ଭୁବନେଶ୍ବର: ରାଜ୍ୟରେ ତାତି ଥମିବାର ନାଁ ଧରୁନି। ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ନିର୍ଦ୍ଦେଶକ ମନୋରମା ମହାନ୍ତି ଆଜି ପୁଣି ଥରେ ଗଣମାଧ୍ୟମକୁ ସୂଚନା ଦେଇ ତାତିର ଭୟାବହତା ସଂପର୍କରେ ସତର୍କ କରାଇଛନ୍ତି। ପାଣିପାଗ ବିଜ୍ଞାନ କେନ୍ଦ୍ରର ପୂର୍ବାନୁମାନ କହୁଛି, ଆଭ୍ୟନ୍ତରୀଣ ଓଡିଶାରେ ଆହୁରି ୩ ଦିନ ଯାଏଁ ଜାରି ରହିବ ଅଂଶୁଘାତ ଭଳି ପରିସ୍ଥିତି। ଖଇ ଫୁଟିବ। ସେହିଭଳି ଉପକୂଳ ଓଡିଶାରେ ମଧ୍ୟ ପ୍ରଚଣ୍ଡ ଗୁଳୁଗୁଳି ପାଞ୍ଚ ଦିନ ଯାଏ କଲବଲ କରିପାରେ।
ପାଣିପାଗ ବିଜ୍ଞାନ କେନ୍ଦ୍ର ଆହୁରି କହିଛି ଯେ ରବିବାର ଦିନ ରାଜ୍ୟର ବଲାଙ୍ଗିର,ବରଗଡ଼, କଳାହାଣ୍ଡି, ନୂଆପଡା ଓ ସୋନପୁରରେ ତାତି ଅପରିବର୍ତ୍ତିତ ରହିବ। ବଲାଙ୍ଗୀର, ବରଗଡ଼କୁ ଅରେଞ୍ଜ ଓ କଳାହାଣ୍ଡି , ନୂଆପଡ଼ା, ସୋନପୁରରେ ୟେଲୋ ସତର୍କ ସୂଚନା ଦିଆଯାଇଛି। ଆସନ୍ତା ୪ ତାରିଖ ପର୍ଯ୍ୟନ୍ତ ତାତିରେ ପରିବର୍ତ୍ତନ ସମ୍ଭାବନା ପ୍ରାୟତଃ ନାହିଁ।
ଏପଟେ ରାଜ୍ୟର କିଛି କିଛି ସ୍ଥାନରେ ଆଜି ବର୍ଷା ହୋଇପାରେ। ବିଶେଷକରି ଦକ୍ଷିଣ-ଉତ୍ତର ଓଡ଼ିଶା ଅନ୍ତର୍ଗତ ମୟୂରଭଞ୍ଜ, କେନ୍ଦୁଝର, ବାଲେଶ୍ଵର, ଝାରସୁଗୁଡ଼ା, ସୁନ୍ଦରଗଡ଼, ରାୟଗଡ଼ା, ମାଲକାନଗିରି, ଅନୁଗୁଳ, ଯାଜପୁର, ଭଦ୍ରକ, ଜଗତସିଂହପୁର, କେନ୍ଦ୍ରାପଡ଼ା, ନବରଙ୍ଗପୁର, କଳାହାଣ୍ଡି, କନ୍ଧମାଳ, ଗଞ୍ଜାମ, ଗଜପତି ଓ ନୂଆପଡ଼ାର କିଛି କିଛି ସ୍ଥାନରେ ଘଡଘଡି ସହ ମଧ୍ୟମ ଧରଣର ବର୍ଷା ହୋଇପାରେ।