ଭୁବନେଶ୍ୱରରେ ଷ୍ଟ୍ରିଟ୍ ଫୁଡ୍ ବିକ୍ରେତାଙ୍କ ପାଇଁ ନୂଆ ଗାଇଡଲାଇନ ଜାରି କଲା ବିଏମସି

ଭୁବନେଶ୍ୱର: ଭୁବନେଶ୍ୱର ମହାନଗର ନିଗମ (ବିଏମସି) ଲୋକମାନଙ୍କୁ ଉତ୍ତମ ସ୍ଵଛ ଏବଂ ପରିଷ୍କାର ଖାଦ୍ୟ ଉପଲବ୍ଧ କରାଇବାକୁ ଶୁକ୍ରବାର ଦିନ ଭୁବନେଶ୍ୱରରେ ଷ୍ଟ୍ରିଟ୍ ଫୁଡ୍ ବିକ୍ରେତାଙ୍କ ପାଇଁ ଏକ ନୂଆ ଗାଇଡଲାଇନ ଜାରି କରିଛି। ପରିମଳ, ସ୍ୱାସ୍ଥ୍ୟ ଏବଂ ପରିଷ୍କାର ପରିଚ୍ଛନ୍ନତା ପାଇଁ ଏହି ନିର୍ଦ୍ଦେଶାବଳୀ ଜାରି କରାଯାଇଛି ବୋଲି ବିଏମସି ପକ୍ଷରୁ ସୂଚନା ଦିଆଯାଇଛି। ଆଉ ଏହି ନୂଆ ନିର୍ଦ୍ଦେଶାବଳୀକୁ ସହରର ସମସ୍ତ ଷ୍ଟ୍ରିଟ୍ ଫୁଡ୍ କିଓସ୍କ ଗୁଡିକ କଡାକଡି ଭାବରେ ପାଳନ କରିବାକୁ କୁହାଯାଇଛି।

ସମସ୍ତ ଷ୍ଟ୍ରିଟ୍ ଫୁଡ୍ ବିକ୍ରେତାମାନଙ୍କ ପାଖରେ ବାଧ୍ୟତାମୂଳକ ଭାବରେ ଖାଦ୍ୟ ଲାଇସେନ୍ସ ରହିବା ଆବଶ୍ୟକ। ଖାଦ୍ୟ ବିକ୍ରେତାମାନଙ୍କୁ ଗ୍ରାହକଙ୍କୁ ଖାଦ୍ୟ ପରିବେଷଣ କରିବା ସମୟରେ ହେଡକାର୍ଭ, ମାସ୍କ ଏବଂ ଗ୍ଲୋଭସ୍ ପିନ୍ଧିବାକୁ ପଡିବ। ପରିଷ୍କାର ପୋଷାକ ସହ ଉପରେ ଆପ୍ରୋନ୍ ପିନ୍ଧିବାକୁ ପଡିବ। ଗ୍ରାହକଙ୍କୁ ଖାଦ୍ୟ ପରିବେଷଣ କରିବା ପୂର୍ବରୁ ଥାଳି ଉପରେ ଅଏଲ ପେପର ବ୍ୟବହାର କରିବେ। ଗ୍ରାହକଙ୍କୁ ବାସି ଖାଦ୍ୟ ପରିବେଷଣ କରିବେ ନାହିଁ। ସମସ୍ତ ଖାଦ୍ୟ ଘୋଡାଇ ରଖିବେ। ସେହିପରି ୟୁଜ ଆଣ୍ଡ ଥ୍ରୋ ପ୍ଲେଟ୍ ବଦଳରେ କେବଳ ଷ୍ଟିଲ୍ ପ୍ଲେଟ୍, ଚାମଚ, କପ୍ ଏବଂ ଅନ୍ୟାନ୍ୟ ବାସନ ବ୍ୟବହାର କରିବାକୁ ହେବ।

ଏହା ସହିତ ଦୋକାନୀମାନଙ୍କୁ ଦୁଇଟି ଡଷ୍ଟବିନ ରଖିବାକୁ ପରାମର୍ଶ ଦିଆଯାଇଛି – ଗୋଟିଏ ଶୁଖିଲା ଏବଂ ଅନ୍ୟଟି ଓଦା ଅବଶିଷ୍ଟାଂଶ ପାଇଁ। ଦୋକାନ ଏବଂ ଏହାର ଆଖପାଖ ଅଞ୍ଚଳକୁ ସଫା ଏବଂ ସ୍ୱଚ୍ଛ ରଖିବେ। ପ୍ଲେଟ ଏବଂ ଅନ୍ୟାନ୍ୟ ବାସନକୁ ସଫା କରିବା ପାଇଁ ବ୍ୟବହୃତ ପାଣିକୁ ପରିବର୍ତ୍ତନ କରିବେ।ଉପଯୁକ୍ତ ପାନୀୟ ଜଳ ଯୋଗାଇବେ ଏବଂ ଖାଦ୍ୟ ପ୍ରସ୍ତୁତି ପାଇଁ ନିରାପଦ ଜଳ ବ୍ୟବହାର କରିବେ।

ଏହା ବ୍ୟତୀତ ଚା’ ବିକ୍ରେତାମାନଙ୍କୁ ୟୁଜ ଆଣ୍ଡ ଥ୍ରୋ କପ ବ୍ୟବହାର ନ କରି ଏହା ବଦଳରେ ମାଟି କପ ବ୍ୟବହାର କରିବାକୁ ନିର୍ଦ୍ଦେଶ ଦେଇଛି। ଗାଇଡଲାଇନରେ ଏହା ମଧ୍ୟ ଦର୍ଶାଯାଇଛି ଯେ ଆବଶ୍ୟକ ପାର୍କିଂ ସ୍ଥାନ ଥିବା ଖାଦ୍ୟ ଆଉଟଲେଟଗୁଡିକ ପରିମଳ ପ୍ରୋଟୋକଲଗୁଡିକ ଅନୁସରଣ କରିବାକୁ ପଡିବ। ଏହି ନିର୍ଦ୍ଦେଶଗୁଡ଼ିକରୁ ଯେକୌଣସି ବିଚ୍ୟୁତିକୁ ଗୁରୁତର ଭାବରେ ଗ୍ରହଣ କରାଯିବ ଏବଂ ବିଏମସି ଜୋରିମାନା ଲାଗୁ କରିବା ଏବଂ ବ୍ୟବସାୟ ଲାଇସେନ୍ସ ବାତିଲ ସହିତ ଦୋକାନ ବନ୍ଦ କରିବା ପାଇଁ ସମସ୍ତ ପଦକ୍ଷେପ ଗ୍ରହଣ କରିବ।