- ୧୦ କ୍ବିଣ୍ଟାଲରୁ ଅଧିକ ଗଞ୍ଜେଇ ଜବତ ହେଲା
- ପୁରୀରୁ ୨୫୫ ଗ୍ରାମରୁ ଅଧିକ ବ୍ରାଉନସୁଗାର ବି
- କୋରାପୁଟ ଓ ରାଜଧାନୀରୁ ଧରାପଡିଲା ଗଞ୍ଜେଇ
ଭୁବନେଶ୍ବର: ଅଳ୍ପ କିଛି ଘଣ୍ଟା ବ୍ୟବଧାନରେ ଓଡ଼ିଶାରୁ ୧୨୫୦ କେଜିରୁ ଅଧିକ ଓଜନର ଗଞ୍ଜେଇ ଜବତ ଘଟଣା ଚର୍ଚ୍ଚାର ବିଷୟ ହୋଇଛି। ରାଜ୍ଯ ବାହାରକୁ ଚାଲାଣ ବେଳେ କୋରାପୁଟ ଲମତାପୁଟରୁ ୭୫୦ କେଜି ଗଞ୍ଜେଇ ଜବତ ହୋଇଥିବା ବେଳେ ଏପଟେ ରାଜଧାନୀରୁ ଏନସିବି ଆଉ ୫୦୬ କେଜି ଧରିଛି। ଏହି ଘଟଣା ସୂଚାଇ ଦେଉଛି ଯେ ଗଞ୍ଜେଇ ଚୋରା ଚାଲାଣ ଏବେ ବ୍ୟାପକ ଭାବେ ଚାଲିଛି।
କୋରାପୁଟ ଜିଲ୍ଲା ଲମତାପୁଟ ଅଞ୍ଚଳରେ ପୁଲିସକୁ ଏକ ବଡ ସଫଳତା ମିଳିଛି। ସଂପୃକ୍ତ ଥାନା ଅଧୀନସ୍ଥ କଣ୍ଟାଗାଁ ଜଙ୍ଗଲରୁ ୭୫୦ କେଜି ଗଞ୍ଜେଇ ଜବତ କରାଯାଇଛି। ଏସବୁ ଗଞ୍ଜେଇ ରାଜ୍ୟ ବାହାରକୁ ଚାଲାଣ ବେଳେ ଉଭୟ ଲମତାପୁଟ ଓ ମାଛକୁଣ୍ଡ ପୁଲିସ୍ ଚଢ଼ାଉ କରିଥିଲେ। ତେବେ ଘଟଣାସ୍ଥଳରୁ ସବୁ ଅଭିଯୁକ୍ତ ଫେରାର ହୋଇଯାଇଥିଲେ। ଜବତ ଗଞ୍ଜେଇର ଆନୁମାନିକ ମୂଲ୍ୟ ୫୦ ଲକ୍ଷରୁ ଊର୍ଦ୍ଧ୍ୱ ଟଙ୍କା ହେବ ବୋଲ ପ୍ରାଥମିକ ଭାବେ କୁହାଯାଇଛି।
ଏପଟେ ଭୁବନେଶ୍ବରରୁ ଏନସିବି ୫୦୬ କେଜି ଗଞ୍ଜେଇ ଜବତ କରିଛି। ନିର୍ଭରଯୋଗ୍ୟ ସୂତ୍ରରୁ ଖବର ପାଇ ଏନସିବି ଚନ୍ଦକା ନିକଟରେ ଏହି ଚାଲାଣକାରୀଙ୍କୁ ଅଟକାଇଥିଲା। ଗୋଟିଏ ଟ୍ରକ୍ (ପିବି-୧୧ସିଆର୍-୨୯୫୮)କୁ ଅଟକାଇ ତନଖି ବେଳେ ଏହି ଟିମକୁ ଗଞ୍ଜେଇ ମିଳିଥିଲା। ପିତାପଲ୍ଲୀ-ବାରଙ୍ଗରୋଡରୁ ଏହାକୁ ଜବତ କରାଯାଇଥିଲା। ଏହି ଘଟଣାରେ ତିନିଜଣଙ୍କୁ ଗିରଫ କରାଯାଇଛି। ସେମାନେ ହେଲେ ବଲଓ୍ବାନ ସିଂହ (୩୧), ଯଶପାଲ ସିଂହ (୩୫) ଏବଂ ଯଶନୁର୍ ସିଂହ (୨୧)। ଏମାନଙ୍କ ମଧ୍ୟରୁ ବଲଓ୍ବାନ ଓ ଯଶନୁର୍ ଘର ପଞ୍ଜାବରେ ହୋଇଥିବା ବେଳେ ଯଶପାଲ ଘର ହରିୟାଣା ହିସାରରେ ବୋଲି ଜଣାପଡିଛି। ଏହି ଗଞ୍ଜେଇ ଆନ୍ଧ୍ର ପ୍ରଦେଶରୁ ହରିୟାଣା ହିସାରକୁ ଯାଉଥିବା ସୂଚନା ମିଳିଛି। ତେବେ ଏସବୁ କୋରାପୁଟରୁ ଆନ୍ଧ୍ରପ୍ରଦେଶ ଯାଇଥାଇପାରେ ବୋଲି ମଧ୍ୟ ଅନୁମାନ କରାଯାଉଛି।
ସେପଟେ ଏକ ଗୁରୁତ୍ବପୂର୍ଣ୍ଣ ଘଟଣାକ୍ରମରେ ପୁରୀରୁ ବ୍ରାଉନସୁଗାର ଜବତ କରାଯାଇଛି । ଜବତ ୨୫୫ ଗ୍ରାମ୍ ବ୍ରାଉନସୁଗାରର ମୂଲ୍ୟ ୩୦ଲକ୍ଷ ଟଙ୍କା ହେବ। ଏହି ଘଟଣାରେ ୪ ମୋବାଇଲ୍, ୩ଟି ବାଇକ୍ ଓ ଗୋଟିଏ କାର୍ ଜବତ ହୋଇଥିବା ସୂଚନା ମିଳିଛି।