ଋଷ-ୟୁକ୍ରେନ ମଧ୍ୟରେ ଯୁଦ୍ଧର ଆଜି ହେଉଛି ଦଶମ ଦିନ । ଦିନକୁ ଦିନ ସ୍ଥିତି ଆହୁରି ବିଗିଡିପାରେ ଲାଗିଛି । ଋଷର ଆକ୍ରମଣରେ ଧ୍ୱଂସବିଧ୍ୱସ୍ତ ହୋଇଯାଇଛି ୟୁକ୍ରେନ । ପରମାଣୁ ଆକ୍ରମଣ ଆତଙ୍କ ଭିତରେ ଋଷ ସେନା ୟୁକ୍ରେନର ରାଷ୍ଟ୍ରପତି ଭବନକୁ ଟାର୍ଗେଟ କରିଥିବା ୟୁକ୍ରେନ କହିଛି । ରାଷ୍ଟ୍ରପତି ଭବନ ପାଖରେ ରକେଠ ମାଡ଼ କରାଯାଇଛି । ସେହିପରି ଗୋଟିଏ ପରେ ଗୋଟିଏ ସହରକୁ କବଜା କରୁଛନ୍ତି ଋଷ ସେନା । ୟୁକ୍ରେନର ମାରିୟୁପୋଲ ସହରକୁ ଋଷ କବଜା କରିଥିବା ଜଣାପଡିଛିା ୟୁକ୍ରେନର ଓଡେଶା ଅଞ୍ଚଳରେ ମଧ୍ୟ ଋଷ ପକ୍ଷରୁ ଘନଘନ ଆକ୍ରମଣ କରାଯାଉଛି । ଓଡେଶାର ଏକ ବ୍ରିଜକୁ ଉଡାଇଦେଇଛନ୍ତି ଋଷ ସେନା । କିଭ ଉପରେ ଅନ୍ତିମ ଆକ୍ରମଣ ପାଇଁ ପ୍ରସ୍ତୁତ ଚଳାଇଛି ଋଷ ।
ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ୍ କିଛି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇ ୟୁକ୍ରେନ ସମର୍ଥିତ ପାଶ୍ଚାତ ଦେଶମାନଙ୍କୁ ବଡ଼ ଇସାରା ଦେଇଛନ୍ତି । ପୁଟିନ ନିଜ ଦେଶରେ ସୋସିଆଲ ମିଡିଆ କମ୍ପାନୀ ଫେସବୁକ ଓ ଟ୍ୱିଟର ଉପରେ ପ୍ରତିବନ୍ଧକ ଲଗାଇଛନ୍ତି । ଏହା ସହ ପୁଟିନ ଋଷ ସେନା ବିରୋଧରେ ମିଥ୍ୟା ଖବର ପ୍ରସାରଣକୁ ନେଇ ଏକ ନୁଆ ନିୟମକୁ ଅନୁମୋଦନ କରିଛନ୍ତି । ନିୟମ ଅନୁସାରେ ଅଭିଯୁକ୍ତକୁ ୧୫ ବର୍ଷ ଯାଏଁ ଜେଲ ଦଣ୍ଡ ଦିଆଯିବ । ସେପଟେ ଯୁଦ୍ଧଭୂମୀ ୟୁକ୍ରେନରୁ ଏବେ ବି ଅନେକ ଭାରତୀୟ ଫସିରହିଛନ୍ତି । ଅପରେସନ ଗଙ୍ଗା ମାଧ୍ୟମରେ ସେମାନଙ୍କୁ ଉଦ୍ଧାର ପାଇଁ ଉଦ୍ୟମ ଚାଲିଛି ଆଜି ଭାରତ ଫେରିଛନ୍ତି ଆଉ ୨୨୯ ଭାରତୀୟ । ସ୍ୱତନ୍ତ୍ର ବିମାନରେ ସେମାନେ ସ୍ୱଦେଶ ଫେରିଛନ୍ତି ।