ଜମ୍ମୁ କାଶ୍ମୀର: ଜମ୍ମୁ କାଶ୍ମୀରର କଠୁଆ ଜିଲ୍ଲାରେ ଗୁରୁବାର ଆତଙ୍କବାଦୀ ଏବଂ ସୁରକ୍ଷାବାହିନୀ ମଧ୍ୟରେ ହୋଇଥିବା ଏନକାଉଣ୍ଟରରେ ୨ ଜଣ ଆତଙ୍କବାଦୀ ନିହତ ହୋଇଛନ୍ତି ଏଥିସହ ୫ ସୁରକ୍ଷାକର୍ମୀ ଆହତ ହୋଇଛନ୍ତି। ସେମାନଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି। କଠୁଆ ଜିଲ୍ଲାରେ ଗତ ଚାରି ଦିନ ଧରି ଏକ ବିଶାଳ ଆତଙ୍କବାଦୀ ବିରୋଧୀ ଅଭିଯାନ ଚାଲିଛି।
ସୂଚନା ଅନୁସାରେ, ଏହି ଅପରେସନରେ ଏପର୍ଯ୍ୟନ୍ତ ପାଞ୍ଚ ଜଣ ସୁରକ୍ଷା କର୍ମୀ ଆହତ ହୋଇଥିବା ରିପୋର୍ଟ ହୋଇଛି, ସେମାନଙ୍କ ମଧ୍ୟରୁ ଜଣେ ସୁରକ୍ଷା କର୍ମୀ କଠୁଆ ଜିଏମସିରେ ଭର୍ତ୍ତି ହୋଇଛନ୍ତି, ଯେଉଁଠାରେ ତାଙ୍କର ଅପରେଶନ ଚାଲିଛି। ଅନ୍ୟ ଦୁଇଜଣଙ୍କୁ ଜମ୍ମୁ ଜିଏମସି ପଠାଯାଇଥିବା ବେଳେ, ଅନ୍ୟ ଦୁଇଜଣ ସାମାନ୍ୟ ଆହତ ହୋଇଛନ୍ତି। ଏହା ବ୍ୟତୀତ, ଏହି ଚାଲିଥିବା ଏନକାଉଣ୍ଟରରେ ଦୁଇ ଜଣ ସୁରକ୍ଷା କର୍ମୀ ଶହୀଦ ହୋଇଥିବା ଖବର ମଧ୍ୟ ରହିଛି। ତଥାପି, ଏହାକୁ ଏପର୍ଯ୍ୟନ୍ତ ସରକାରୀ ଭାବରେ ନିଶ୍ଚିତ କରାଯାଇ ନାହିଁ।
ବର୍ତ୍ତମାନ ଏହି ଏନକାଉଣ୍ଟର ଯୋଗୁଁ କଠୁଆ ରେଳ ଷ୍ଟେଶନରେ ସୁରକ୍ଷା ବ୍ୟବସ୍ଥା ବୃଦ୍ଧି କରାଯାଇଛି। ସୂଚନାଯୋଗ୍ୟ, ଗତ ୫ ଦିନ ଧରି କଠୁଆ ଜିଲାର ବିଭିନ୍ନ ସ୍ଥାନରେ ସନ୍ଦିଗ୍ଧ ଏବଂ ଆତଙ୍କବାଦୀଙ୍କ ଗୋଷ୍ଠୀ ଥିବା ଜଣାପଡିଥିଲା। କୌଣସି ଆକ୍ରମଣର ସମ୍ଭାବନାକୁ ଦୃଷ୍ଟିରେ ରଖି ଷ୍ଟେଶନରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି।