାହା ଧୋଇ ଶୁଖାଇ ଚାଙ୍ଗଡା ମେକାପଙ୍କୁ ଦିଅନ୍ତି।
ଲୁଗାଧୁଆ ସେବକ ବ୍ରାହ୍ମଣ ସେବକ ଓ ଏହା ଶାଢ଼ୀବନ୍ଧା ସେବା ନୁହେଁ। ବ୍ରତ ପରେ ସାବାଳକ ହେଲେ ଏହି ସେବାରେ ନିଯୁନ୍ତ ହୋଇପାରିବେ ।ଏ ସେବକ ବଟ ଅବକାଶ ମନ୍ଦିର ଓ ହରି ସହଦେବ ମନ୍ଦିରରେ ପୂଜା କରନ୍ତି । ସେବା ତ୍ରୁଟି କଲେ ଖେଇ ବନ୍ଦ ହେବ ଓ ଅନ୍ୟ ବ୍ରାହ୍ମଣ ସେବକ ନିଯୁକ୍ତ ହୋଇପାରିବେ ।