ଝାଡଖଣ୍ଡ; ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟର ନୋଟିସ୍ । ବେଆଇନ ଖଣି ମାମଲାରେ ଆସନ୍ତାକାଲି ହାଜର ହେବାକୁ ଇଡି ପକ୍ଷରୁ କୁହାଯାଇଛି । ତେବେ ଗୁରୁବାର ପୂର୍ବାହ୍ନ ୧୧ଟା ବେଳେ ପ୍ରବର୍ତ୍ତନ ନିର୍ଦେଶାଳୟରେ ପହଞ୍ଚିବା ପାଇଁ ସମନ୍ରେ ଉଲ୍ଲେଖ ଅଛି ।
ସୂଚନାନୁସାରେ; ଗତ ମାର୍ଚ୍ଚରେ ମିଶ୍ରା ଏବଂ ଅନ୍ୟମାନଙ୍କ ବିରୋଧରେ ପ୍ରିଭେନସନ୍ ଅଫ୍ ମନି ଲଣ୍ଡରିଂ ଆକ୍ଟଇଡି ମାମଲା ଦାୟର କରିଥିଲା । ଆଗରୁ ଏହି ମାମଲାରେ ସୋରେନଙ୍କ ଘନିଷ୍ଠ ସହଯୋଗୀ ପଙ୍କଜ ମିଶ୍ରାଙ୍କୁ ଗିରଫ କରିସାରିଛି । ଗତ ଜୁଲାଇ ୮ରେ ପଙ୍କଜ ମିଶ୍ରା ଏବଂ ତାଙ୍କ ବ୍ୟବସାୟ ସହ ଜଡ଼ିତ ଝାଡ଼ଖଣ୍ଡର ୧୮ଟି ସ୍ଥାନ ରେଡ୍ କରିଥିଲା ଇଡି । ଅଭିଯୁକ୍ତ ପଙ୍କଜ ମିଶ୍ରା ବେଆଇନ ଭାବେ ୪୨ କୋଟି ଟାଙ୍କାର ସମ୍ପତି ହାତେଇଥିବା ଇଡି ଜାଣିବାକୁ ପାଇଛି । ଏହି ଦୁର୍ନୀତିରେ ପ୍ରାୟ ୧୦୦୦ କୋଟି ଟଙ୍କା ହେରଫେର କରାଯାଇଥିବାର ପ୍ରମାଣ ମିଳିଛି ବୋଲି ଇଡି ପକ୍ଷରୁ କୁହାଯାଇଛି ।
ପଙ୍କଜ ମିଶ୍ରା ଜଣେ ବିଧାୟକ ହୋଇଥିବାବେଳେ ସୋରେନ୍ଙ୍କ ଅତ୍ୟନ୍ତ ଅନୁଗତ । ତେଣୁ କ୍ଷମତାର ଅପବ୍ୟବହାର କରି ପଙ୍କଜ ଖଣି ଦୁର୍ନୀତିର ମୁଖ୍ୟ ସୂତ୍ରଧର ଥିଲେ ବୋଲି ଅଭିଯୋଗ ହୋଇଛି । ଇଡି ପକ୍ଷରୁ ଦେଶର ୪୭ଟି ସ୍ଥାନରେ ଚଢଉ କରାଯାଇ ଏପର୍ଯ୍ୟନ୍ତ ନଗଦ ୫.୩୪ କୋଟି ଟଙ୍କା ଜବତ କରାଯାଇଥିବାବେଳେ ୧୩.୩୨ କୋଟି ଟଙ୍କାର ବ୍ୟାଙ୍କ ଆକାଉଣ୍ଟକୁ ସିଲ୍ କରାଯାଇଛି ।