ଭୁବନେଶ୍ୱର, ୧୪/୦୪ : ଓଡ଼ିଶାରେ ଭାରତର ଜି-୨୦ ଅଧ୍ୟକ୍ଷତା ପରିପ୍ରେକ୍ଷୀରେ ଆୟୋଜିତ ଜନ ଭାଗିଦାରୀ କାର୍ଯ୍ୟକ୍ରମ ଭିତିରେ ଶିକ୍ଷା ଓ ଅନୁସନ୍ଧାନ (ସୋଆ)ରେ ଶୁକ୍ରବାର ଦିନ ଏକ ଫୁଡ୍ଫେଷ୍ଟିଭାଲ୍ ଆୟୋଜିତ ହୋଇଯାଇଛି । ମହାବିଷୁବ ସଂକ୍ରାନ୍ତିରେ ସୋଆର ଛାତ୍ରଛାତ୍ରୀ ଓ ଫାକଲ୍ଟି ମାନଙ୍କ ଦ୍ୱାରା ପ୍ରସ୍ତୁତ ଏହି ଫୁଡ୍ ଫେଷ୍ଟିଭାଲ୍ରେ ୧୪ଟି ଖାଦ୍ୟ ଷ୍ଟଲ୍ରେ ଓଡ଼ିଶାର ବିଭିନ୍ନ ରୂଚୀକର ଖାଦ୍ୟ ପରଶା ଯାଇଥିଲା । ଏହି ଫୁଡ୍ ଫେଷ୍ଟିଭାଲ୍କୁ ସୋଆର କୂଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ଉଦ୍ଘାଟନ କରିଥିଲେ ।
ସୋଆ କ୍ୟାମ୍ପସ-୨ରେ ଆୟୋଜିତ ଏହି ଫୁଡ୍ ଫେଷ୍ଟିଭାଲ୍ରେ କର୍ଣ୍ଣଚାଟ୍, ବେଲପଣା, ଗୁପଚୁପ୍, ଲେମ୍ବୁ ସିକଞ୍ଜି, ଦହି ଲସି, ଆଳୁ ପରଟା, ଆଳୁ କଷା, ଛେନାଗଜା, ମାଲପୁଆ, ମୋମୋ, ଦହିବରା ଆଳୁଦମ୍, ଛେନା କାକରା, ଆରିଷା ପିଠା, ବରା ଓ ମଟର ତରକାରୀ, ଚକୁଳି ଓ ଡାଲମା ଏବଂ ଭେଜିଟେବୁଲ୍ ନୁଡୁଲ୍ସ ପରିବେଷଣ କରାଯାଇଥିଲା । ତେବେ ଏହି ଫୁଡ୍ ଫେଷ୍ଟିଭାଲ୍ର ଅନ୍ୟ ଏକ ଆକର୍ଷଣ ଥିଲା ମିଲେଟ୍ ଅର୍ଥାତ୍ ମାଣ୍ଡିଆରେ ପ୍ରସ୍ତୁତ ଖାଦ୍ୟ । ଚଳିତ ବର୍ଷକୁ ଆନ୍ତର୍ଜାତୀକ ମିଲେଟ୍ ବର୍ଷ ଭାବେ ପାଳନ କରାଯାଉଥିବା ବେଳେ ଏହି ଫେଷ୍ଟିଭାଲ୍ର ଅନ୍ୟ ଏକ ଥିମ୍ ଥିଲା ନ୍ୟୁଟ୍ରି ସିରିଆଲ୍ସ କି ରାନୀ : ମିଲେଟ୍ । ମାଣ୍ଡିଆର ତିନୋଟି ଷ୍ଟଲ୍ ରଖାଯାଇଥିବାବେଳେ ମାଣ୍ଡିଆରେ ପ୍ରସ୍ତୁତ ବିରିୟାନି, ଲଡୁ, କୁକିଜ୍, ମଫିନ୍ ଓ କେକ୍ ପରିବେଷଣ କରାଯାଇଥିଲା ।
ଏହି କାର୍ଯ୍ୟକ୍ରମରେ ଛାତ୍ରଛାତ୍ରୀମାନଙ୍କୁ ସ୍ୱାସ୍ଥ୍ୟକର ଖାଦ୍ୟ ସମ୍ପର୍କରେ ଅବଗତ କରାଇବା ଲକ୍ଷ୍ୟରେ ଏହି ଫୁଡ୍ ଫେଷ୍ଟିଭାଲ୍ ଆୟୋଜିତ କରାଯାଇଥିବାବେଳେ ମାଣ୍ଡିଆକୁ ଏଥିରେ ଗୁରୁତ୍ୱ ଦିଆଯାଇଥିବା ସୋଆ କୁଳପତି ପ୍ରଫେସର ନନ୍ଦ କହିଛନ୍ତି । ଏହି ଖାଦ୍ୟ ସବୁକୁ ସୋଆର ଛାତ୍ରଛାତ୍ରୀ ଓ ଫାକଲ୍ଟି ମାନେ ନିଜେ ପ୍ରସ୍ତୁତ କରି ପରିବେଷଣ କରିଥିଲେ । ଏହି ଫୁଡ୍ ଫେଷ୍ଟିଭାଲ୍କୁ ସୋଆ ନର୍ସିଂ କଲେଜର ଫାକଲ୍ଟି କ୍ରିଷ୍ଣା ସାମନ୍ତରାୟ, ରୁବି ପ୍ରଧାନ ଓ ଝୁନୁଲତା ପ୍ରଧାନ ପରିଚାଳନା କରିଥିଲେ ।
ଉଦଘାଟନୀ କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ସୋଆ କୃଷି ମହାବିଦ୍ୟାଳୟ ଡିନ୍ ପ୍ରଫେସର ବିଜୟ କୁମାର ସାହୁ, ଆଡିସନାଲ୍ ଡିନ୍ ପ୍ରଫେସର ସନ୍ତୋଷ କୁମାର ରାଉତ, ଛାତ୍ର ମଙ୍ଗଳ ଡିନ୍ ପ୍ରଫେସର ଜ୍ୟୋତିରଞ୍ଜନ ଦାସ, ଆଡିସନାଲ୍ ଡିନ୍ (ରିସର୍ଚ୍ଚ) ପ୍ରଫେସର ପ୍ରିୟବ୍ରତ ପଟ୍ଟନାୟକ, ୟୁନିଭର୍ସିଟି ଆଉଟରିଚ ପ୍ରୋଗ୍ରାମର ନିର୍ଦ୍ଦେଶକ ପ୍ରଫେସର ନଚିକେତା କେ. ଶର୍ମା ଓ କର୍ପୋରେଟ୍ କମୁନିକେସନର ନିର୍ଦ୍ଦେଶକ ଶ୍ରୀ ଦେବ ପ୍ରସାଦ ଦାଶ ପ୍ରମୁଖ ଉପସ୍ଥିତ ଥିଲେ ।