ଉତ୍ତରପ୍ରଦେଶରେ ବିଧାନସଭା ନିର୍ବାଚନ ପାଇଁ ଫେବୃଆରୀ ୧୦ରେ ପ୍ରଥମ ପର୍ଯ୍ୟାୟ ମତଦାନ ହେବ । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଗୋରଖପୁର
ଆସନରୁ ମୈଦାନରେ ଥିବା ବେଳେ ପୂର୍ବ ମୁଖ୍ୟମନ୍ତ୍ରୀ ଓ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ କରହନ୍ ସିଟରୁ ଲଢୁଛନ୍ତି । ମୁଖ୍ୟ କଥା ଏହା କି ଯୋଗୀ ଓ ଅଖିଳେଶ ଉଭୟ ପ୍ରଥମ ଥର ପାଇଁ ବିଧାନସଭା ନିର୍ବାଚନ ଲଢୁଛନ୍ତି । ଉଭୟ ଏଯାଏଁ ଲୋକସଭା ଓ ବିଧାନପରିଷଦ ନିର୍ବାଚନ ଲଢିଥିଲେ । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଓ ଅଖିଳେଶ ଯାଦବ ନିଜ ନିଜ ଆସନରୁ ନାମାଙ୍କନ ପତ୍ର ଦାଖଲ କରିଛନ୍ତି । ଦୁହେଁ ନାମାଙ୍କନ ପତ୍ର ଦାଖଲ ସମୟରେ ନିଜର ସମସ୍ତ ସମ୍ପତି ଓ ଅପରାଧିକ ମାମଲାର ତଥ୍ୟ ଦାଖଲ କରିଛନ୍ତି । ଆସନ୍ତୁ ଜାଣିବା କାହାର କେତେ ସମ୍ପତ୍ତି ବଢିଛି ଓ କାହା ବିରୋଧରେ କେତେ ଅପରାଧିକ ମାମଲା ରହିଛି ।
ଯୋଗୀ ବନାମ ଅଖିଳେଶ: କାହାର କେତେ ସମ୍ପତ୍ତି ?
ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସମ୍ପତ୍ତି ପାଖାପାଖି ୬୧ ପ୍ରତିଶତ ବଢିଛି । ୨୦୧୭ ବିଧାନପରିଷଦ ନିର୍ବାଚନ ବେଳକୁ ତାଙ୍କର ସମ୍ପତ୍ତି ୯୫.୯୮ ଲକ୍ଷ ଥିଲା । ସେହିପରି ଅଖିଳେଶ ଯାଦବ ୨୦୧୨ରୁ ୨୦୧୭ ଯାଏଁ ମୁଖ୍ୟମନ୍ତ୍ରୀ ଥିଲେ । ୨୦୧୨ରେ ଅଖିଳେଶ ବିଧାନପରିଷଦ ନିର୍ବାଚନ ଲଢିଥିଲେ । ସେତେବେଳେ ତାଙ୍କ ସମ୍ପତ୍ତି ଥିଲା ୮.୮୪ କୋଟି । ଏହା ପରେ ୨୦୧୯ରେ ଅଖିଳେଶ ଆଜମଗଡ଼ ଆସନରୁ ଲୋକସଭା ନିର୍ବାଚନ ଲିଥିଲେ ।ସେତେବେଳେ ତାଙ୍କ ସମ୍ପତ୍ତି ମୂଲ୍ୟ ୩୭.୭୮ କୋଟି ଥିଲା । ୭ ବର୍ଷ ମଧ୍ୟରେ ତାଙ୍କର ସମ୍ପତ୍ତି ୩୨୭ ପ୍ରତିଶତରୁ ଅଧିକ ବଢିଥିବା ତଥ୍ୟରେ ପ୍ରକାଶ ପାଇଛି ।
କାହା ନାଁରେ କେତେ ଅପରାଧିକ ମାମଲା?
୨୦୧୭ରେ ଯୋଗୀ ଆଦିତ୍ୟନାଥ ଯେତେବେଳେ ନାମାଙ୍କନ ଦାଖଲ କରିଥିଲେ ସେତେବେଳେ ତାଙ୍କ ବିରୋଧରେ ୩ଟି ଅପରାଧିକ ମାମଲା ଥିଲା । ହେଲେ ଏବେ ବିଧାନସଭା ନିର୍ବାଚନ ପାଇଁ ନାମାଙ୍କନ ଦାଖଲ ବେଳକୁ ତାଙ୍କ ବିରୋଧରେ କୌଣସି ଅପରାଧିକ ମାମଲା ନଥିବା ଜଣାପଡିଛି । ସେହିପରି ଅଖିଳେଶ ଯାଦବ ଯେତେବେଳେ ୨୦୧୯ରେ ନାମାଙ୍କନ ପତ୍ର ଦାଖଲ କଲେ, ତାଙ୍କ ବିରୋଧରେ କୌଣସି ଅପରାଧିକ ମାମଲା ନଥିଲା । ଏବେ ୨୦୨୨ ବିଧାନସଭା ନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ ବେଳେ ତାଙ୍କ ନାଁରେ ୩ଟି ଅପରାଧିକ ମାମଲା ଥିବା ଜଣାପଡିଛି ।