କୁବେର ସରକାରୀ ବାବୁ ଚାକିରି କରି କୋଟି କୋଟି ଟଙ୍କା ରଖିବା ସହ ଫିଲ୍ମ କରିବାର ବି ସ୍ୱପ୍ନ ଦେଖୁଥିଲେ । କୋଟିପତି ପ୍ରତାପ ସାମଲଙ୍କର ଏବେ ସାମନାକୁ ଆସିଛି ଓଲିଉଡ ଲିଙ୍କ । ଅସତ ଉପାୟରେ ଟଙ୍କା ଅର୍ଜନ କରିବା ସହ ଫିଲ୍ମରେ ଟଙ୍କା ଲଗାଉଥିଲେ ପତାପ ।
ଭିଜିଲାନ୍ସ ପକ୍ଷରୁ ଆଜି ଏନେଇ ସୂଚନା ମିଳିଛି । କୋଟିପତି ସରକାରୀ ବାବୁଙ୍କର ଟଙ୍କା ଦୁଇଟି ଓଲିଉଡ ଫିଲ୍ମରେ ଲାଗିଥିବା ଅଭିଯୋଗ ହୋଇଛି । ଫିଲ୍ମ ‘ବାଜି’ ଓ ‘ନାରୀ ଆଖିରେ ନିଆଁ’ରେ ପ୍ରତାପଙ୍କ ଟଙ୍କା ଲାଗିଥିବା ଜଣାପଡିଛି । ଏହି ଦୁଇଟି ଫିଲ୍ମରେ ପ୍ରତାପଙ୍କ ପତ୍ନୀ ସସ୍ମିତା ସାମଲ ସହ ପ୍ରଯୋଜିକା ଅଛନ୍ତି । ଏପରିକି ଆଗକୁ ଆହୁରି ସିନେମା ନିର୍ମାଣ କରିବା ନେଇ ମଧ୍ୟ ସେ ଯୋଜନା କରୁଥିଲେ । ଫିଲ୍ମ ନିର୍ମାଣ ପାଇଁ ଚୁକ୍ତି ମଧ୍ୟ ହୋଇଥିଲା । ହେଲେ ତା ପୂର୍ବରୁ ଭିଜିଲାନ୍ସ ଆଗରେ ଖୋଲିଯାଇଥିଲା ସମ୍ପତ୍ତି ର ଗୁମର।
ଓଡିଶା ପୁଲିସ ହାଉସିଂ ଆଣ୍ଡ ୱେଲଫେୟାର କର୍ପୋରେସନର ଡେପୁଟି ମ୍ୟାନେଜର ପ୍ରତାପ ସାମଲ ଏବେ ଜେଲରେ । ତାଙ୍କ ସ୍ତ୍ରୀଙ୍କୁ ମଧ୍ୟ ଗିରଫ କରାଯାଇଛି ସେ ବି ଜେଲରେ ଅଛନ୍ତି । ଜାମିନ ନାମଞ୍ଜୁର ହେବା ପରେ ୧୪ ଦିନିଆ ବିଚାର ବିଭାଗୀୟ ହେପାଜତକୁ ପଠାଇ ଦିଆଯାଇଛି । ଏଯାଏ ଭିଜିଲାନ୍ସ ଜବତ କରିଥିବା ପ୍ରତାପଙ୍କ ସମ୍ପତ୍ତି ମୂଲ୍ୟ ୧୪ କୋଟି ୮୭ ଲକ୍ଷ । ଯାହା ପ୍ରତାପଙ୍କ ଆୟର ଦଶ ଗୁଣା ଅଧିକ । ସେଥିରେ ପ୍ରତାପ ଓ ତାଙ୍କ ପରିବାର ନାଁରେ ବ୍ୟାଙ୍କରେ ରହିଛି ୧ କୋଟି ୬୧ ଲକ୍ଷ ୩୫ ହଜାର ୮୧୨ ଟଙ୍କା । ପ୍ରାୟ ସାଢେ ୩ କୋଟି ଟଙ୍କାର ୨୫ଟି ପ୍ଲଟ,ଭୁବନେଶ୍ୱର,ଭଦ୍ରକରେ ଏକାଧିକ ଆଲିଶାନ କୋଠା ।
ପ୍ରତାପଙ୍କ ଘରେ ଚଢାଉ ପରେ ଘର ମଧ୍ୟ ନଗଦ ଲକ୍ଷ ଲକ୍ଷ ଟଙ୍କା ଜବତ ହୋଇଥିଲା । ଏତେ ଟଙ୍କାର ସମ୍ପତ୍ତି ଦେଖି ଭିଜିଲାନ୍ସ ଅଧିକାରୀ ମଧ୍ୟ ତାଜୁବ ହୋଇଯାଇଥିଲେ । ସେ କେଉଁ ଉପାୟରେ ଏତେ ଟଙ୍କା ଅର୍ଜନ କଲେ ଏବେ ତାହା ସବୁଠୁ ବଡ଼ ପ୍ରଶ୍ନ । ତେବେ ଓଡିଶା ଭିଜିଲାନ୍ସ ଇତିହାସରେ ଏହା ସବୁଠୁ ବଡ଼ ଆୟ ବର୍ହିଭୂତ ସମ୍ପତ୍ତି ଧରପଗଡ ବୋଲି କୁହାଯାଉଛି ।