- ଆତଙ୍କୀଙ୍କ ଟାର୍ଗେଟରେ କାଶ୍ମୀର ପଣ୍ଡିତ
- ପୂଲିସର ସର୍ଚ୍ଚ ଅପରେସନ ଜାରି
- ନିଜକୁ ଦାୟୀ କରିଛି କେଏଫଏଫ୍
ଶ୍ରୀନଗର: ଜମ୍ମୁ କାଶ୍ମୀରରେ ପଣ୍ଡିତ ସମୁଦାୟର ଜଣଙ୍କୁ ଆତଙ୍କବାଦୀ ହତ୍ୟା କରିଛନ୍ତି । ସୋପିଆନ ଜିଲ୍ଲା ଚୌଧୁରୀ ଗଣ୍ଡ ଅଞ୍ଚଳରେ ଆତଙ୍କବାଦୀ ମାନେ ଗୁଳିମାଡ କରିଛନ୍ତି । ପୁରନ କୃଷ୍ଣ ଭଟ୍ଟ ନାମକ ବ୍ୟକ୍ତି ରାସ୍ତାରେ ଯାଉଥିବା ସମୟରେ ଅଚାନକ ଆଖିବୁଜା ଗୁଳିମାଡ କରିଥିଲେ ଆତଙ୍କବାଦୀ । ଏହାପରେ ଗୁରୁତର ଭଟ୍ଟଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ସେ ପ୍ରାଣ ହରାଇଛନ୍ତି । ଅଞ୍ଚଳକୁ ଘେରାବନ୍ଦୀ କରି ପୋଲିସ ସର୍ଚ୍ଚ ଅପରେସନ ଜାରି ରଖିଛି । ଆକ୍ରମଣକାରୀଙ୍କୁ ଧରିବା ପାଇଁ ଅପରେସନକୁ ଜୋରଦାର କରିଛନ୍ତି ସୁରକ୍ଷାକର୍ମୀ ।
ଆତଙ୍କବାଦୀଙ୍କୁ ଚିହ୍ନଟ କରିବା ପାଇଁ ଆଖପାଖ ସିସିଟିଭି ଫୁଟେଜ ଯାଞ୍ଚ ଚାଲିଛି । ଗତ ଅଗଷ୍ଟରେ ସେଓ ବଗିଚାରେ ଲୁଚି ସାଧାରଣ ନାଗରିକଙ୍କ ଉପରେ ଅତର୍କିତ ଗୁଳିମାଡ କରିଥିଲେ ଆତଙ୍କବାଦୀ । ଗୁଳିମାଡରେ ଜଣେ କାଶ୍ମୀର ପଣ୍ଡିତ ପ୍ରାଣ ହରାଇ ଥିବାବେଳେ ଜଣେ ଆହତ ହୋଇଥିଲେ । ଆକ୍ରମଣ ପାଇଁ କାଶ୍ମୀର ଫ୍ରିଡମ୍ ଫାଇଟର୍ସ ନିଜକୁ ଦାୟୀ କରିଛି । ଦୁଇ କାଶ୍ମୀର ପଣ୍ଡିତ ଭାଇ ତିରଙ୍ଗା ରାଲିରେ ସାମିଲ ହୋଇଥିବାରୁ ସେମାନଙ୍କୁ ଟାର୍ଗେଟ କରାଯାଇଥିବା ଆତଙ୍କୀ ସଙ୍ଗଠନ କହିଥିଲା ।