ଓମିକ୍ରନ ଭ୍ୟାରିଆ କୁ ନେଇ ସତର୍କ କଲା ବିଶ୍ୱ ସ୍ୱାସ୍ଥ୍ୟ ସଂଗଠନ । ଓମିକ୍ରନର ଉପପ୍ରଜାତି ବିଏ.୨ ଭ୍ୟାରିଆଣ୍ଟ ଅଧିକ ସଂକ୍ରାମକ ବୋଲି ହୁ କହିଛି । ଦ୍ରୁତ ଗତିରେ ଏହା ବ୍ୟାପୁଛି । ଓମିକ୍ରନର ପ୍ରଥମ ପ୍ରଜାତି ବିଏ-୧ଠାରୁ ବିଏ-୨ଅଧିକ ୩୩ ପ୍ରତିଶତ ସଂକ୍ରାମକ ବୋଲି ଜଣାପଡିଛି । ଏବେ ସୁଦ୍ଧା ୫୭ଟି ଦେଶକୁ ଏହି ଭ୍ୟାରିଆଣ୍ଟ ବ୍ୟାପିସାରିଲାଣି । ଯଦି କେହି ଘରେ ବିଏ-୨ ଭ୍ୟାରିଆଣ୍ଟ ରେ ସଂକ୍ରମିତ ହେଉଛନ୍ତି, ତେବେ ପରିବାରର ଅନ୍ୟ ସଦସ୍ୟଙ୍କୁ ସଂକ୍ରମିତ କରିବାର ୩୯ ପ୍ରତିଶତ ସମ୍ଭାବନା ରହିଥିବା ଗବେଷକ ମାନେ କହିଛନ୍ତି ।
ହୁ ମହାନିର୍ଦ୍ଦେଶକ ଟେଡ୍ରୋସ ଆଡାନାମ କହିଛନ୍ତି, ବିଶ୍ୱରେ ୧୦ ସପ୍ତାହରେ ଚିହ୍ନଟ ହେଲେଣି ୯ କୋଟି ଓମିକ୍ରନ ଆକ୍ରାନ୍ତ । ଯାହାକି ୨୦୨୦ ମସିହାରେ ଚିହ୍ନଟ ହୋଇଥିବା ମାମଲାଠୁ ଢେର ଅଧିକ । ହୁ’ ମହାନିର୍ଦ୍ଦେଶକ ଟେଡ୍ରୋସ ଆଡାନାମ ଏହା ବି କହିଛନ୍ତି, ଯଦି ଓ ଓମିକ୍ରନ ଅନ୍ୟ ପ୍ରଜାତି ପରି ଅତ୍ୟନ୍ତ ମାରାତ୍ମକ ନୁହେଁ । ତେବେ ଏଯାଏଁ ବି ଟଳିନି ଓମିକ୍ରନ ସଂକଟ । ଅନେକ ଦେଶରେ ଏଯାଏ ପିକ୍ ପିରିୟଡ ଆସିନି । ବିପଦ ଟଳିନଥିବାରୁ ସଂପୂର୍ଣ୍ଣ କଟକଣା ହଟାଇବା ଅନୁଚିତ । ବିଶ୍ୱର ଅଧିକାଂଶ ଦେଶରେ ଏବେ ମୃତ୍ୟ ସଂଖ୍ୟା ବଢିବାର ଖବର ଆସୁଥିବାର ସତର୍କ ରହିବା ଆବଶ୍ୟକ ବୋଲି ସେ କହିଛନ୍ତି ।
‘ହୁ’ର ବୈଷୟିକ ମୁଖ୍ୟ ମାରିଆ ଭାନ୍ କାର୍ଖୋଭ ଓମିକ୍ରନ ଶୀଘ୍ର ବ୍ୟାପିବାର କାରଣ କହିଛନ୍ତି। ସେ କହିଛନ୍ତି ଏହାର ପ୍ରଥମ ଓ ମୁଖ୍ୟ କାରଣ ହେଉଛି ଓମିକ୍ରନର ମ୍ୟୁଟେସନ । ଏହା ମାନବ ଶରୀରର କୋଷଗୁଡିକ ସହିତ ସହଜରେ ସଂଯୋଗ କରିବାରେ ସାହାର୍ଯ୍ୟ କରେ ।ଅନ୍ୟ ଏକ କାରଣ ଦର୍ଶାଇ ମାରିଆ କହିଛନ୍ତି, ରୋଗ ପ୍ରତିରୋଧକ ଶକ୍ତିକୁ ସହଜରେ ପ୍ରଭାବିତ କରିବାରେ ସଫଳ ହେଉଛି । ଯାହା ଫଳରେ ଯେଉଁମାନେ ପୂର୍ବରୁ ସଂକ୍ରମିତ ହୋଇଥିଲେ ସେମାନଙ୍କ ମଧ୍ୟରେ ପୁଣି ଶିକାର ହେଉଛନ୍ତି । ଏବଂ ଯେଉଁମାନେ ଦୁଇଟି ଡୋଜ ନେଇସାରିଛନ୍ତି ସେମାନେ ମଧ୍ୟ ଓମିକ୍ରନରେ ସଂକ୍ରମିତ ହେଉଛନ୍ତି ।