ଆଡିଲେଡ: ଆଜି ଆଡିଲେଡରେ ଖେଳାଯିବ ଟି-୨୦ ବିଶ୍ୱକପର ଦ୍ୱିତୀୟ ସେମିଫାଇନାଲ ମ୍ୟାଚ । ଏଥିରେ ମୁହାଁମୁହିଁ ହେବେ ଭାରତ ଏବଂ ଇଂଲଣ୍ଡ । ଆଜିର ମ୍ୟାଚ ଉଭୟ ଦଳ ପାଇଁ କର ବା ମର ସ୍ଥିତି ହେବ । ଯେଉଁ ଦଳ ଜିତିବ ଫାଇନାଲକୁ ଉନ୍ନୀତ ହେବ । ଏଥିପାଇଁ ଦୁଇ ଦଳ ଆଡିଲେଡ ଗ୍ରାଉଣ୍ଡରେ ଜୋରଦାର ଅଭ୍ୟାସ କରିଛନ୍ତି ।
ସୂଚନା ଅନୁଯାୟୀ, ୨୦୧୨ ଟି-୨୦ ବିଶ୍ୱକପରେ ଦୁଇ ଦଳ ଅନ୍ତିମ ଥର ପାଇଁ ମୁହାଁମୁହିଁ ହୋଇଥିଲେ । ଆଜିର ଏହି ମୁକାବିଲା ଭାରତକୁ ପୁଣିଥରେ ବିଶ୍ୱକପ ଫାଇନାଲରେ ପହଞ୍ଚି ଟାଇଟେଲ ଜିତିବାକୁ ସୁଯୋଗ ଦେବ । ଏହି ପିଚରେ କିଙ୍ଗ କୋହଲିଙ୍କ ଜବରଦସ୍ତ ପ୍ରଦର୍ଶନ ରହିଛି । କିନ୍ତୁ ଓପନିଂ ଯୋଡିକୁ ନେଇ ଚିନ୍ତାରେ ଭାରତ । କେ ଏଲ ରାହୁଲ ଫର୍ମକୁ ଫେରିଥିବା ବେଳେ କ୍ୟାପଟେନ ରୋହିତ ଶର୍ମା ବଡ ସ୍କୋର କରିନପାରିବା ଦଳ ପାଇଁ ପ୍ରମୁଖ କାରଣ ପାଲଟିଛି । ସେପଟେ ଟିମ୍ ଇଣ୍ଡିଆକୁ ସାମ୍ନା କରିବାକୁ ଇଂଲଣ୍ଡ ରଣନୀତି ପ୍ରସ୍ତୁତ କରିଛି । କିନ୍ତୁ ଫର୍ମରେ ଥିବା ଟିମ୍ ଇଣ୍ଡିଆର ସ୍କାଏ ବା ସୂର୍ଯ୍ୟକୁମାର ଯାଦବଙ୍କ ଅନ୍ତିମ ମ୍ୟାଚର ବ୍ୟାଟିଂକୁ ଦେଖି ଚିନ୍ତାରେ ଇଂଲଣ୍ଡ । ଏହାରି ମଧ୍ୟରେ ଇଂଲଣ୍ଡ ମଧ୍ୟ ଚାହିଁବ ଭାରତକୁ ପରାସ୍ତ କରି ଟାଇଟେଲ ହାତେଇବାକୁ । ଦୁଇ ଦେଶ ମଧ୍ୟରେ ଖେଳାଯାଇଥିବା ମ୍ୟାଚ ରେକର୍ଡ କହୁଛି ଭାରତ ସପକ୍ଷରେ ଏହି ମ୍ୟାଚ ଯିବ ।