ଦେଶରେ ଏବେ କରୋନା ଦୈନିକ ସଂକ୍ରମିତଙ୍କ ସଂଖ୍ୟା ଲକ୍ଷେ ତଳେ ରହିଛି । ଆକ୍ରାନ୍ତଙ୍କ ସଂଖ୍ୟା କମିବାରେ ଲାଗିଛି ।କିନ୍ତୁ ଚିନ୍ତାର ବିଷୟ ହେଉଛି ଯେ, ମୃତ୍ୟୁ ସଂଖ୍ୟାରେ ବ୍ରେକ ଲାଗୁନି । ଏବେ ବି ପ୍ରତିଦିନ ହଜାରେ ଉପରେ ସଂକ୍ରମିତଙ୍କ ମୃତ୍ୟୁ ହେଉଥିବା ତଥ୍ୟ ଦିଆଯାଉଛି । ରାଜ୍ୟରେ ମଧ୍ୟ କରୋନା ମୃତକଙ୍କ ସଂଖ୍ୟା ପ୍ରତିଦିନ ୨୦ ଉପରେ ରହୁଛି । ଦେଶରେ ଗତ ୨୪ ଘଣ୍ଟା ରେ ୭୧ ହଜାରରୁ ଅଧିକ ନୂଆ ମାମଲା ଆସିଛି ।
ସ୍ୱାସ୍ଥ୍ୟ ବିଭାଗ ରିପୋର୍ଟ ଅନୁସାରେ, ଦେଶରେ ଆଜି ୭୧ ହଜାର ୩୬୫ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଯାହା ଗତକାଲି ତୁଳନାରେ ୫.୬ ପ୍ରତିଶତ ଅଧିକ । ଦୈନିକ ସଂକ୍ରମଣ ହାର ରହିଛି ୪.୫୪ ପ୍ରତିଶତ । ସାପ୍ତାହିକ ସଂକ୍ରମଣ ହାର ରହିଛି ୭.୫୭ % । ସେହିପରି ଦିନକରେ ଦେଶରେ ୧୨ ଶହ ୧୭ ଜଣଙ୍କ ମୃତ୍ୟୁ ହୋଇଛି । କେରଳରେ ସବୁଠୁ ଅଧିକ ସଂକ୍ରମିତ ଚିହ୍ନଟ ହୋଇଛନ୍ତି । ଗତ ୨୪ ଘଣ୍ଟା ରେ କେରଳରୁ ୨୯ ହଜାର ୪୭୧ ମାମଲା ସାମନାକୁ ଆସିଥିବା ବେଳେ ମହାରାଷ୍ଟ୍ରରେ ୬ ହଜାର ୧୦୭,ତାମିଲନାଡୁରେ ୪ ହଜାର ୫୧୯, କର୍ଣ୍ଣାଟକରେ ୪ ହଜାର ୪୫୨,ରାଜସ୍ଥାନରେ ୩ ହଜାର ୪୧୧, ମାମଲା ସାମନାକୁ ଆସିଛି । ଦେଶରେ ମୋଟ ସଂକ୍ରମିତଙ୍କ ସଂଖ୍ୟା ମଧ୍ୟରୁ ଏହି ୫ ରାଜ୍ୟରୁ ୬୭.୨୧ ପ୍ରତିଶତ ମାମଲା ଆସିଛି ।
ସେହିପରି ରାଜ୍ୟରେ ୨୪ ଘଣ୍ଟା ରେ ୧୭ ଶହ ୧୨ ଜଣ ସଂକ୍ରମିତ ଚିହ୍ନଟ ହୋଇଛନ୍ତି ।୧୮ ବର୍ଷରୁ କମ ୩୨୩ ଜଣ ଅଛନ୍ତି । ଖୋର୍ଦ୍ଧାରୁ ସର୍ବାଧିକ ୨୫୭ ପଜିଟିଭ ଚିହ୍ନଟ ହୋଇଥିବା ବେଳେ ଅନୁଗୁଳରୁ ୭୯, ବାଲେଶ୍ୱରରୁ ୫୪, ବରଗଡରୁ ୧୭, ଭଦ୍ରକରୁ ୨୨, ବଲାଙ୍ଗୀରରୁ ୩୧,ବୌଦ୍ଧରୁ ୨୯, କଟକରୁ ୧୦୪, ଦେଓଗଡ଼ରୁ ୪୬, ଢେଙ୍କାନାଳରୁ ୪୯ ଜଣ ଚିହ୍ନଟ ହୋଇଛନ୍ତି । ସେହିପରି ରାଜ୍ୟରେ ଆଉ ୨୨ ଜଣ କରୋନାରେ ମୃତ୍ୟୁ ନେଇ ତଥ୍ୟ ଦିଆଯାଇଛି । ମୃତକଙ୍କ ମଧ୍ୟରେ ଭୁବନେଶ୍ୱରରୁ ୧୪ ଜଣ ଥିବା ବେଳେ ଅନୁଗୁଳରୁ ୨ ଜଣ ଅଛନ୍ତି । ସୁନ୍ଦରଗଡ,ମୟୂରଭଞ୍ଜ,କନ୍ଧମାଳ, ଜଗତସିଂହପୁର, ଢେଙ୍କାନାଳ, ବଲାଙ୍ଗୀରରୁ ଜଣେ ଲେଖାଁଏ ମୃତ୍ୟୁ ହୋଇଛି । ମୋଟ ମୃତ୍ୟୁ ସଂଖ୍ୟା ୮ ହଜାର ୭୯୭କୁ ବୃଦ୍ଧି ପାଇଛି ।