ଛତିଶଗଡ: ଛତିଶଗଡର ଦାନ୍ତେୱାଡାରେ ନକ୍ସଲଙ୍କ ଆକ୍ରମଣରେ ୧୦ ଡିଆରଜି ଯବାନ ସହିଦ ହୋଇଛନ୍ତି । ଯବାନମାନଙ୍କୁ ନେଇ ଯାଉଥିବା ଗାଡିର ଡ୍ରାଇଭର ମଧ୍ୟ ମୃତ୍ୟୁବରଣ କରିଛନ୍ତି ।
ସୂଚନାଯୋଗ୍ୟ, ଛତିଶଗଡ଼ ବସ୍ତର ଜିଲ୍ଲା ଅନ୍ତର୍ଗତ ଅରନପୁରରେ ଯବାନମାନେ ମାଓବାଦୀ ବିରୋଧୀ ଅଭିଯାନ ସାରି ଫେରିବା ବେଳେ ହୋଇଛି ହମଲା । ଘଟଣାସ୍ଥଳରେ ସର୍ଚ୍ଚ ଅପରେସନ କରାଯାଇଛି । ମୃତ ଯବାନମାନେ ଡିଷ୍ଟ୍ରିକ୍ଟ ରିଜର୍ଭ ଗାର୍ଡ ବା ଡିଆରଜିର ସଦସ୍ୟ ଥିବା ସୂଚନା ମିଳିଛି । ଯବାନମାନେ ଆସିବା ବାଟରେ ପୂର୍ବରୁ ମାଓବାଦୀମାନେ ବିସ୍ଫୋରକ ଖଞ୍ଜିଥିବା ଆଶଙ୍କା କରାଯାଇଛି । ଏହି ଘଟଣାକୁ ନେଇ ଶୋକବ୍ୟକ୍ତ କରିଛନ୍ତି ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବଘେଲ । ଛତିଶଗଡ଼ ମୁଖ୍ୟମନ୍ତ୍ରୀ କହିଛନ୍ତି କି ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ସହ ନକ୍ସଲଙ୍କ ବିରୋଧରେ ଅଭିଯାନ ଜାରି ରହିବ ।
ଛତିଶଗଡ ମୁଖ୍ୟମନ୍ତ୍ରୀଙ୍କ ସହ ଫୋନରେ ଆଲୋଚନା କରି ସ୍ଥିତି ସମୀକ୍ଷା କରିଛନ୍ତି ଗୃହମନ୍ତ୍ରୀ ଅମିତ ଶାହା । ରାଜ୍ୟକୁ ଯଥା ସମ୍ଭବ ସାହାଯ୍ୟ ପାଇଁ ଗୃହମନ୍ତ୍ରୀ ଆଶ୍ୱସନା ଦେଇଛନ୍ତି । ମିଳିଥିବା ସୂଚନା ଅନୁସାରେ ନକ୍ସଲ ଲୁଚି ରହିଥିବା ସୂଚନା ମିଳିବା ପରେ ବୁଧବାର ସକାଳୁ ନକ୍ସଲଙ୍କୁ ଧରିବା ପାଇଁ ଅପରେସନରେ ଯାଇଥିଲେ ଯବାନ ଓ ଫେରିବା ସମୟରେ ତାଙ୍କ ଉପରେ ଆକ୍ରମଣ ହୋଇଥିଲା । ଆଉ ସେମାନଙ୍କ ଉପରକୁ ଆମ୍ବୁସ୍ କରି ଆକ୍ରମଣ କରିଥିଲେ ମାଓବାଦୀ । ଏହି ଘଟଣା ପରେ ଓଡିଶାର ୩ଟି ଜିଲ୍ଲା ହାଇ ଆଲର୍ଟ ଜାରି କରାଯାଇଛି ।
ନକ୍ସଲ ଆକ୍ରମଣରେ ସହିଦ ହୋଇଥିବା ୧୦ ଡିଆରଜି ଯବାନ ହେଉଛନ୍ତି, ଯୋଗା ସୋଢୀ, ମୁନ୍ନା ରାମ କଡ଼ତୀ, ସନ୍ତୋଷ ତାମୋ, ଦୁଲ୍ଗୋ ମଣ୍ଡାଓି୍ୱ, ଲଖମୁ ମରକାମ, ଜୋଗା କୱାସୀ, ହରିରାମ ମଣ୍ଡାଓି୍ୱ, ରାଜୁ ରାମ କରଟମ୍, ଜୟରାମ ପୋଡ଼ିୟାମ୍ ଏବଂ ଜଗଦୀଶ କୱାସୀ । ଏମାନଙ୍କ ସହ ଜଣେ ଡ୍ରାଇଭର ଧନୀରାମ ଯାଦବ । ଘଟଣାସ୍ଥଳରେ ନକ୍ସଲଙ୍କୁ ଧରିବା ପାଇଁ ସର୍ଚ୍ଚ ଅପରେସନ ଜୋରଦାର କରାଯାଇଛି ।